YOSUA 14

Minyanu ya Taari ya Ngama ya Yordan

1Yeti nto ngyuruka ta vana va Israeli valetira kulya Kanaani, nto Nkohani Elieeri na Yosua wa Nuni, na vasongoru va mmba ta vakuu va vana va Israeli shaasa valeavya vana wa Israeli. 2Nawo mmbo valesora kura tawo, shaasa Nndumi Iruva alevavasya Mose kya ngyufyari yeto kyeenda na kyenga. 3Mose mmbo alemaa iniinga ngyufyari ivii na kyenga waavi lwawo, kwakulya ya Yordan, lyo wo Valevi nalavaniinge kindo. 4Vana va yosefu mmbo vekee ngyufyari ivii, Manase na Efraimu. Valevi mbaleniingwa waavi lwa uruka-fo, kindo valeniingwa ni miri yeekaa, na efo mbai ya miri yeyo kuve kundo kwa yiisa findo fyawo fyeevikyavavewonisafo imutu lyawo. 5Kya efyo fyoose vana va Israeli mmbo valetana shaasa Nndumi Iruva alevavasya Mose.

Kalebi Aniingwa Hebron

6Naasa kyeeri ekyo vana va Yuda vakasheya Yosua, na Kalebi we mwana wa Yefune alya Gilgali, kammbia, kwiishi ninsha kindo Nndumi Iruva alevia Mose we nndu yeto wa Iruva kyakwa yeny na kyafo yewe, kyeeri kilya lwekee alya Kadesh-barnea. 7Mmbo shekee wa myaaka makumi aana, kyeeri nsero wa Nndumi Iruva Mose aleshiruma uka alya Kadesh-barnea indesaiya uruka. Neeny mmbo shilemweengye mbony, shaasa shetiishi. 8Lyo vanavamaye veru valya sheriani nawo vakaawuta mirima ya vandu veru lyo yeny shasora shaasa Nndumi Iruva wakwa alevavasya. 9Naasa Mose kashilyiiya mboo deny, kashivia, Ni dede uruka yelo kusheluvarya mbo lushevaa ding'u yafo yewe, na vana vafo llung'anu, mashika yewe mmbo kuleirikya Nndumi Iruva wafo kisumani. 10Ulaalu Nndumi Iruva anshitiryau na mnu, shaasa aleamba, ando a nyaaka makumi aana na iranu uka Uya alerera irero elyo kwa Mose, kyeeri Israeli vekee kyaarony, na ulaalu mbo shambonau myaaka makumi nyanya na iraanu. 11Neeny mmbo shivetiri finya indo sha kyeeri kilya Mose aleshiruma, shishaangaa neesomuka. 12Ulaalu shakutereva shiniinga ifumbu elyi Nndumi Iruva alerera kya vayo nkonu yeto, mashika naakwa ni yewe kuleeta nkonu ulya shaasa Vaanaki veekai, na shaasa miri yekee miikare na turuve, nawe Nndumi Iruva nkuti nashikaye, neeny shiwoombute vankaa-fo, shaasa Nndumi Iruva aleamba 13Naasa Yosua kambikya mbora, kaniinga Kalebi mwana wa Yefune muri wa Hebron uve ding'u yakwe. 14Hebron ukava wa Kalebi mwana wa Yefune, Mkenai fika inu, mashika llya aleirikya Nndumi Iruva, Iruva wa Israeli nisha. 15Elyo mbe Hebron mmbo weevaangwaa Kiriat-arba, na Arba yeto mbo eeng'anyi vengyi woose, kwa Vaanaki Efo urukeny kukakafo ufoo, fira tikamanda.

Currently Selected:

YOSUA 14: MAS2

Highlight

Compare

Copy