YOBU 32
32
Marero a Elihu
1Naasa vandu yewo vararu: Elifasi, Bildadi na Sofari vakara irouwa Yobu kimmba alekulollya sheelyi atiri usumanu. 2Llyo Elihu mwana wa Barakeli, wa ufyari lwa Busi wa mmba ya Rama karoywa ni unyafi. Mmbo erooywa ni unfyafi kimaruma kya Yobu nyellyi Yobu mmbo ekulollyany akee nsaari ngota Iruva. 3Lyingyi karoywa ni unyafi kimaruma kya vambuya vararu va Yobu kimaruma valetura kya ivia Yobu na kwa yekyo kikaora sheelyi Iruva mmbwe alerenga. 4Elihu mmbo alemalallya sau kyeeri vamiku yewo vekee rera na Yobu kimmba we ekee mwana nkoo munnyo ngota wo. 5Indi kyeeri alelollya vandu yewo vararu vanlemwa irouwa Yobu karoywa nnu nngoo.
6Naasa Elihu mwana wa Barakeli wa ufyari lwa Busi kapooka irera:
Yeny m mwana nkoo, yeni mbakuu mmwaasi;
kwa yekyo mmbo shileiryaa imuvya makusaro akwa.
7Shaamba nriminy wakwa, “Ra vandu vatiri mikonu miingyi varere,
vatiri mikonu miingyi valoshe urango usha.”
8Indi mumuyo eto ukee nnang'ani ya nndu,
mumuyo eto wa Iruva muni finya,
nto uniingaa nndu wiidimi lwa imanya.
9Nshi kuti kuve mmiku llyo kuvaa na urango usha-fo
nta vamiku nshi-wo-nsi vakwaani imanya kindo kikee kya usumanu-fo,
10kwa yekyo shaamba, “Shyaa rannyiny,
shaambe makusaro akwa.”
11Naasa yeny mmbo shilevera yekyo mukundye irera,
shaarannya mirerye yaany ya urango usha,
kyeeri mwekeruuya fya irera.
12Shilemwaarannya na nshusshwa deny,
indi n kwiifo nta umwi waany aleidima ivinga Yobu fo;
woose mmbo mulelemwa irouwa marero akwe.
13Kwiiseny mulasheamba, “Ulaalu lwam mbona urango usha.
Ammbingaa ni Iruva, nshi nndu wa vandu fo.”
14Marero a Yobu n nyekee kimaruma kyakwa fo,
kwa yekyo nshinrouwaa sheelyi yeni mwekenrouwa fo.
15Yeni mwamising'ang'a; mwanlemwa,
yeni mmutiri kya irera mmwasi fo.
16Ndesa shavera da kimmba mulakee rera,
kimaruma mmukee sau mularowaa kyindo mwaasi?
17Yeny nshuuta kirouwo kyakwa;
yeny shishuuta makusaro akwa.
18Shitiri marero meengyi deny,
nrima wakwa ukeshikuna irera.
19Nrima wakwa wamisshwa sha mfinyo ukee nsirye
sha nakori ya mfinyo mwiiya ikee kufii iriike.
20Nkuti shirere naambo shiwoni yaanguywa;
kishikooye shitarammbwe kana shirouwe.
21Nshikunndyaa nndu-fo
nta irera marero a ilelemba nndu-fo,
22mashika yeny nshishi ilelemba nndu-fo,
kulaore ni indo, Muumbi wakwa mmbo eshimamitaa.
Currently Selected:
YOBU 32: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
