YOSUA 3
3
Israeli Varuuka Yordan
1Naasa Yosua kakupoo ngama nraasi, koota vandu alya Shitimu vakandefika alya mureny wa Yordan, we na Israeli woose vakakaau mbele, varuukeny. 2Kwiikisia mikonu iraru, vashillyi vakeera efo mbeny, 3vakavia vandu: “Elyi valollyaa isanduku lya mavavaso a Nndumi Iruva, Iruva waany lyiito mbee yaany lyiipoyyo mmakohani valevi, llyo neeni mulatye. 4Lyo yoo nnang'ani yaany na isanduku elyo kukeeu mwaanya wa marende fiku fivii, naambo wo veere mbee na yoora shia, kimba mulaishi shia.”
5Yosua kavia vandu, “Kwiilyiseny mbele, mashika ndesi Nndumi Iruva mmbo ashetanaa findo filandelollyo kwany.” 6Naasa Yosua kavia makohani, “Ipoony isanduku lya mavavaso, muruuke musongoye vandu.” Nawo vakakurika isanduku lya mavavaso, vakasongwa nalyo. 7Naasa Nndumi Iruva kavia Yosua, “Ni-inu yeni nshekung'anisaa mbee ya Israeli woose, naambo vamanye paa, mmbo shikee neewe shaasa llya shekee na Mose. 8Naasa vavasyany makohani yewo veepoo isanduku lya mavavaso, kyeeri mushefikaa yoo mbai ya mura wa Yordan, salaleny efo mureny wa Yordan.”
9Kyasia Yosua kavia vana va Israeli, “Oshony nayaa-te mushearanya marero a Nndumi Iruva, Iruva waany. 10Kindo ekyi nkyo kilooraa sheelyi Iruva waany akee na muu mmbo ariani neese, nawe nta nnaraa nalaumbuta Vakanani, na Vahiti na Vahivi na Vaperii na Vagirgashi, na Vaamori na Vayebusi. 11Mulollye ro, isanduku lya mavavaso a Nndumi wa Iruveen na ulana loose mmbo lyikee ruuka Yordan mbee yaan. 12Ulaalu uteny vandu ikumi na vavii efo ngyufyariny ta Israeli toose, wo ufyari nndu umwi. 13Na kyeeri makuheni vasheeraa mbee veerye isanduku lya mavavaso a Nndumi Iruva, Nndumi wa ulana loose, kyeeri vashesalalaa yoo mureny wa Yordan, mura yeto mmbo usalalaa yeeka uve sha usau.”
14Naasa vandu vakakupoo efo ulaleny naambo vakillye Yordan, makohani navo varye isanduku lya mavavaso mmbo vashiiraa mbee ya vandu woose, 15Naasa yewo veerye isanduku lya mavavaso veekifika Yordan na makohani vakavarya mura, (mashika mura wa Yordan mmbo wiishwaa ikafika efo mbai deny kyeeri kyoose kya kisie), 16naasa mura mmbo ulesalala, ukarwa na uwe sha usau ukafika kwaasha deny fika Adamu-nto muri ukee kufii na Saretani, ng'u mura yeto usheendaa yeeveny lya Araba llyo yeeve lya shumbi, mura ukasalala, vandu vakeera ando kwaarutu kufii na Yeriko. 17Nawo makohani yewo veepoo isanduku lya mavavaso a Nndumi Iruva vakakaarya vekee ando kwaarutu efo Yordan, Israeli vakaruuka mura veeshiiraa ando kwaarutu, kutani woose vamaa iruuka Yordan.
Currently Selected:
YOSUA 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
