YOBU 41
41
1A, kushiidimaa iwara ikindo lyilya Lewiyathani na nduvanu
ao ifinga ulumi lwa vayo na kyoove?
2A, kushiidimaa ilyaaka kyoove mmbweeny ya vayo
ao ilyidosha yuundu na kulabu?
3A, mmbo kukusarye lyikuoshoraa kulyiotore?
A, lyirera neewe kwa ufoo.
4A, mmbo liruuyaa umbuya neewe,
kulyialwe nrundi wafo llung'anu?
5A, kutavanaa nalyo sha ndeye,
ao kulyifinge kyoove lyitavane na varundi vafo?
6Mmbo kukusarye vereiya makunga vakapaannya yuura?
A, vandu va mbusha vakara ililyimamanya na ikwaavya?
7A, kushiidimaa idosha shonyi ya vayo na ifumu,
ao nrwe wa vayo na ifumu lya itira makunga?
8Kara kwalyipaana nsi, kulollye kya nkuka;
Nkukaa kuvuiye itana se indo ttwa fo!
9Kilya kuvikye nsia mmbo kivaa ruu,
mashika mmbo ashewaa si kyeeri ashelyilollyaa.
10Nkwiifo nndu moose nkaari akaraa ilyimattwa-fo.
Mmbiiny akara isalala mbee yakwa?
11Mmbi alenshiniinga kyindo, naambo kyive n kuti immbirya?
Kindo kyoose kyikee si ya ngina ni kyakwa.
12Nshiraa shilakuvya kya ikindo yelyo-fo
ao uwe ya finya ta vayo na yuumba lya vayo isha.
13Mmbi ashiidimaa ilyiambwa shonyi ya vayo ya uwe?
Mmbi ashiidimaa idosha kindo kya isiika mbafuny liree?
14Mmbi ashiidimaa iruwa kana kyavayo?
Mayoo avayo taari toose ni kindo kya yeerese!
15Mungo wa vayo mmbo ukeentani ni mabala a ngao
tikutiri amwi sha muuri.
16Wo imwi mmbo ikutiri na ingyi,
nta mumuyo mmbushiidimaa iira nnang'ani ya vayo fo.
17Mmbo akee masande amwi,
nta nkivaa iyaava fo.
18Likawara mmbwa sa mmbo imikaa,
miso a vayo akamika-mika sha elyi mwi ukee vaa.
19Kaniny ka vayo kukakafo fimwii fishaakaa
sise ta muro tikyilyaa poo.
20Mmbweny ta vayo kukaukafo nsu,
sheelyi nungu ikerora;
sheelyi usaka luyaa.
21Mumuyo wa vayo ukaata makaa;
kipalapala kya muro nkyuukaa kaniny kya vayo.
22Singo ya vayo mmbo itiri finya wende,
likafumya andu vandu mmbo vairyaa.
23Nyama ta mwiili wakwe tinangye,
tapu sha minya nta nntiring'inaafo.
24Ngoo ya vayo nyikee shuumu pony sha iwe
shuumu sha iwe lya iseya.
25Lyikakwiipoo vandu vakaari mmbo vatirwaa mmbwerei,
kwa ikapwa lyimwi mmbo vaumaa.
26Nkwiifo usu lushiidimaa ilivika kyaasha fo,
nta ifumu nta mfe fo.
27Kwa vayo minya nsha ire,
na minya ya arera sha umbiiri lupoye.
28Mfe m mbashiidimaa ilyirishisafo;
likaerywa mawe a ngova mmbo lilollyaa nsha mbala.
29Kwakwe rungu nsha kinaana-da,
mmbo lyisekaa likaerywa mafumu meengyi.
30Ndewu ya vayo mmbo ivakkye sheelyi ikeshisikkye na ngyoyo shuumu;
mmbo ikurrwaa na ilanndwa uteri sha isewe lya isa,
31yeeve mmbo likiswakiswaa sha mura ukeetokota,
likakwaalwa liute ifuuru sha shupa ya mafura.
32Kyeeri lyiiraa mmbo lyiree numa ya vayo ngyayo timikamikaa;
ifuuru lyaa mmbo lilollywa yeeveny.
33Ulaniny nkwiifo kindo kilivakkye fo,
nkyuumbe yekyi kilatiri werei.
34Mmbo kyilollya woose vatiri ngoo shuu nshi kyindo fo;
yekyo ni mangyi ya mafisi moose manyaasi.
Currently Selected:
YOBU 41: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
