YOBU 38
38
Iruva Arouwa Yobu
1Llo Nndumi Iruva karouwa Yobu kuuka iruve-u:
2“Mmbi yewe kuketatala makusaro akwa
na marero alatiri urango?
3Kufinge sha nndumi,
shikuvesaa na yewe kushirouwe.”
4Nkwi kwekai llya shevika nsuka wa ulana?
Shivya kwakooya kutiri urango.
5Mmbi evika fyeeso fya vayo, kwiishi ndesa!
Ao mmbi eara kyoove uwe ya vayo iyeesa?
6A, ngo ta ulana ntikeeshisalese uwe yeekyi,
ao mmbi evika iwe lya uvasha,
7nyinyiri ta ngama kyeeri tekeimba ando amwi,
na vana va Iruva vakarosa ngyunyanga ta ifura?
8Mmbi efinga matundulu a yeeve
kyeeri eomuka na yoona uroony lwa yeeve?
9Nnyeny shesikkya yeeve na mafishi
na ilyiringitya na ireema iniini.
10Shavikkya yeeve nnyanu,
shaisiika na misirya na myoongo,
11shaivia, “Nnyanu wafo nnyaa, n shi mmwasi fo!
Matundulu afo afinya nnyamandaa yaa!”
12Yobu, uka kuonika kulembavasya kukye?
Na itana ikya limanye ando avayo,
13naambo lyiidimi itira ulana mbembe ta vayo
na iumbutya varavi neefo kwaasha?
14Ulana mmbo luinduka na iwonisa fwana sha soori;
sha uteeri lwa yuumba shaasa lushaaluva ni muuri.
15Indi varavi mmbo vashiimwaa sa yaawo,
woko lushorowaa ikapa vandu mmbo lufishwaa.
16A, ndesa kulenfika sokeny ta yeeve?
Ao iruarua ndilliny ya yeeveny?
17A, kulenkoya irrwa myoongo ya ufu;
ao ilollya maboo a kyeny kya ireema iniini?
18A, kwiishi uniini lwa ulana?
Shivia kwakooya kwiishi yefyo fyoose.
19A, kyeny kya sa nkwi kyikai?
Poo kwa ireema nkwi,
20naambo kwiidimi ilirwaa kyeny kwa vayo,
na imanya shia yeenda efo kwa vayo.
21Yewe nkusumani imanya
yewe kulemmaa ikaa na muu myaaka miingyi!
22A, kulemmaanga mbesheny ta laura ya kyaamwi,
ao ilollya mbeshe ta mbwa ya masaawe
23yefyo shisurumyi kimaruma kwa mikonu ya mbwaanu,
mashika a mikonu ya ngapanu ya fira?
24Ni ingai shia ya yeenda ando sa iavyoo,
ao efo kuukaa uraato kwa taari ya ngama lukararatwa ulani?
25Mmbi edesya iruveu shia ya mmbwa?
Mmbi eora ukova shia ya vayo mafishiny
26ikateveta mmbwa ikapwa si kundo kulakaa vandu
na kasa koomu kalaafo nndu,
27naambo iviirye uruka uumu muu
na iekkya iore myooro?
28A, mmbwa itiri ndeeye?
Ao mmbi eira marony a laura?
29A masaawe mmbo aukye ndewuny ya vi?
Mmbi eira laura ya kyaamwi?
30Masaawe mmbo aalukaa akava moomu pony sha iwe,
na kisangu kya yeeve kyikoomaa.
31Lola matorito a nyinyiri:
A, kushiidimaa iavika Kilemya na nse,
ao ielelesa fifingo fya Orioni?
32A, kushiidimaa ishillya nyinyiri kyeeri kya vayo,
ao ishillya dubu inyaasi amwi na vana va vayo?
33A, kwiishi ngyuramba tishillyaa iruveu;
a, kushiidima itivikkya uramba lwa vayo ulaniny?
34A, kushiidimaa irosa unyanga na ivavasa mafishi nakusikkye
na ipusukkywa ni mmbwa?
35A yewe kwa vavasa kyimwi kya ngova kikusheyaa lumike
kwaambe, “Shikee yaa?”
36Mmbi aviaa nansha iishwa lya mura wa Naili
ao alevia woro ya nguku sheelyi mmbwa ikeesha?
37Mmbi atiri urango lwa yeekyena mafishi,
ao iinyika ndiwi ta mura efo iruveu?
38Naambo kiluulyi ulaniny kikutire
na uteeri lukutire luve ibwashi?
39A, kushiidimaa itirya miiso kyeelya
ao iwurisa vana va miiso;
40kyeeri vaovyaa mbangeny ta vayo
ao ilala yoovyeny velaayaa?
41Mmbi aniingaa makukuru shoonga ya vayo,
maana a vayo elyi fikeeshifiirya yeny Iruva,
na irumbuka efo na efo kimaruma kya shaa.
Currently Selected:
YOBU 38: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
