YOBU 31
31
1Shankufinga yeny shimuni,
Miso akwa nyelola mwana wa kyika kwa lango?
2Ao ndesa n kyokyi shivereye kyuuka kwa Iruva akee uwe?
Iruva muni finya nkyokyi ashideesye?
3A ngatara ntiwoyaa vandu varavi
Na urumato valya vetana makasha?
4Ndesa Iruva n neeshi shya takwa
Na imanya myeengye yakwa myoose?
5Kwa kooya shilekaa na muu shilalyaa wongo
Kwakooya shilelava ilemba vandu,
6Iruva nasheese efo meseny a yeesa a usumanu,
Nawe mmbo alollyaa sheelyi nshirenngya-fo.
7Kwa kooya marende akwa arekkye
Nrima wakwa ukalatya lango ta miso akwa,
Kwa kooya maako akwa atefussywa ni ulyamari,
8Nrikye wakwa uliwe ni nndu ungyi,
Fimu fyakwa fiiluwa nndeny
9Kwakooya nrima wakwa velanga nka va nndu,
kwakooya shilevallya mwangony kwa nndu wa nnyanu,
10naasa nka wakwa nakorye mmi ungyi,
na womi vengyi vakee nawe.
11Kindo yekyo ni uravi ukasha,
uravi elo nkuti mwirumbwa mwaandu naumisye mwitana indo.
12Urekwa lywakwa mmbo lywevaa sha muro,
wa imamita na irumata,
na ikora fimu fyakwa fyoose.
13Kwakooya shilelema mwaandu wa ishinga lwakwa,
lya womi ao lya kyika,
kyeeri valeshengye mwaandu wawo.
14Nkyoki shitanaa Iruva kanshikulumba?
A ndesa nshirouwaa kyi?
15Mashika Iruva mmbwe ashuumbye yeny na ishinga lyakwa;
We mmbwe aluumbye yese loose.
16A, mmbo shilekooya iima ngwera kindo kintinnyi
Ao iallwa vaka va dingu vakivika nsia kya ruu?
17A, shilenlya shoonga yakwa shimuni,
Kulaore shareeya vana va ngwera nawo vawoni kindo?
18Oode! Uka ukoo lwakwa mmbo shileva mwivalela,
Uka shekee mwana mmbo shilesongoya vaka va dingu.
19Ndesa shilenlola nndu efwaa atura soori,
Ao ngwera alatiri soori yeeraa,
20kulaore shanninga nrikye na soori ta mafwaa a moonri akwa
Nawe kashikundya mbora ta kyaanu kya nrima?
21Kwakooya shilemmwoorrwa woko mwaanduny mbee ya mwana wa ngwera
Naambo mwirummbwa mwaandu ashikunndye,
22naasa yeeva lyakwa lyiiluke
Woko lwako lumushuke lukuukkye-u.
23Mashika ngatara yuukkye kwa Iruva ni kindo kya yeerese kwakwa;
Yeny nshishiidimaa isisirya unini lwakwa-fo.
24A ndesa nshivikkye nsia saabuny
Ao shilemivia saabu shisha, “Yewe ni unapwe lwakwa.”
25A mmbo shilenkooya ikushela kya wiingyi lwa usimba lwakwa,
Ao ikushobya umasi lwa maako akwa?
26Kwa kooya shilellola mwi wivaa,
Na mwiiri ushiiraa usheny lwa vayo,
27Na nrima wakwa ukaeswa ifiindya,
Na yeny shamiminda maako akwa kwa wiindi lwa vayo,
28Elo nalo mmbo lwevaa uravi lwa utuuruwa mwirummbwa mwaandu
Mashika mmbo shevaa nkunang'ari mbee ya Iruva akee uwe.
29Ao ndesa shilenfuria irumaka lya nkiduva akwa,
Ao shafura elyi awonisa renga?
30Ode! Nshilera kana kyakwa kanrera kikasha-fo
Kwa idenga naambo nafwe.
31Varundi vakwa woose mmbo vakeamba paa
Wo nndu muny alewarya kyeny kwakwa.
32Nndu wa kyaaro n nalelala poo ya mmba yakwa fo,
Mmbo shileruya nndu ashiiraa shia mmba.
33A ndesa shilelema efyo shilerenga sha vengyi?
A shilelema ikurya ulyamari lwakwa?
34N shileereya isalala mbee ya mamwiingyi wa vandu
Nta isya do ao ikuraya mmba
Vai kwa iereya iereswa nfiila fyawo.
35Ngoma kwakooya eiyo nndu wa ishiaranya:
Mmbo shishiidimaa ivikau woko lwakwa kwa wo kindo shishaambaa.
A nke Iruva muni finya ashirouwe!
Ngoma efyo vakiduva vakwa vakeshikumba nafyo fyeriywaa!
36Mmbo sheraa na ukushobi myeveny akwa
Na irungutya nrweny sha ureto.
37Mmbo sheekennya Iruva wo kindo shiletana,
Mmbo shemwengyaa sha nsero wa mangyi.
38Kwa kooya shiivye uteri elo shikee rema
Shatereva mifongo yakwe iiye,
39Kwa iwonisa fimu fya vayo kulaore shataya.
Na iva kiteve kya ufu lwa veni
40naasa miinga imye fo ando a nganu
Na mambekye ando a umbi.
Umando lwa marero a Yobu
Currently Selected:
YOBU 31: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
