YOBU 35
35
1Llyo Elihu kaengera irera:
2“A Yobu mmbo kulollye mbony yei ni usumanu
na ikusara kilasha na Iruva
3kwavesa: ‘Mbusha kyi shambona
kwakooya kulaore shiletana ulyamari?
Shawona iviiri mmwasi ya elyi kulaore shetanaa ulyamari?’
4Yeny shikurouwaa yewe,
na mbuya tafo da.
5A nkye lola iruvee-u!
Lola mafishi akee uwe ngota yewe!
6Andesa kwatana ulyamari, Iruva mmbwe kukemuuta usuro?
Na kwa engera irenga nkukusarye nkukeimbavisa?
7A kwakooya kukee nsaari, a nkukeniinga mbusha
ao we nkyoki akeewonisa kwafo?
8Uravi lwafo mmbo lwataraa vandu vengyi sheewe,
usha lwafo mmbo lusheekya nndu urooye wafo.”
9Kimaruma kya ilamya yiingyi vandu mmbo vaiyaa,
vakatereva ngaya kimaruma kya ngapo ta vaafinya.
10Indi nkwiifo mwiamba, “Nkwi Iruva akai, muumbi wakwa,
mwishaalua shive ntakusu kyio,
11Akee luniinga urango ngota mafisi,
na ilualwa luve na urango usha ngota ndeye!”
12Vandu yewo mmbo vaterevaa ngaya indi Iruva n navarouwa fo,
kimaruma kya ukushobi lwa vandu varavi.
13N dede Iruva nnarannyaa kiiyo kya ruu fo;
Iruva muni finya nnasaraa kiiyo yekyo fo.
14Mmbo akurouwa inda
neewe nkwambaa nkunlollye-fo
na mwaandu wafo mmbo ukee mbee yakwe
neewe mmbo kukee mmbereya!
15Ulaalu, kimmba Iruva akesiika unyafi lwakwe,
nta kulaore akusara irenga lya vandu,
16Yobu mmbo kukeetarammbwa kana irera marero a ruu,
Nkukee yengera marero kuleefo urango.
Currently Selected:
YOBU 35: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
