YOSUA 6
6
Yeriko Yatuulwa
1Muri wa Yeriko mmbo wekee uraye neeringwa deny kimaruma kya iiryaa Vaisraeli. Vandu mbekeyaanga nta isomuka efo muriny-fo. 2Naasa Iruva kavia Yosua “Kulolye! Yeny nsheuvika maakony afo muri wa Yeriko amwi na mangyi yakwe na vasikari wakwe vakaari. 3Yewe na vandu valya woose vatiri fisha 4Vakohani mfungare wo umwi neeboo iranda lya wombe lwa suva, mmuringityaa muri yeto lyimwi wo nkonu ando a mikonu irindaru. Veere mbee ya isanduku lya mavavaso. Nkonu wa mfungare varingitye muri ka mfungare vakohani veekabaa maranda awo. 5Na kyeeri vashekapaa maranda yoo na finya, neeni elyi mushiitaa unyanga lwa maranda yoo vandu woose woongore na unyanga waasha, nato muri mmbo ushewundukyaa si. Na vandu woose llyo vavingye neefo muriny.”
6Naasa Yosua kavaanga vakohani kavavia, “kurikeny isandu lya mavavaso na makohani veepoo maranda awo mfungare a mbembe ta suva, neere mbee ya isanduku elyo.” 7Naasa Yosua kavia vandu, “Ireny mbee munderingitya muri, neewo varye fisha vasongwe mbee ya isanduku lya Nndumi Iruva.”
8Naasa elyi Yosua amaa irera na vandu na vakohani valya varye maranda awo mfungare, vakeera mbee na Nndumi Iruva, vakasongwa veekapaa na isanduku lya kyaasa lya Nndumi Iruva lyikavasora yoo numa yaawo. 9Vandu valya veerye fisha mmbo valesongwa mbee ya vakohani valya vekeekapa maranda, na valya veekee numa vakasora isanduku elyo, we vakohani vakeenda veekapaa maranda. 10Yosua kavia vandu, Mulaende mwirorongyaafo, nta mulaitiwa-fo, kwiifo nkonu nshemuningaa muumu wa yoongora deny. 11Naasa vakarika isanduku lya Nndumi Iruva lyiringitye muri yeto, nalyo lyikauringitya lyimwi, llyo vakawuya na ulaleny vakandeemuya-fo.
12Elyi lya ndesi-a-vayo Yosua kakupoo nraasi, na vakohani vakeeboo isanduku lya Nndumi Iruva. 13Nawo vakohani valya mfungare vakeepoo maranda alya awo mfungare a mbembe ta suva vakeera mbee na isanduku lya Nndumi Iruva, vakeenda veekapaa, na vandu valya varye fisha vakasongoya, isanduku lya Nndumi Iruva, na varingyi vengyi vakalatya numa, maranda eekapwaa. 14Nkonu yeu wa kavii nato vakaringitya muri lyimwi, vakawayany na ulale, Vakatana indo ando a mikonu irindaaru. 15Elyi kwamfika nkonu wa mfungare vakakupoo ngama shuru, vakaringitya muri kamfungare, nto nkonu nsi weeuringitya kamfungare. 16Kufike lya mfungare llya vakohani valekaba maranda awo indi, na Yosua kavavasya vandu vaongore, kimmba Nndumi Iruva ambaniinga muri yeto, 17Na muri yeu mmbo ushevaa wa Nndumi Iruva, na wo kindo kikee kunu muriny mmbo kilyamarwaa kuuta Rahabu nka yeto wa shia muni na vandu va mmba yakwe, kimmba aletana kindo kisha llya aleekya vandu veru va saa kavasuruma. 18Neeni mulapaani ekyo kyeele-fo mashika mmbo mushekutefusaa elyi mwapaana kindo kyeele, elyi kyammaambawa ni kyeele na kwakooya vapaana ulale lwa Israeli mmbo luvaa utefusu, ludengwa, nawo veerenswa. 19Lyo fesa na sahabu, na fiiya fya minya, fyo mmbo fikee fyeele. Mmbo fisheendwaa mba kwa Nndumi Iruva. 20Naasa vandu vakakabangaya, na makohani vakakaba maranda. Naasa kyeeri valeeta unyanga lwa maranda vakakaba ngaya na unyanga uniini nnu, ntaao isimamba wa muri ukawundukya si, na vandu vakaanga neefo muriny veelolaa na mbee, vakatira muri moose.
21Naasa Israeli vakarumata findo fyoose fyeifo, womi na vaka, na vana vadu na vandu vakuu, na ng'umbe na mburu na mishungu, vakafirumata na usu. 22Yosua kavia saa valya vavii valendesununda uruka yelo, angeny efo mmba ya nka ulya ntusi, munsomute-fo amwi na woose wa mmba yakwe shaasa mulemmbikya kyaasa. 23Naasa vandu valya vakaangafo, vakasomuta Rahabu na vandu vakwe woose na findo fyawo fyoose, vakasheveende alya ulalen lwa Israeli. 24Llyo vakakorany muri yeto ukamamika na findo fya vayo fyoose, kuuta fesa na sahabu na fiiya fya minya idodorye, fyo vakafireeya Nndumi Iruva. 25Lyo Yosua karinga Rahabu nka ntuusi na vandu va mmba yakwe ando amwi na findo fyawo, nawo vakakukaya na Israeli afika inu, kimmba aletannya saa valya mesha, valya valerumwa Yosua kulya Yeriko. 26Nawe Yosua kavalyisya mboo eevaviaa, Nave mundenge nndu moose yeto asheiboo lyingyi muri yeu wa Yeriko kwakwe mmbo avaa sheelyi afiyyo m-mwana wakwe mmbee, neeto mwiitana ngiri ya vayo ave sha afiiyo ni mwana mwifurumya. 27Naasa Nndumi Iruva kakaya Yosua, na nnduma wakwe ukakwaana kulya urukeny koose.
Currently Selected:
YOSUA 6: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
