YOSUA 4

Mawe a Ikumbura avikwa

1Naasa ironda elyo lyoose lya Israeli lyikimaa iruuka Yordan, Nndumi Iruva karera na Yosua, kammbia, 2“Kyasia uteny vandu ikumi na vavii, wo ufyari nndu umwi, 3Kuvavie indi, Iboony mawe ikumi na avii yao nnang'ani ya Yordan ando makohani valesalala, mweende nang'u mundeavika efo ulaleny, yoo ando mundelalaa kio eki.”

4Naasa Yosua kavaanga vandu yewo ikumi na vavii alevadeesya, wo ufyari nndu umwi, naasa Yosua kavavia, 5“Naasa ndifony, ireny mbee ya isanduku lya Nndumi Iruva, Iruva waany, mufike alya nnang'ani ya Yordan, mundeipoo-u wo nndu iwe lyimwi kwa wo ufyari mulyivike yeeven, 6nalyo mmbo lyishevaa nkindo kyeekumbwa, kyeeri vana vany vashemuvesaa numa, veeshaambaa, A mawe yaa mmbo aamba-ki?” 7Llyo neeni mushevarouwaa indi, “Mmashika llya mura wa Yordan ulesalala mbee ya isanduku lya Nndumi Iruva lya mavavaso, kyeeri lwekeekillya Yordan, mura ukasalala, na mawe yaa mmbo avaa kindo kyeekumbura vandu va Israeli llung'anu.”

8Nkyo vana va Israeli vakatana indo shaasa Yosua alevavia, vakandeepoo mawe ikumi na avii alya nnang'ani ya Yordan, indo shaasa Nndumi Iruva alevavasya Yosua, shaasa ngyufyari ikumi na ivii tikai, vakaipoo mawe yoo vakaafita ando kweelala, vakaavika-u.

9Numa Yosua kaala mawe ikumi na avii yoo nnang'ani ya Yordan, alya marende a vakohani alevarya valya veerye isanduku lya mavavaso, nang'u mmbo aiyo fika inu. 10Kimmba vakohani yewo veipoo isanduku lya mavavaso valesalala yoo nnang'ani ya Yordan, kutani efyo fyoose Nndumi Iruva alevavasya Yosua mfileinutyo, shaasa na Mose alevavasya Yosua vandu yewo vakaangusya iruuka Yordan. 11Vandu woose vekimaa iruuka llyo na isanduku lyikaruuka na vakohani yewo vandu woose veelollye. 12Nawo vana va Ruben na va Gadi na kyenga kya yewo va Manase vakaruuka veekee vaambike fisha fyawo vakeera mbee ya Israeli, shaasa valevavasyo Mmose. 13Nawo mmbo veefikye vandu vekepana fiku makumi aana, veekee mbee ya Nndumi Iruva naambo veende fireny efo kyaandeeny kya Yeriko. 14Kufike yoo Nndumi Iruva kakunda irumisha Yosua mbee ya Israeli woose, nawo vakamwiindya shaasa valeindya Mose-da, muu wakwe moose

15Llyo Nndumi Iruva alerera na Yosua, kammbia, 16“Kyasia via vakohani yewo veeipoo isanduku lya ukureeki vasaame vaanke efo Yordan.” 17Naasa Yosua kavia vakohani yewe vasaame vanke efo Yordan. 18Naasa kyeeri vakohani yeewo valesaama vauka kulya Yordan nawo vakavarya uteri wuumu, llyo mura wa Yordan ulewuya alya weekai, ukaishwa shapu, ukairya na alya weefikye.

19Na ironda elyo mmbo lyilesaama lyuuka Yordan wiikee nkonu wa ikumi na mwiiri wa mbee, vakamannya ulale alya Gilgali, taari ya ngama ya Yeriko. 20Na mawe alya ikumi na avii valeoota alya mnang'ani ya Yordan, Yosua kaasalesa alya Gilgali. 21Kavia vana va Israeli, “Numa elyi vana vany vashevesa vandeye, A mawe yaa ni eekyi?” 22Llyo mushevarouwaa, “Vana va Israeli mmbo valekillya mura wa Yordan veeshiiraa ando kwaarutu. 23Mashika Nndumi Iruva, Iruva waany mmbo aleumisa mura wa Yordan alya mwekeeyiira kutani mwamaa iruuka, nakyo kyikava shaasa Nndumi Iruva waany etanya Yeeve lya Shamu, llya eumisa mura kutani vandu valemaa iruuka. 24Naambo vandu woose ulaniny vamanye finya ya woko lwa Iruva, sheelyi mmbo lutiri wiidimi, naambo veendye Nndumi Iruva, Iruva waany llung'anu.”

Currently Selected:

YOSUA 4: MAS2

Highlight

Compare

Copy