YOBU 39
39
1A, kwiishi mburu ta mafumbuu ni indii tifyaa,
ao kulenlollya kinamburi kiifyaa?
2A, kwiishi mmbo kiipoo urio kyeeri kifye inda,
ao nkonu muni wa ifyaa kuwiishi?
3Kwiishi kyeeri va kuinyikaa vakafyaa,
kyeeri kya ifyaa vana va vayo?
4Vana va vayo mmbo vawonaa finya,
vakang'annya efo kweni kasa,
numa vakara va maye vakaenda kyawo.
5Mmbi ereya itiko ulekye?
Mmbi alevalotora?
6Yeny mmbo sheaniinga kasa koomu kave ando avayo ekaa,
kasa katiri mmbala kave ando a vayo ekaa
7Mmbo akaa kwaasha na fyoorongye fya miri,
nyeetaa kyorongye kya imwitika fo.
8Mmbo arwarwa fidoorony iruya-fo mare,
na kindo ekyo kyoose kivisi.
9A, mboo ishiirikkyaa ikurundya?
Ao ndesa, ishirikkya ilale muriny wafo?
10A, kushiidimaa iavika mboo na kyoove iremi nnda
ao iomwi ikumbi lyerema?
11A, kuvikaa nsia kimmba itiri finya shiingyi
narunde mashora afo moomu?
12A, mmbo kuvikkye nsia mboo ikwilulye fimu fyafo,
na yeende ando a ikappya?
13Nyaa mmbo ikakapaa maaru a vayo na ukushobi,
indi nnyishiidimaa irumbuka sha imutony fo.
14Nyaa nyiree mabore a vayo
uteriny naambo awonise ngumyyo nsangeny;
15kya indi nyiishi sheelyi ashiidimaa ivarywa,
ao iparwa ni ifisi lya ngoroshony-fo.
16Nyaa mmbo itannyaa vana va vayo u riiti sheelyi nshi va vayo fo;
naakwa ishora lya vayo likalyamarika nnyisaraa fo;
17Mashika mmbo sheyaalua irekkywa urango lwa vayo
nta nshiininga kyenga kyoose kya urango fo.
18Indi ikampooka irisha,
mmbo isekaa frasi na mwisaama frasi.
19A, Yobu nnyewe kuniingye frasi finya?
Kwativika mafwaa maasha singony?
20A, nyewe kwaalwa frasi ikillye sha nre?
Unyanga lwa vayo n lwa wende!
21Nyitukulaatukula sumbai kwa waafu;
nyirishaa ngapanu na finya ta vayo shoose.
22Frasi mmbo isekaa werei, na nnyereswaa fo;
nta usu lluiviraa numa fo.
23Fisha vesaama veepoo,
mmbo fikukakapaa fikaona na ivarama mwiny.
24Frasi tikaengera yenda na mbee,
tiireremaa na unyaasi;
tarumbeta iranda lyikakapwa yo nnyisalalaa-fo.
25Vo kyeeri wombe lukapwaa yo nyuutaa unyanga;
mmbo iitaa kyoona kya fira uka kwaasha,
veutaa mavavaso lwa unyanga uniini.
26A, uwiri mmbo lukuloshye kwafo irumbuka,
na iorwa maru a vayo na taari ya sinde?
27A, ngoru mmbo irumbukaa uwe na ivavaso lyafo,
na ivika kifuri kya vayo uwe ya kidooro?
28Ngoru mmbo ivikaa ando a vayo ekaa masimambeny maasha,
na mirwe myaasha ya masimamba nnyo mbanga ya vayo.
29Kuuka yefo ikalaaya shoonga teelya,
miso a vayo akalollya ekee kwaasha.
30Maana a vayo akaonga samu,
ando n nying'a ukai mmbu ngoru ikai.
Currently Selected:
YOBU 39: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
