YOSUA 24

Yosua Arera na Vandu Kulya Shekemu

1Naasa Yosua kasang'irya ngyufyari toose ta Israeli kulya Shekemu, kavaanga vamiku vawo woose, na vasongoru vawo, na veeleta myaandu, vakasha woose mbee ya Iruva. 2Yosua kavavia, “Nndumi Iruva wa Israeli mmbo aamba indi, Vande vany elyo mbee mmbo veekee kwakulya ya mura wa Eufrati, mashika Tera we nde wa Abrahamu, nawe ni nde wa Nahori mmbo vekee vandu va masanga vakarundya maruva engi.” 3Neeny llyo shilevaanga-fo Abrahamu, shashemfita urukeny lwa Kanaani, shamweerya llya shilenniinga Isaki. 4Isaki nawe shanniinga Esau na Yakobo. Esau shanniinga ifumbu lya Seiri lyive lyakwe, we Yakobo na vana vakwe vakandesamya Misri. 5Naasa sharuma Mose na Aron, shakaba uruka lwa Misri na shia shiingi, llyo valeawuka kulya Misri. 6Shoota vande vany kulya Misri, mukandekooya yeeve, Vamisri vakamusora na frasi na mitika fika alya yeeveny ya Shamu. 7Nalwo kyeeri valefuuya Nndumi Iruva, Nndumi Iruva kavika ireema yoo nnang'ani kavii yaawo na Vamisri, yeeve lyikavamira. Na miso any alelollya efyo fyoose shiletana kulya Misri Numa mukakaa kasa ando a mukonu miingi. 8Shashemweende fika urukeny lwa Vaamori kwakulya ya Yordan, nawo vakakabana neeni, shamweekya mukavavinga, mukaidima itirany uruka. 9Llyo Balaki we mwana wa Sipori wa mangyi ya Moabu aleiboo fira nandekabana na Israeli, karuma vandu vandevaanga Balaamu we mwana wa Beori nasheveeka ivadenga. 10Lyo yeny shalema Balaamu, we keengera imukundya mesha, mukooka maakony akwe. 11Naasa mukakillya Yordan neefika Yeriko, Nawo vandu va Yeriko vakakabana neeni. Nawo ni Vaamori na Vaperii, Vakanaani na Vahiti na Vagirgashi na Vahifi, na Vayebusi, neeny shamweekya mukavavinga. 12Shavamattwa mbee yaany, vamangyi yewo vavii va Vaamori vakasavaa, nta mmulekabana nawo-fo. 13Neeny shamuniinga uruka elu ruu mularundyeu kindo, na miri mulaitanye mukakaafo, mukavelya na ndunda ta misabibu na miseituni mulavinyi-u.

14Kyasia ulaalu runndyeny Nndumi Iruva-te, na nrima umwi na ngoo imwi, mure maruva a wongo deny yoo vande valearunndya kwakulya ya mura na kulya Misri, ulaalu murunndye Nndumi Iruva. 15Kwakooya mwasukyo ni irundya Nndumi Iruva amben inu yeto mukunndye indundya, kwakooya ni maruva alya vande vany valearunndya kwakulya ya mura, ao maruva a Vaamori yewo mukee nawo, Lyo yeny na va-mmba yakwa mmbo lurunndyaa Nndumi Iruva. 16Vana va Israeli vakavia Yosua, Ekyo kiire kwaasha neese ira lularunndya Nndumi Iruva neerunndya maruva engyi. 17Mashika Nndumi Iruva waany mmbwe alelusaamisa aluuta kulya Misri mmba ya ushinga, katana findo finiini fya ngyende lwiilollye, kaveluringa kulya kasa shia ilya luleira kalusongoya efo urukeny lwa vandu efo luleira. 18Nawe Nndumi Iruva koombuta vandu woose va masanga efo luleira, sha Vaamori yewo vakee kunu. Kyasia neese nkuti lurunndye Nndumi Iruva mashika mmbwe muni akee Iruva waany. 19Yosua kavavia, “Mmushidimaa irundya Nndumi Iruva-fo, kimmba we akee Iruva mweele, we ni Iruva nalaishi ungyi, nawe nta nnyamusaryaa elyi mwatira maruva engyi-fo,” 20na kwakooya mwara Nndumi Iruva neerundya maruva engyi, llyo nawe ashemuraa namumamite, lla elyi alemmutanya mesha yoo moose. 21Lyo vandu yewo vakavia Yosua, “Ekyo-fo, nkuti lurundye Nndumi Iruva. 22Yosua kavavia, ‘Ni yeni muveni mwakureekany mukaamba mmbo mukundye irundya Nndumi Iruva.’ Vakaamba, ‘Dede yese mmbo lwakureeka indo.’ 23Yosua kavavia, ‘Kyasia ulaalu maeny-fo maruva yoo a wongo akee kwany, mirima yaany yiindukye kwa Nndumi Iruva, Iruva waany mmbwe muni lushendundyaa na yaaranya unyanga lwakwe’ 24Na vandu vakavia Yosua, ‘Nndumi Iruva, Iruva weeru mmbwe lunrundyaa, na unyanga lwakwe mmbo lushiinndyaa.’” 25Naasa Yosua kavavangisya kyaasen kilya neevakumbura lyingyi mavavaso vekee alya Shekemu.

26Kyasia Yosua kareiya marero yaa moose efo kyitabuny kya uvavaso lwa Iruva. Kawuya keepoo iwe iniini kalyisaleesa-fo yoo sindeny ya nri wa Mwaloni kufii na ando kitara kya irasya Nndumi Iruva. 27Yosua kavavia, “Iwe elyi llya ukureeki kweru, nalyo mmbo lyammiita marero yoo Nndumi Iruva alerera neese. Nalyo mmbo lyivaa ukureeki naambo mulasheera Iruva waany.” 28Eekimaa efyo Yosua kavasama wo nndu keenda kyeny kwakwe.

Ufu lwa Yosua

29Naasa llyo nsero yeu wa Nndumi Iruva we Yosua mwana wa Nuni kafwa, eetiri myaaka iyana na ikumi. 30Vana va Israeli vakamwaara ireminy lyakwe kulya Timnath-sera, kulya urukeny lwa mafumbu lwa Efraimu, mfo taari ya ndoo ya ifumbu lya Gaashi. 31Nawo Israeli mbo valerundya Nndumi Iruva nisha kyeeri kyoose kya Yosua, na kya vamiku yewo veefo kyeeri kya Yosua na yewo veeshi efyo Nndumi Iruva aletannya Israeli.

32Nang'u maffwa yoo a Yosefu alya vana va Israeli valesaamisa vauta Misri vakaarika yoo Shekemu nang'u nng'u alya Yokobo aleura kwa vana va Hamori we ndeye wa Shekemu, kataa fesa iyana, nang'u mmbo kuleva ding'u ngyeeri ya Yosefu. 33Na Elieseri mwana wa Aron nawe kafwa, vakamwaara alya ifumbuny lya mwanaakwe Finehasi aleniingwa kulya urukeny lwa fidooro lwa Efraimu.

Currently Selected:

YOSUA 24: MAS2

Highlight

Compare

Copy