YOBU 36
36
1Llyo Elihu kaengera irera:
2Shisisirya kinnyo, shikooraa kindo;
Mashika shitiri kya irera ando a Iruva.
3Mmbo shisheendee urango lwakwa usha uka kwaasha deny,
na iyoora sheelyi Muumbi wakwa ni nsaari.
4Ni dede marero akwa nshi a wongo-fo;
Mwiitira kiloshyo kya dede mmbo akee yaa amwi neewe.
5Arannya Iruva ni muni finya
nta n nelaa nndu moose-fo;
wiidimi lwa urango lwakwe ni uniini nnu!
6Nnyaree varavi vaengere ikaa na muu-fo;
kya indi mmbo aniinga velammyo usumanu lwawo.
7N naree naleringa vandu vasaari-fo;
mmbo avavikaa fitiminy fya ushilyi,
vakashillya na iva na usuri.
8Indi kwakooya vandu vakee vafinge mise;
vakavarwa fyooveny fya ilyiswa ukiva,
9Iruva mmbo avaoraa mashora awo maravi,
na sheelyi wo ni vandu vatiri ngoo shuu.
10Kavarrwa maarwi vaite ngyufundo,
na ivavavasa vawu-ye vare uravi lwawo.
11Wakaindya Iruva na inrundya,
mmbo vavesyoo mikonu yawo myoose,
myaaka yawo myoose ikava ya ifura.
12Indi vakara valamwiirikya, mmbo avamamita na usu,
na ifwa kya itura urango.
13Valakunndye iindya Iruva mmbo vakundaa isswa,
mmbamfuuyaa veeruyaa ngaya kyeeri avafotaa-fo.
14Mmbo vafwee vekee vana vakoo,
muu wawo ukasia sha wa vatuusi.
15Indi Iruva mmbo akiraa vafwafwa kwa ufwafwa lwawo
kya ufwafwa lwavo kavatarambwa miso.
16Iruva mmbo ekoommwa kakuuta ukiveny,
kakuvika ando kutiri mwaanya kulatiri ukiva,
na meseny afo kakuvikyau findo fivandye.
17Indi ulaalu kwanrumbuywa sha nravi,
mirumbuye ya usumanu yankuwoya.
18Kwiise iroywa n ngoo ilasheekuteva kuing'ashe,
ao uniini lwa masaa a iwouwa lukurete.
19A, kiiyo kyafo kivaa ikuuta ukiveny,
ao finya tafo shoose tikwekkyaa?
20Kulalange kio kishe,
yelyo vandu vautwaa yoo vekai.
21Kwiise! Kulalatye uravi
mashika mmbo kulewonisyo ukiva kukkye uravi.
22Kummbwa uniini na wiidimi lwa Iruva mmbi alemmidima ikulosha kindo?
23Mmbiny ashiidimaa insawuya shia yakwe,
ao ashiidimaa imbya, “Kwa nrenga?”
24Kularekkyo irumisha mashora akwe;
yoo vandu valeakappya kyorongye.
25Vandu woose mmbo valelollya findo Iruva aletana;
nndu wa vandu kaalollya uka kwaasha.
26Iruva ni nniini nnu nta llushiidimaa immanya-fo;
fyeeri fya muu wakwe filavaa isavaiya.
27We mmbo aomuyaa mura wa yeeve na kwakwe,
na efo ituuny katana marony a mmbwa.
28Kaallwa mafishi aende mmbwa,
ikanisa mamwiingyi va vandu.
29Mmbi eshi ngata mafishi akwaalaa,
ao ukova na iruruma uwe ya ngina?
30We mmbo akee-yaala ngesa yakwe nginii-u,
na isikkya uroo lwa Yeeve.
31Kwa mmbwa mmbo aniinga vandu
na ivaniinga shoonga kwa wiingyi.
32Mmbo atiri fimwii na maako akwe,
kwa numa kalekeya iruruma
33Ukova mmbo luambaa isha lya Iruva,
naakwaa mmafishi mmbo amanyaa sheelyi akeesha.
Currently Selected:
YOBU 36: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
