YOBU 37
37
1Kyuuka na yefyo, nrima wakwa mmbo ukeererema,
na ikillya uka ando avayo.
2Arannyiny iruruma lya unyanga lwa Iruva,
na ndiiyo wa unyanga luuka kaniny kyakwe.
3Kalwaalwa lukwaani si ya iruveeu koose,
fimwii fyakwe fikwaanisa taari toose ta ulana.
4Llyo ungyanga lwakwe loonaa,
unyanga lwa Iruva mmbo loonaa kwa utore
na kyeeri yekyo kyoose fimwii fyakwe fikamikamika.
5Iruva mmbo akapaa ukova lwa wende na unyanga lwakwe,
mmbo atanaa findo finiini kulashiidimaa ifimanya.
6Mmbo awia laura ya kyaamwi, “Wa uwe ya uruka!”
Na uwiwita lwa mmbwa, “Kapa kwa finya.”
7Mmbo afingaa mashora a wo nndu;
naambo vandu vamanyi mashora akwe.
8Mafisi a ngoroshon mmbo awuyaa ando a vayo a iovya,
na isaa mbangeny ta vayo.
9Matundulu mmbo aukaa kiryeny kwakwe,
na mbyoo shinyaasi nnyuuka mbesheny yakwe.
10Kwa mumuyo wa Iruva laura ya kyaamwi nnyishaa,
na kisangu kya mura kikauma uviny.
11Iruva mmbo aishuraa ifishi uwiwita uroo;
mafishi akakwaanisa fimwii fyakwe.
12Kwa ivavaso lyakwe fyoose mmbo firungukaa efo na efo,
iinutya wo kindo avavasa,
kitanyike ulaniny lwa fyuumbe.
13Iruva mmbo ainutya a yekyo akunndye ulaniny;
kiwe ni kya iorota vandu,
ao kya iora ikunda lyakwe.
14Kikukooya kuarannyi Yobu;
malallya kwaarannyi ngyende ta Iruva.
15A, kwiishi ngata Iruva aniingyaa mavavaso akwe,
na itana fimwii fya mafishi akwe avarami?
16A, kwishi shaasa mafishi akaa nginii-u?
Mmbu mashora a Iruva a ngyende ta ulya akee nsongoru wa umanyo!
17Yewe nkulollye mmbo nkuree soori ta nrikye nnu,
kyeeri uraalo lwa mbyoo lwawoya uruka.
18A, kushiidimaa, yaala ng'ina sha we
tive shuumu sha kilola kya arera?
19Luloshe kindo luviaa Iruva;
mashika marero eru nnyakeemanyika-fo llukee ireminy.
20A, mmbi akaraa imbia, Shikundye irera neewe?
Mmbi ashaamba awoni renga?
21Paripari nndu nnashiidimaa ilolya fo:
Mwi wansurumwa numa ya mafishi,
na uraato lwammayya ngina!
22Mmbaramu nsha wallollyo taari ya ndoo;
Iruva mmbo arungukkyo ni nnduma wa yerese.
23Iruva muni finya alavaa ifikkywa ni nndu,
widimi na waarya lwakwe mmbo luuke uniini,
mmbo eeshwe usaari nta nnyaretaa usumanu ttwa-fo
24Kwa yekyo vandu woose mmbo vamwereyaa;
we nnating'waa nyi nndu moose atiri ngoo shuu-fo.
Currently Selected:
YOBU 37: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
