YOBU 29
29
Marero a Yobu a Ifurummya
1Naasa Yobu keengera irera kaamba:
2Ankyema shekee sha llya kasha,
Kyeeri kilya Iruva eeshiringaa;
3Kyeeri taa yakwa yeshimikyaa nrweny,
Na kwa sa yeyo yakwe sheenda ireminy.
4Kyeeri yekyo nshefikkya ukuuny lwakwa,
Kyeeri umbuya lwa Iruva lwekee kyeny kwakwa.
5Iruva muni finya ekee ando amwi
Na vana vakwa veshiringitye.
6Kyeeri yekyo nshekyeleya ummasiny,
Myaamba yesheritya ngyusoka ta mafura!
7Llyo shekwanannyaa na vamiku mwangony wa muri
Na ikaa ando akwa ikwaanuuny.
8Vakoo mmbo veshilollyaa vakasalala mbai,
Na vamiku vakaoroka shumu kwa wiindi.
9Vanini veeshilollyaa vakamalallya
Vakavika maako awo kaniny naambo vandu vamalalye sau.
10Ngyunyanga ta vasuri ntemalalyiswaa,
Na kana fyawo fikaraywa.
11Wo nndu eitaa mbony takwa kashikundya mbora
Na kanshilolya, kairikya mbony yeto sheelyi n-ta dede;
12Nshekiraa vaturi veshiiyaa ukiva,
Na vana va ngwera valatiri nndu wa ivatarama.
13Yewo veekekufii na imamika mmbo veshikunndyaa mbora,
Mmbo shealwa vaka va dingu vakaiimba kwa ifura miriminy yaawo.
14Usumanu llo lwekee isara lyakwa;
Itana usumanu mfyo fyekee isara lyakwa.
15Kwa vafu miso shawa miso a ivoora shia;
Kwa fitongororo shava marende awo.
16Kwa ngwera shava ndeye awo,
Shakuitika ikureekkya usumanu lwa vandu shilaveishi.
17Shefisha finya ta vandu varavi,
Shavateva vaotore mifungwa vembakamara.
18Lyo shakusara mmbo shifiiyaa kifuriny kyakwa shimalallyi;
Mikonu ya muu wakwa mmbo ushiingifwaa sha nsanga.
19Yeny sha nri utambarye mirari ya vayo mureny,
Laura ya kyo ikafurisa maramba a vayo.
20Shawona usuri uiya wo nkonu,
Na finya takwa tikava sha mfe na ura.
21Kyeeri yekyo vandu mmbo veshiveraa na ishaarannya,
Vakamalallya sau vaarannyi kindo shivaviaa.
22Elyi shemaa irera mbewona kya yengerau fo,
Marero akwa akavanong'ovia sha marony a mmbwa.
23Vandu mmbo veshiveraa sheelyi vaveraa mmbwa,
Vakava sha vandu vaveraa kyeeri kya mateeri.
24Kyeeri veutapa mmbo shevaoraa kisangu kya ifura,
Ikyela lya kisangu kyakwa vakakunanavia nakyo.
25Sheiraa mbee shavasongoya shavaora shia;
Shava kwawo sha mangyi nnang'ani ya matorito;
Sha nndu aviiryaa muu sha vandu vefiiywa.
Currently Selected:
YOBU 29: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
