YOSUA 5

1Naasa kyeeri vamangyi va Vaamori yewo vekee kwakulya ya Yordan taari ya nkwaany, na vamangyi va Vakanaani valya vakee kufii na yeeve, llya valeeta shaasa Nndumi Iruva aleumisa mura wa Yordan, yoo mbee ya vana va Israeli kutani vamaa iruuka, mirima yaawo mmbo ileeka sha muya, finya yaawo ikaeleleka deny, elyi vakusaraa kyaa vana va Israeli.

Vandu Varinywa Gilgali

2Kiikeny indo Nndumi Iruva kavia Yosua, “Kyasia ulaalu songosia fyaandu fya mawe moomu, kurine vana va Israeli lya kavii.” 3Naasa na Yosua katana indo, kasongosia fyaandu fya mawe moomu karina vana va Israeli alya Gibea-haaraloti.

4Na kimaruma kya ivarina nkyo ekyi, Vandu woose valya valeuka Misri, womi, vandu vaniini vashiidimaa yeenda fireny mmbo valefiiya kulya kasa vambuka Misri. 5Nawo valya valeuka Misri woose mmbo venrinwa, lyo valya valewonikya shia numa ya yuuka Misri, wo mbekee varini-fo. 6Mashika vana va Israeli mmbo valeenda ando a myaaka makumi aana kulya kasa, kutani vandu vaniini woose valeuka Misri valesarumya kulya kasa kalya llya valera valaaranya unyanga lwa Nndumi Iruva, llyo Nndumi Iruva alelya mboo, nnasheraa valollye uruka yelo Nndumi Iruva alevikya vande vawo kyaasa ashevaniingaa, uruka lwiishwe malela na wuki. 7Naasany vandu yewo mmbo Yosua alevarina, kimmba elyi kulore verinywa efo shia. 8Vekimaa irinwa woose, wo nndu kakaa ulaleny kwakwe kutani valeshia. 9Nndumi Iruva kavia Yosua, “Inu llyo nshaantaa sony yaany ilenka kulya Misri”, Kweekyo ando alya akavaangwa Gilgali kutani kwafika inu.

10Naasa Israeli vakamanya ulale alya Gilgali, nawo vakalyiiyau sukukuu ya pasaka mwiiri nkonu ikumi na kaana, nkwaany, alya imungony lya Yeriko. 11Elyi lya ndesi vakalya shoonga ta fimu fya uruka, mikate ilatiri ntarang'o, na piisi nkonu yeto. 12Naasa elyi lya ndesi mana ilya ikamanda, veekimaa ilya fimu fya uruka llwa, valakiwonise mana vakalya shoonga teefo Kanaani.

Yosua Amwi na Nndu Atiri Usu

13Naasa kyeeri Yosua alefika kufii na Yeriko, kalola neelollya nndu yoo mbee yakwe atiri usu efo wokony lwakwe, Yosua kansora kambesa, “A yewe ni umwi weeru ao ndesa yewe ni nkiduva weeru?” 14Nawe kammbia, “Ode, ‘Lyo mmbo shisheye sha nsongoru wa itorito lya Nndumi Iruva.’” Naasa Yosua eeta indo kawa si kafiirya ndi, kambesa, “A Nndumi wakwa mmbo kukunndye yeny ishinga lyakwe shitani inda?” 15Nteteri yeto wa itorito lya Nndumi Iruva kavia Yosua, “Utafo fyaaru fyafo, mashika yoo kusalalyi ni ando kweele.” Naasa Yosua kootafo fyaaru swany.

Currently Selected:

YOSUA 5: MAS2

Highlight

Compare

Copy