YOSUA 13

Uruka ni Kuti Lutirwa

1Naasa Yosua eekikkwa na mikonu yakwe ikiva miingyi deny, Nndumi Iruva kammbia, “Yewe mmbo kwammikwa na suku tafo tikava shiingyi, na ngyuruka tisaayefo kulore tantirwa tikaveva shiingyi.” 2Ngyuruka tiifoo nto eti, ni ngyuruka toose ta Vafilisti, na Vageshuri woose. 3Uka Shihori, mura yeto ufiitani na Misri kufike nnyanu wa Ekroni taari ya ndoo, llyo uruka yelo luvaangwaa llwa Vakanaani, vamangyi varaanu va Vafilisti, Vagaa na Vaashdodi, na Vaashkeloni, na Vagiti na Vaekroni na Vaafi. 4Taari ya sinde ni uruka lwa Vakanaani, na uruka lwa Maera lwa Vasidoni, kufike Afeka kundekooya nnyanu wa Vaamori, 5na uruka lwa Vagebali na Lebanoni, taari ya ngama, uka Baal-gadi muri akee kwasi ya ifumbu lya Hermon kutane kwafika Hamati, 6na vandu yewo woose vakaa urukeny lwa fidooro lwa Lebanon fika Misrefot maimu, vandu va vayo ni Vasidoni, neewo woose mmbo vashuumbutwaa woose wooke mbee ya vana va Israeli naambo Israeli vaniingwa kuve kwawo shaasa kulevavasyo. 7“Ulaalu ava uruka yelu kwa ngyufyari eti keenda na kyenga kya ufyari lwa Manase yelo kulare lwammaavyo.”

Minyanu Yavikwa Taari ya Ngama ya Yordan

8Ando amwi nawe, ufyari lwa Ruben na Gadi wo valeonisa ding'u yaawo, shaasa Mose alesongwa ivaavya, kulya kwakulya ya Yordan taari ya ngama. 9Uka Aroeri, alya mbai ya imungo lya Arnoni na muri yeto ukee yoo nnang'ani ya imungo, na uruka yelo lwa kyaandaa lwa Medeba fika Diboni, 10na miri myoose ya mangyi Sihoni wa Vaamori ulya eeshilyaa Heshboni fika nnyanuny wa Vaamoni. 11Na Ufyarilwa Gileadi fika nnyanu wa Vageshuri na Vamaaka na ifumbu lya hermon lyoose, na Bashani shoose fika Saleka. 12Uruka loose lwa mangyi Ogu wa Bashani mbwe yeto eeshilyaa Ashitaroti na Edrei (yen mbwe muni aleturushuka iwaawa kwa Varefai), mmbo valya Mose alevakaba kawoombuta deny. 13Lyo vana va Israeli mbalemmbuta Vageshuri nta Vamaaka-fo, wo mmbo valerewa vakakaa urukeny lwa Vaisraeli kufike inu.

14Lyo vana va Levi mbaleniingwa uruka-fo, mashika firaso fya Nndumi Iruva wa Israeli efyo finingyoo neekorwa na muro mfyo ding';u yaawo, shaasa Nnndum Iruva evavasya Mose.

Rubeny Arambikkywa Minyanu Yakwe

15Mose mmbo aleavya ufyari lwa Ruben kiinani na wiingi lwawo. 16Nnyanu wao mmbo wekee Aroeri nnyanu wa imungo lya Arnon na muri yeto ukee yoo nnang'ani ya imungo, na uruka yelo lwa kyaandaa lukee kufii na Medebe. 17Na Heshboni na miri ya vayo myoose ikee efo imungony, na Diboni na ramot-baal na Bet-baal-meoni, 18na Yahasa na Kedemot, na Mefaat, 19na Kiriataimu na Sibna, na Seret-shahari ukee kidoorony kya imungo elyo, 20na Bet-peori na ngyuruka ta yoolokyon lya Pisga na Bet-yeshimot.

21Na miri myoose ya uruka elo lurambalalyi, na uruka loose lwa mangyi Sihoni wa Vaamoni ekeeshillya kulya Heshboni, mbwe ulya alekabwa Mose kasandwa vaniini va Midian, nawo ni Evi na Rekemu na Suri na Huri na Reba mmbo vaniini va Sihoni efo urukeny yelo. 22Na Balaamu mwana wa Beori ekee nsavi vana va Israeli mmbo valembwaa noosu kasandwa na vengyi. 23Nato myanu wa ufyari lwa Ruben wekee mura wa Yordan shaasa valeavyo na miri na myuungo ya vayo.

Minyanu ya Kati

24Mose kaavya na vana va Gadi kiinani na yeekyena lyawo. 25Nnyanu wawo wekee Yazeri ando amwi na miri yeyo ya Gileadi na kyenga kya uruka lwa Vaamoni fika Aroeri kufii na Raba. 26Na kuuka Heshboni fika Ramat-mispe na Betonimu, na kuuka Mahanaimu fika nnyanu wa Debiri. 27Na imungo lya Bet-haramu na Betnimira na Sukot na Safoni ekyo kilesaau kya umangyi lwa Sihoni wa Heshboni, nto mura Yordan na nyanu wa vayo kundekooya yeeve lya Kineret taari ya kavii ya Yordan taari ya ngama. 28Yelo llo waavi lwa Gadi na vandu vawo shaasa valeavyo.

Minyanu ya Manase Taari ya Ngama

29Mose kaavya na kyenga kya ufyari lwa Manase waavi lwawo shaasa vavefye. 30Wo mmbo valebookya Mahanaimu, Bashani, shoose, na uruka loose lwa mangyi Ogu wa Bashani na miri ya Yairi ikee Bashani, myoose mmiri makumi arindaru. 31Na kyenga kya ufyari lwa Gileadi na Ashitoreti na Edrei na miri ya mangyi Ogu wa Bashoni ikava ya vana va Makiri we mwana wa Manase, kiinani na yeekyena lwawo.

32Niindo Mose aleavya vandu yewo waavi yelo kulore amfwa uruka yelo lwa Moabu kwakulya ya Yordan kufi na Yeriko taari ya ngama. 33Lyo ufyari lwa Levi Mose nnyalevaniinga waavi-fo, Nndumi Iruva wa Israeli mmbwe waavi lwawo.

Currently Selected:

YOSUA 13: MAS2

Highlight

Compare

Copy