YOSUA 2

Yosua Aruma Veesununda Yeriko

1Naasa Yosua karuma vandu vavii, saa kirika vanka alya Shitimu naambo vandesaiya uruka evaviaa, “Endeny mundelola uruka yelo, na Yeriko.” Naasa vakeenda vakafika poo kwa nka wa shia avaangwaa Rahabu, vakalallya kwakwe.

2Naasa mangyi ya Yeriko kafityo mbony kavyo, “Kwiifo vandu vavii va vana va Israeli vansha kunu kio eki, vashesaiya uruka.” 3Llyo mangyi ya Yeriko eruma vandu kwa Rahabu vandembia, “Somuta vandu valya valesha kwafo, mashika ni vandu va saa.” 4Naasa Rahabu mmbo ensomta-fo vandu yewo kandevasuruma, llyo kaamba, “Ni dede kwiifo vandu valesha kwakwa, lyo nshilemanya kundo vaukye-fo, 5llyo kyeeri ngiri ya muri irayoo nawo vakasomuka kwakwa kwammeshafo ireema, nta shilamanye kundo valeenda nafo. Vasoreny uviny, muvakooyaa.” 6Lyo we Rahabu mmbo embasaamisa kai, kavasikya na makyenya a ngatani eevikye efo kai. 7Naasa vandu va mangyi vakasora shia ya yeenda Yordan vakafika irikony, nawo vekyeenda indo na ngiri ya muri ikarayo.

8Kulaore vallala Rahabu kavasora kulya kai 9kavavia, “Yeny mmbo shiishi deny Nndumi Iruva mmbo alemuniinga uruka yelu, neese mmbo lutirwa mmbweerei uniini nnu, na vandu woose va uruka yelu mmbo vakesavaa nnu kimaruma kyany. 10Mashika mmbo luleeta shaasa Nndumi Iruva alerauwa mura wa yeeve lya shamu yoo mbee yaany llya muleuka Misri, lukaveeta-da na filya muletannya vamangyi valya vavii va Vaamori wo Sihoni na Oga, llya mulevarumata deny. 11Kyeeri luleita indo mirima yeeru ikeeka sha muya, ukaari lweru loose lukasia kimaruma kyaany, mashika Nndumi Iruva, Iruva waany mmbwe Iruva wa iruveu na kunu ulaniny. 12Naasa ulaalu mmbo shamuterevaany, mushilyiiye mboo na irina lya Nndumi Iruva, sheelyi mushesaryaa mmba ya nde, mushoore na kiringisyo; 13elyi mwiishaa musarye nde wakwa na ma wakwa, na vana va ma va kyuumi na va kika na findo fyawo fyoose mulureu na mnu.”

14Vandu valya vakammbia, “Muu wany uve ando a muu weru, lyo mukanra mulaamba mbony teru naambo kyeeri Nndumi Iruva asheluniingaa uruka yelu mmbo lushekutannyaa mesha.”

15Naasa kawoolota na kyoove kaveetaa idirisheny mashika mmba yakwe mmbo yekee yoo isimambeny lya muri, we kakaa yoo mbai. 16Nawe kavavia, “Endeny na shia yeyo ya ifumbuu, naambo yewo vakeemuvingya valasheemukooya. Endeny mukandeovya efo ifumbuny ando a mikonu iraru kutani vawuya, llyo mukwengyeny.” 17Vandu valya vavii vakammbia “Yese llukundye yeenda mbai na kyaasa kyeru-fo. 18Fingya uruu ludodorye yoo idirisheny elyi kwaloolotya naambo elyi lushaangaa urukeny yelu neewe kusang'irye vandu vafo woose yaa kwafo, ndoo na mau, vana va mau na vandu va kyeny kwa ndoo. 19Na nndu yeto ashesomukaa efo mmba kwafo mbwe muni asheveswoo samu yakwe muni, nta nshi yese-fo, na yeto ashekooyoo efo mba kwafo ni yese luringaa samu yakwe kulave nndu ampaana. 20Lyo kwakooya kwasukkwa mbony teru, nkiluwore yese-fo, kyeendwa nkyaasa eki-fo.”

21Nawe Rahabu kaamba, “Nakyo kive indo shaasa mwaamba.” Kawoolota nawo vakeenda. Llyo kafingyan uruu ludodorye yoo idirisheny. 22Vandu yewo vakeenda vakandefika mafumbuu vakakaafo mikonu iraru, kutani vandu valya vekeevavingya valewuya, nawo mmbo valesora shia ilya shoose, valavakooye. 23Naasa vandu valya vavii vakaoloka kulya ifumbuu, vakaruuka Yordan vakakooya Yosua neemmbya findo fyoose shaasa kileva. 24Vakammbia, “Ni kya dede Nndumi Iruva ambika uruka yelo maakony eru, na vandu va uruka elu mirima yaawo mmbo ikeeyeeka sha muya kimaruma kyeru.”

Currently Selected:

YOSUA 2: MAS2

Highlight

Compare

Copy