VALETI 1
1
Ngyufyari ta Yuda na Simion vatira Adoni-beseki
1Naasa Yosua eekifwa, vana va Israeli vakavesa Nndumi Iruva, “A ni vakyi vasonngwa mbee indekabana na Vakanaani?” 2Nndumi Iruva kavavia, “Ni Yuda vasonngwaa, Na uruka yelo mmbo shalluvika maakony awo.” 3Naasa Vayuda vakarera na va-Simeon vakavavia, “Sye nndeny lweende loose indekabana na Vakanaani yewo, neewe kwansauwa isonngwa yeenda amwi ando nawe.” Naasa va-Simeon vakeenda nawo 4Vayuda vakarwa nawe Nndumi Iruva kavika Vakanaani na Vaperisi maakony awo vakawaawa vandu fiku ikumi alya Beseki. 5Vakakooya Adonia beseki efo Beseki vakakabana nawe, neekaba Vakanaani na Vaperisi. 6Lyo we Adoni-beseki katurushuka-u karisha, nawo vakanrishya vakammbwara, vakamrumbwa mini miniini ya maako na ya marende. 7Adoni-beseki kaammba, “Vamangyi makumi mfungare valya valerumbuwa mini miniini ya marende na maako mmbo valeva veelya yoo si ya mesa yakwa, na shaasa shiletana yeny niindo da Iruva ashitaa.” Vakamweende na Yerusalemu kashefiiya-fo.
Ufyari lwa Yuda lwavinga Yerusalemu na Hebron
8Naasa Vayuda vakakabana na Yerusalemu, vakawaa vandu veengyi noosu, vakatira muri, vakawaatya muro. 9Numa Vayuda vakasoka naambo vandeka Pana na Vakanaani yewo valekaa urukeny lwa mafumbu na lwa Negebu na Shefela. 10Vakasora na Vakanaani valya vekee Hebron (nto Kiriath-ammba) vakawaa vandu va ngyufyari ta Sheshai na Ahimani na Talmai.
Othinieli Avinga Muri va Debiri
(Yos 15:13-19)
11Numa ya vayo vakasora yewo vekee Debiri, Debiri elyo mbee nto Kiriath-seferi na yuutira, 12Nawe Kalebi kaammba, Yeto ashekaba Kiriath-Seferi na yuutira mmbo nshenniingaa mfu wakwa Aksa nave nka wakwe, 13Nawe Otinieli mwana wa Kenasi, mmbwe n-du wa Kalebi, kautira. Naasa kaniingwa Aksa. 14Naasa eekimaa immbwarya, nka yeto kavia mmi natereve ndeeye irema. Nka yeto keenda asaamyi nshungu, Nawe Kalebi kambesa, “A nkyo-ki kukundye?” 15Nka yeto kaammba, “Shivikya mbora mashika elyi kuleshivika kulya Negebu kasa keveshiniinga na ngyusoka ta mura. Naasa Kalebi kanniinga ngyusoka ta mura ta taari ya ndoo na ya sinde.”
Ivinga lya Ngyufari ta Yuda na Benyaminy
16Naasa va nkwe wa Mose we Mkeni vakasaama vauka efo muriny wa miri ya myaangoshi, ando amwi na vana va Yuda vakandefika kasa ka Yuda kakee taari ya sinde ya Aradi. Nawo vakandekaa na vandu yewo. 17Naasa Vayuda vakaenda na va-Simeon vakandekaba Vakanaani valya valekaa Sefati neemamita muri wawo deny. Muri yeto ni Horma, 18Vayuda vakavinga na Gaza shoose, na Ashikeloni shoose na Ekron shoose. 19Nndumi Iruva kasongoya Vayuda, nawo vakoombuta vandu valya vekee urukeny lwa mafumbu lyo valaidimi yuumbuta valya va kundo kurammbalalyi kimmba we veetiri mitika a minya. 20Naasa vakaniinga Kalebi muri wa Hebron shaasa Mose alevavasya, nawe koombuta-fo vana va vandu va Anaki. 21Lyo wo vana va Benyaminy mmbaleumbuta Vayebusi valya vekee Yerusalemu-fo, nkyo vakaa-fo ando amwi fika inu.
Ngyufari ta Efraim na Manase Tavinga Beteli
22Vana va Yosefu nawo vakeenda indetira Beteli, na Nndumi Iruva kavasongoya. 23Vakaruma-u vandu vandesaiya Beteli. (Muri yeto elyo mbee wevangwaa Lusu). 24Vandu yewo va saa vakalollya nndu eefo eshukaa neefo muriny, vakammbia, “Nkyeloore shia ya yaanga neefo muriny, neese lukutae na mesha.” 25Naasa kawoora. Nawo vakashekaba muri ulya vakawaa vandu, lyo nndu ulya vakanra ando amwi na vandu vakwe. 26Nawe nndu yeto kandesamya urukeny lwa Vahiti, katannyafo muri kauvaanga irina lya vayo Lusu. Llyo irina lyavayo neenu.
Vandu Kulare Veantwa-fo Mmbaisraeli
27Nawo va Manase mmbaleumbuta vandu yewo veekee Betsheani na miriny ya vayo-fo, nta yewo valekaa Taanaki, na Dori na Ibleamu nta Megido-na miri ya vayo-fo, mashika Vakanaani yewo mmbalekunda ira uruka lwawo-fo. 28Llyo kyeeri vana va Israeli valeona kirembo nisha, vakaitikya Vakanaani yewo vavarunndye mashora a finya, valakivaumbute.
29Nawo va ufyari lwa Efraimu mmbaleumbuta Vakanaani valya vekee Geseri-fo, mmbo valeengera ikaa nawo.
30Nta ufyari lwa Sablon mmbaleumbuta vandu va Kitron-fo, nta yewo valekaa Nahalali, Vakanaani yewo vakakaa-fo, vakaitikyo mashora a finya.
31Ufyari lwa Aseri nawo mmbaleumbuta vandu va Aka-fo nta yewo va Sidoni-fo, nta va Alabu nta va Helba nta va Afeka nta yewo va Rehobu-fo. 32Mmbo valekaa na Vakanaani yewo.
33Nalo ufyari lwa Naftali mmbaleumbuta vandu va Bethshewesho nta yewo veekee Betinati-fo, mmbo valekaa na Vakanaani yewo nawo vakavarunndya mashora a finya.
34Llyo Vaamori valeidima ikuna vana va Dani vakanderwa na urukeny lwa mafumbu, vakavaima valakaa efo kurammbalalyi. 35Vaamori yewo vakeengera ikaa yoo ifumbuny lya Heresi na efo Aiyaloni na Shaalbimu, kyeendi lyo vana va Yosefu vakavavinga, neevaitikya vavarunndye mashora. 36Nnyanu wa Vaaamori mmbo ulebookya Akirabimu, uka ando a iwe iniini yeenda na mbee.
Currently Selected:
VALETI 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
