YOBU 28
28
Nnduma wa kirumi kya urango usha
1N dede kwiifo kundo fesa tisumwaa,
Na ando saabu isanngywaa.
2Vandu mmbo vasumaa minya yuuka uteriny,
Vakaeta minya ya arera uka maweny a wuuru uniini.
3Veesuma firori mmbo veendee taa ireeminy,
Vakasununda waasha lwa yeenda-si
Na isuma mawe a wuuru uniini efo ireeminy lya makimima.
4Nndu wa vandu mmbo asumaa marina kwaasha na ando vandu vakaa,
kwaasha na vandu ando alafikwaa,
Veesuma mawe yoo mmbo vakununutaa na fyoove.
5Uka uteeriny mfo shoonga yuuka,
Indi si ya vayo wo kindo kiraratwaa mmuro.
6Efo maweny a vayo mfo kundo findo fya fwana ya kilaamwi fikai
na uteeri lwa vayo lutiri funga ya saabu.
7Shia ya yeenda efo firoriny efyo
Nkwiifo ndeye ilyee nyama iishifofo;
Nta iriso lya ngoru llilellyafo.
8Mafisi eenda kwa ukushombi n nalavaria fo-fo,
Nta miiso ntilemiira fo-fo.
9Vandu mmbo vasumaa masimamba moomu deny,
Vakasuma mafumbu na iyasambuya kwaasha.
10Vakasuma mifongo nnang'ani ya mawe akwaalye si,
Na iriso lyakwe likalollya findo fya uruu.
11Vakafindikira soka tilaeke,
Na isukkua findo fisurumyi.
12Indi urango usha luwonikaa kwi?
Nkwi kuwonikaa umanyo?
13Nkwiifo nndu eeshi uuru lwa urango usha-fo,
Nta urango usha lluwonikaa urukeny kwa vandu vakee na muu-fo!
14Ndillyi ta mura mmbo tikeamba, “Urango usha llukee kweru-fo.”
Na yeeve likaamba, “Llukee kweru-fo.”
15Urango usha llushiidimaa ivonika kwa saabu-fo,
Nta kwa yeesa fesa shiingyi-fo.
16Nnyivaa yeesa na saabu ya Ofiri-fo
Nta findo fya uuru fya Sardoniki ao fya fwana ya King'arwa-fo,
17Saabu nta kioo m fiinani nalo-fo
Nta nnyivaa ialasha na findo fya uuru fya saabu shisha fo.
18Urango usha mmbo lukee lwa uuru uniini ngota matumbawe na marijani,
Wuru lwa vayo mmbo luilannyi lwa lulu.
19Topasi ya Esopia nnyivaa iinaniswa nayofo
Nta nnyivaa ivikwa uuru lwa saabu shisha-fo.
20Naasa urango usha mmbo luuka kwi?
Nkwi umanyo luwonikaa?
21Llukeusurumi misony a fyuumbe fyoose fikee na muu,
Na ndeye ta ngini-u ntishiidimaa ilulollya-fo.
22Naakwana ni vafu mmbo vakee-yaamba,
“Lwamiita kyorongye kya vayo na maarwi eru.
23Iruva mmbwe eeshi shia ya urango usha,
Eeshi ando luwonikaa.
24Mashika we eeshi fika ufishyony lwa ulana,
Nnyalollyaa wo kindo si ya ngina.
25Kyeeri eeninga uraato uroo lwa vayo,
Na yeesya mira minyanu ya vayo;
26elyi erummbwa mmbwa ikape kwi,
Fimwii na ngova fiire kwi;
27Yoondo nlyo elollya urango usha na ilukapya weele,
Kaluvangisa na iluesa.”
28Naasa Iruva kavia nndu wa vandu:
“Lola! Iindya Nndumi llo urango usha,
Na ikaa kwaasha na uravi llo umanyo.”
Currently Selected:
YOBU 28: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
