3 YOHANE 1
1
1Ni yeny Mmiku, shakureiya yewe Gayo nkunde wakwa, shinkundye kya dede. 2Nkunde, mmbo shatereva naambo kukooye ivesywa mfindo fyafo fyoose na itira finya ya mwiili, kive shaasa na nrima wafo ukeevesywa. 3Mashika mmbo shilefura nnu llya vanavama veru valesha na ikureekya dede yafo, shaasa kukeenda efo dedeny yeyo. 4Nshilollyaa ifura iniini ngota elyi-fo, iita sheelyi vana vakwa vakeeteterwa ni dede yeyo.
Usha lwa Gayo
5Vakunde vakwa, ishora elyo ni lya usaari elyo kukeetannya vanavama veru vakee veny, 6nawo mbee ya siri vakakukureekya ikunda lyafo; mmbo kyeesenyaa deny kuvalole kutani vawuya nisha kwa Iruva. 7Mashika kyeendwa ni irina elyo, nkyo kimaruma vakasha, valakunde iwarya kindo kyuuka kwa vandu va masanga. 8Kyasiany, mmbo kilukooye yese iwarya vandu sha yewo, naambo luve veerunda na dede yeyo.
Diotrefe na Demetrio
9Shilereiya siri irero lyimwi, lyo Deotrefe, ulya akundye ikwiita mbee ya woose, nnyalelwiirikya-fo. 10Nkyo kwakooya shasha mmbo nshekumbwaa mashora akwe moose, shaasa akeerera fya urung'ani na ilwekerya marero maravi; nta ekyo kilamae, nta we muni nnyakee iwarya vanavama yewo-fo, na valya valangye ivawarya kaveema, na iwaumbuta efo mmba ya Iruva.
11Nkunde wakwa, kulasore uravi-fo, sora usha. Yeto mwiitana mesha mmbo akee wa Iruva, kyaindi mwiitana maravi we nnyalelollya Iruva-fo. 12Demetrio mmbo alekureekywa ni vandu woose, na dede yeyo sheni ikavenkureekya. Neese-da lukavenkureekya, na yewe mmbo kuveishi sheelyi ukureekyi lweru llwa dede.
Fya ifurumya
13Lyo mmbo sheetiri findo fiingyi fya ikureiya, lyo nshikikundye ikureiya na winu na kalamu-fo. 14Mashika mmbo shivikye nsia shikulollye uviny, lusherera kana kwa kana. 15Urilalyi lukae na yewe. Vambuya veru vakwiidikira. Idikira na vambuya yewo veru, wo nndu na irina lyakwe.
Currently Selected:
3 YOHANE 1: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.