YOSUA 15
15
Minyanu ya Yuda
1Ufyari lwa Yuda lukakaba kura veelatyaa shaasa vandu vafye, vabookya nnyanu wa Edomu kufike kasa ka Sini taari ya sinde mbai. 2Yeeve lya shumbi nnyo vanyanu wawo wa sinde, 3nkeenda indo fika Akirabimu, fika Sini, ukasoka fika Kadesh-barnea, ukandefika kufii na Hesron na Adari, ukalemia fika Karka. 4Nnyanu ukakooya Amoni yoo usoka kwa Misri fika yeeveny. Nto nnyanu wa Yuda taari ya sinde. 5Na nnyanu wa taari ya ngama ni yeeve lya Shumbi fika mura wa Yordan. Na taari ya ndoo ni pookya yeeveny yoo mura wa Yordan umandi. 6Nato ukandekooya Bet-hogla na taari ya ndoo ukakooya Bet-araba, fika iweny lya Bohan lya vana va Ruben. 7Naasa nnyanu ukandekooya Debiri nka imungo lya Akori, ukarwa na ndoo, kulelatya Gilgali kulerwa na Adumimu, mfo taari ya sinde ya mura, naasa nnyanu yeto ukeenda ikooya ngyusoka ta Enshemeshi fika Enrogeli. 8Naasa nnyanu nkeenda indo fika imungo lya vana va Hinomu yoo kwa Muyebusi taari ya sinde (nto Yerusalemu), naasa nnyanu ukeenda indo ukandekooya imungo lya Hinomu taari ya nkwaany, llyo lyikee mbai ya Varefai taari ya ndoo. 9Numa nnyanu ukavikwa uka efo kidoonony fika usoka lwa Neftoa na fika miri ya ifumbu lya Efroni, nato nnyanu ukavikwa fika Baala (nto Kiriat-yearimu). 10Kuuka yoo Baala nnyanu ukalemya fika taari ya nkwaany ifumbuny lya Yearimu taari ya ndoo (nto Kesaloni), naasa ukasoka na Bet-shemeshi kufii na Timna. 11Nnyaanu ukenda fika Ekroni taari ya nndoo na fika Shikron na mafumbu a Baala, fika Yabneeli, ukandemanda yeeveny. 12Na nnyanu wa taari ya nkwaany mbo ukooye yeeve ilya niini. Niindo ufyari lwa Yuda luleniingwa na minyanu nnyo yeyo.
Kalebi Avinga Hebron na Debiri
(Vat 1:11-15)
13Shaasa Nndumi Iruva alevavasya Yosua, Kalebi mwana wa Yefune mbo aleniingwa yoo nnang'ani ya ufyani lwa Yuda Kiriatarba, Arba yeto mbo ekee ndeye wa Anaki (nto Hebron) 14Nawe Kalebi mmbo aleumbuta-fo vana yewo vararu va Awaki nawo ni Sheshai na Ahimani na Talmai. 15Kuuka yoo kandesora vanduva Debiri. Irina lya Debiri elyo mbee ni Kiriat-seferi. 16Kalebi kaamba, “Nndu ashidimaa ikaba Kiriat-seferi na yuuvinga mbo nsheniingaa Aksa mfu wakwa nave nka wakwe.” 17Naasa Osinieli mwana wa Kenai we mwanamaye wa Kalebi aleenda kaukaba, na llyo kanniingaa mfu wakwe Aksa kava nka wakwe. 18Naasa kyeeri nka yeto aleenda kwa nni, kammbia natereve irema kwa ndeye, nawe kamweengya asaamyi nshungu. Ndeye kambesa, “A nki kyakweende?” 19Nawe Aksa kammbia, Mmbo nkekutereva mbora, mashika elyi kuleshivika taari ya sinde, keveshiniinga na ngyusoka ta mura. Naasa Kalebi kaniinga mfu ngyusoka ta ndoo na sinde
Miri ya Yuda
20Yei nnyo ding'u ya miri ya Ufyari lwa Yuda. 21Miri ya Yuda taari ya Edomu ndoo urukeny lwa Negebu yeekee Kabseeli na Ederi, na Yaguri, 22na Kina na Dimona na Adada; 23na Kedeshi na Hasori na Ithmani, 24na Sifu, na Telemu na Bealoti, 25na Haor-hadata, na Kerioth-heron (ao Haori), 26na Amamu na Shema na Molada, 27na Hasar-gada na Heshmoni na Betpeleti, 28na Hasarshuali na Beersheba, na Biiotia, 29na Baala na Iyimu na Esemu 30na Eltolati na Kesili na Horma, 31na Siklagi na Madmana na Sausana. 32Na Lebaoti na Shilhimu na Aini na Rimoni.
33Na uruka lwa Shefela, Eshtaoli na Sora na Ashana, 34na Sanoa, na Enganimu, na Tapua na Enamu, 35na Yarmut na Adulamu na Soko na Aseka. 36Na Shaarimu na Aditaimu na Gedera na Gederotaimu, miri 14 ando amwi na fyuungo fya vayo.
37Senani na Hadasha, na Migdal-gadi, 38na Dilani na Mispe na Yokteeli, 39na Lakishi na Boskati na Egloni, 40na Kaboni na Lamasi na Kibilishi, 41Gederoti na Bet-dagoni na Naama na Makeda. Nayo mmiri 16 na fyuungo fya vayo.
42Libna, Eteri na Ashani; 43Yifta na Ashna, na Nesibu, 44na Keila, na Aksibu, na Maresha, miri 9 sanda na fyuungo fya 45Ekroni na miri ya vayo na fyuungo fya vayo. 46Uka Ekron kundekooya yeeve ikee taari ya Ashdodi na fyuungo fya vayo.
47Ashdodi na miri ya vayo na fyuungo fya vayo, na Gaza na miri ya vayo na fyuungo fya vayo, na Gaza na miri ya vayo na fyuungo fya vayo, fika mura wa Misri na yeve yeyo niini yoo imandi.
48Na uruka lwa mafumbu, Shanuri na Yatiri na Soko, 49na Dana, na Kiriat-sana (nto Debiri), 50na Anabu na Eshtemaa na Animu. 51Na Goshen na Holoni na Gilo, miri ikumi na umwi valeniingwa na fyuungo fya vayo.
52Arabu na Duma na Eshania, 53na Yanumu, na Bet-tapua, na Afeka, 54na Humta na Kiriat-arba (nto Hebron) na Siori, nnyo miri kyeenda valeniingwa na fyuungo fya vayo.
55Maoni na Karmeli, na Sifu na Yuta, 56na Yereeli na Yokdeamu na Sanoa, 57na Kaini na Gibea na Timna mmiri ikumi sanda na fyungo fya vayo.
58Halhuli na Betsuri na Gedori, 59na Maarat na Betanoti na Eltekoni. Miri irindaru na fyuungo fya vayo.
60Kiriat-baali (irina lyingyi ni Kiriat-yearim) na Raba, miri ivii na fyuungo fya vayo.
61Efo kasa Betaraba, Midini na Sekaka, 62na Nibshani na Muri wa Shumbi na Engedi, miri irindaru ando amwi fyuungo fya vayo.
63Na kya Vayebusi vakee Yerusalemu, wo vana va Yuda valedimi ivafuna-fo, vakakaa-fo ando amwi na vana va Yuda fika inu.
Currently Selected:
YOSUA 15: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
