YOSUA 20

Miri ya Veerishiswa

(Mee 35:9-34)

1Naasa Nndumi Iruva karera na Yosua, kammbia, 2Rera na vana va Israeli kuvavie indi, “Kyasia ulaalu vikeny miri yeyo yeerishya shaasa shilevavasya Mose. 3Naambo kwakooya nndu awaa nndu nanderishya-fo, narishe yeto akundye itaiya kiduva.” 4Nndu mmbo asherishya miriny yeyo, nashesalala yoo mwaangony wa muri, navie vamiku va muri ekyo kilenkooya, nawo vamoore ando eekaa efo muriny. 5Na kwakooya yeto akundye itaiya kiduva asha nnyasherambikyoo nndu yeto mwiiwaafo, mashika mmbo alewaa nalatiri nawe kiduva uka elyo. 6Nawe mmbo ashekaa efo muriny yeto kufike nkonu yeto ashesalalaa mbee ya ikwaanu lya vandu woose navere kyeeri nkohani nniini wa kyeeri ekyo ashefwaa, llyo yeto mwiiwaa ashevyoo nawuye na kulya muriny wakwe muni, kyeny kwakwe muni. 7Miri valeisauwa na Kadeshi wa Galilaya na Shekemu ya uruka lwa Efraimu na Kiriat-arba (ao Hebron) wa uruka lwa Yuda. 8Na kulya kwakulya ya Yordan kufii na Yeriko taari ya ngama vakasauwa Berii nato mmuri ukee kasa ka uruka lwa Ruben, na Ramot wa Gileadi urukeny lwa Gadi, na Golani ukee Bashani ukee kwa Manase. 9Miri yeyo nya vana va Israeli woose kimaruma kya muny, naambo nndu moose ashewaa nndu alatiri nawe kiduva ao alaishi nanderishya-fo, alasheetaiyo kiduva ni vandu vakwe, kutani yoo ashesaleeswaa ikwaanuny lya vandu woose.

Currently Selected:

YOSUA 20: MAS2

Highlight

Compare

Copy