YOBU 40
40
1Nndumi Iruva kaengera ivia Yobu:
2“A, yewe mwisununda urekwa mmbo kuvakyana na Iruva Muni finya?
Yewe kukellya ulai na yeny Iruva naasa rouwa mbony yeti!”
3Llyo Yobu karouwa Nndumi Iruva:
4Yen nshivaa kindo-fo mmbo shikurouwa-kyi?
Mmbo nkesanda kana kakwa.
5Mmbo shilekara irera na nshireraa lyingyi-fo.
Mmbo shilerera kavii indi nshishyengeraa irera se-fo.
6Llyo Nndumi Iruva kanrouwa auka efo kitita-siny:
7Kufinge sha nndumi.
Shikuvese neewe kushirouwe.
8A, mmbo kukundye dede iyalasha mirumbuye yakwa,
ishilollya shanrenga naambo yewe kulave na teve?
9A, nkutiri finya sha Iruva?
Kushiidimaa idina na unyanga sha lwakwa?
10Naasa, koore iva na utore na uniini,
kwaambike na usuri na utore.
11Pusuya vandu unyafi lwafo uniini;
lola wo atiri ngoo shuu na intuula si.
12Lola vo atiri ngoo shuu na immbundwa,
kuvavare varavi ando vakai.
13Varike woose uteeriny;
finga wo umwi na kifingyo kya ufu.
14Llyo shikumanyaa,
sheelyi finya yafo kumuni yankuniinga uvingyi.
15Lola ikindo lilya Behemoti,
llya shiliumbye sheelyi shilekuumba yewe.
Yelyo mmbo lilyee mare sha ng'umbe,
16indi mwiiliny lyitiri finya wende,
na ullya lwa ndewuny ya vayo lutiri finya nnu.
17Mmbo lyaalua nkya wa vayo ukava muumu pony sha nri,
miraari ya fisouwa fya vayo ikafumyo ando amwi.
18Mafua a vayo m marere a arera,
fyungo fya vayo n sha mabau a minya.
19Elyo n lya mbee lya wende nnang'ani ya fyuumbe fyakwa!
N nyeny Muumbi wa vayo shishiidimaa ilyivinga.
20Fidoorony kundo mafisi moose a ngoroshony atavanaa
nnyautaa shoonga ta vayo.
21Mmbo akulalyaa si ya ngorosho ta miinga,
na ikusuruma masuny maruveny.
22Mmbo akusurumaa firisheny fya miinga
na miri imyaa mbai ya mura.
23Mura ukasoka n naereaa-fo,
llyeereyaa naakwa mura wa Yordan ukasoka ukafika kaniny-fo
24Mmbi ashiidimaa ilifinga miso na ilyiwara mfungwa?
Mmbi ashiidimaa ilidosha mmbwa ao ilitira na nreiyo.
Currently Selected:
YOBU 40: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
