YOBU 30
30
1Kya indi ulaalu vandu mmbo vakeshiinyala;
Lyingyi vandu vadu vakwa,
Vandu yewo shelollyaa va ndeye vawo
Mmbavaafo nta ilola fite fyakwa fyeringa moonri.
2M mbusha kyi shewona maakony awo,
Vandu finya tawo tembasiiya?
3Uturiny na shaany shiniini,
Vakaruyaruya kya irafuna kasa koomu
Kundo kwa ruu kulatiri shoonga.
4Mmbo veyaya myooro kasa na mare ngoroshony wakalya,
Vakalya naakwa mirari ya miri.
5Vakaantywa kwaasha na vandu,
Vandu vakavakapya kyoorongye sha manyinyi.
6Kyikava nkuti varuuye ikkya mbangeny,
Efyo marininy na miambeny.
7Efyo ngoroshony vakaiya sha mafisi,
Vakakusangirya amwi si ya rafi.
8Mmbo vekee varung'ani na masembo
Yewo kyeva kuti vaumbutwa urukeny na mbiiri.
9Na ulaalu mmbo vakeeshiimbya fiimbo fya ishiinyala,
Shammba kindo kya iipala kwawo.
10Mmbo vakeeshiswa na ishiiyama;
Vakashilollya vakashiesellye minyiiri.
11Kimmba Iruva ashinyiisa na ishisuta
Mmbo vammba valeke ishitannya wo kindo vakunda.
12Kitung'ati kya vandu kikakupoo ishikumba,
Veeruuya ishituula na ishireiya.
Vakashiwoya naambo shimamike.
13Vandu yewo vakamannya shia yakwa
Vakaitika shiwoni renga,
Nta kwiifo nndu wa ivakyeemya-fo.
14Vakasha sha ando atiri yaanga iniini,
Vakammaa ishiwoya vakarisha na mbee.
15Shawoywa n werei uniini
Usuri lwakwa lukamaya sha uraato,
Na ivesyo lyakwa sha ifishi.
16Ulaalu n shitiri nta finya muuny wakwa-fo;
Mikonu ya ukiva yanshiwoya.
17Kio maffwa akwa moose mmbo avavaa,
Mavavyo akashirafuna nta nnyakefwaa-fo!
18Iruva anshitummwa na soori takwa,
Kashitira tabu sha ukova lwa soori takwa.
19Iruva kasheera ipwashiny;
Shava sha ifu na kiluulyi.
20Shakufuuya, nta nkukeshyarannya-fo,
Shasalala itereva nta nkuke shaarannya-fo.
21Kwammaluka iva nriiti kwakwa,
Kwashilisa ukiva na woko lwafo lwa finya,
22kwasheera uraatony na ishivivita;
Kwasheerera kunu na kunu matunduluny manyaasi.
23Yee, shiishi kushirwaa ufuny dwa,
Ando woose vakee na muu vashekwaananyaa.
24A nndu kammboywa ngatara ta umamiti ashoorrwaa se maako?
A, nndu ekee ukiveny aterevaa se weekyi?
25A n shilevaiiya valya vekee ukiveny?
A n shilevavio mmuu kya ngwera?
26Indi kyeeri shekevereya mesha, makasha akashikooya,
Shevereya sa, ireema likasha.
27Ngoo yakwa ikesavaa nta nyikee malalya ttwa-fo;
Mikonu ya iliswa ukiva yanshikulumba.
28Mmbo shikeiraira shiifwa, kwakwa nkwiifo mwi fo.
Shike salala mbateny shiterevaa weekyi.
29Kwekyo shammba mwana maye wa iparwe
Yeny na nyaa nkwiifo kilasha-fo.
30Shonyi yakwa yambaluka
Maffwa akwa mmbo akeyaaka muro ni nrike nniini.
31Kinanda kyakwa kyamba kya ukiva
Iranda lyakwa likava lya kiiyo.
Currently Selected:
YOBU 30: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
