USUKUYONY 1
1
1Masukuyo a Yesu Kristo, aleorwa ni Iruva noore mashinga akwe findo efyo fikaa fishe uviny; nawe karuma nsu wakwe neende erye na woko nandeora ishinga lyakwe we Yohane. 2Yeto alekureekya Irero lya Iruva na ukureekyi lwa Yesu Kristo, mfyo findo fyoose alefilollya. 3Ngoma yeto asomaa na yewo vashitaa marero a ukisuku yelu, na itira efi fikee fireiye-fo, mashika fyeeri fyamiinana.
Fiidikiro kwa Siri Mfungare
4Ni yeny Yohane, shamwiidikira yeni siri mfungare tikee Asia. Isarya na unapwe fimukaye, efyo fyuukye efo kwa yeto aiyo na eifo, na isha ashesha; nafyo fyuukye kwa mimuyo mfungare ikee yoo mbee ya kitima kyakwe kya ushilyi; 5lyingyi fyuukye kwa Yesu Kristo, akee nkureekyi wa dede, mwana wa mbee wa yewo vafiiye, na mangyi ya vamangyi va ulana. Yeto alukundye na ilusangya ngyulyamari teru na samu yakwe. 6Neluvika umangyiny, na makohani va Iruva, nawe ni Ndeye; usuri na uniini llwakwe we fika llung'anu na llung'anu. Amen. 7Lola-te, efo ashaa na mafishi; na wo iriso mmbo lyishellollyaa, na yewo valenndosha na ifumu, na vandu va masanga a ulana woose vashekapaa kiiyo kyeendwa mmbwe. Ee ni indo. Amen.
8Yeny ni Alfa na Omega, wa mapookyony na wa mafurumyony, ni indo Nndumi Iruva aamba, yeto aiyoo, eiyoo nawe ashekaa-fo, Muni finya shoose.
Yoorywa lya Mwana wa Nndu
9Ni yeny Yohane mwanamaye waany shikee mwaakanise na yeni makiva na umangyi na usisiryo lwa Yesu Kristo, mmbo shekee kyuurukeny kyivangwaa Patmo, kimaruma kya irero lya Iruva, na ukureekyi lwa Yesu. 10Elyi shikaaywa ni Mumuyo, nato ukee nkonu wa Nndumi, shaita yoona iniini efo numa yakwa, lyivakye unyanga lwa iranda. 11Lukaamba, “Efi kulollye fireiye kyitabuny, kunderikya siri yeto mfungare: Nto Efeso, Simirna, Pergamo, Tiatira, Sardi, Filadelfia na Laodikia.” 12Shainduka naambo shilole yeto arera na yeny. Llya shainduka shalollya taa mfungare ta saabu tikee shiipoiyo uwe. 13Na nnang'ani ya taa eto shalollya-u umwi avakye Nndu wa vandu, aree soori ifikye marendeny, ikee shifinge na ukova lwa saabu yoo mavee. 14Nrwe wakwe na fii takwe tekee shaa pyai sha laura ya kyaamwi, na miso akwe akava sha kipala-pala kya muro. 15Marende akwe akava sha minya ya arera ikee shisinge ikeela deny, ikava sheelyi yailyiswa ni muro; na unyanga lwakwe lukava sha yoona lya mura mwiingyi. 16Nawe mmbo etiri nyinyiri mfungare efo wokony lwakwe usha; na usu woovi, lukee unnwi koose, lukauka efo kaniny kyakwe, na kisangu kyakwe kikavaa paa sha mwi na finya ya vayo. 17Na yeny kyeeri shilellollya shawa si yoo marendeny akwe shava sha nndu amfwa. Kasheekerya woko lwakwe usha, kaamba, “Kulairyee-fo, mmbo shikee wa mbee na wa ifurumya. 18Eto akee na muu, na yeny mmbo sheefiye, lyo lola ulaalu mmbo shikee na muu fika llung'anu na llung'anu. Na yeny mmbo shitiri ngyufunguo ta ufu na ta kwa vafu. 19Kyasia, reiyany findo efi kwalollya, na efyo fiiyo, na efyo fishaa numa yeefyo. 20Kyama kya nyinyiri tilya mfungare kulelollya wokony lwakwa usha, na kya taa tilya mfungare ta saabu, ni ekyi: nyinyiri tilya mfungare ni vasu va siri tilya mfungare, na taa mfungare ni siri mfungare.”
Currently Selected:
USUKUYONY 1: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
