YOBU 27
27
1Yobu kaengera irera kaamba:
2“Shakulyisya mboo kwa Iruva akee na muu,
Yeto aleshiuta usumanu lwakwa,
Iruva muni finya aleallwa muu wakwa wiishwe mavavyo!
3Nshalya mboo sheelyi kyeeri ekyi shikeidima yeeng'a,
Mumuyo wa Iruva wiikee nnang'ani yakwa;
4kana kyakwa nkarera wongo ttwa-fo,
Nta ulumi lwakwa irera ulembi-fo.
5Nshishiidima yaamba sheelyi yeni mmbo mukeamba dede ttwa-fo,
Kufike ifwa lyakwa nkeamba nshitiri mbese-fo.
6Mmbo shitira woorotu lwakwa, nta n-shilulekeyaa-fo;
Nnang'ani yakwa n shitiri kya ikuutya uvingo muuny wakwa-fo.
7Ra nkiduva wakwa navake nndu yeto llyang'a,
Yeto akwiipo ishisakira akapwa sha nkasha.
8Nndu nalaindyaa Iruva nkyi avikkye nsia,
Kyeeri Iruva amweraa sakkyeny,
kamwuuta muu wakwe?
9A elyi awaywaa nrenga,
Iruva ashiita kiiyo kyakwe?
10Nravi n nashiidimaa ifura mbee ya Iruva muni finya fo;
Nnyashiidimaa isinda eterevaa Iruva fo.
11Shimuloshaa mirumbuye ya Iruva shaasa ikai,
Nshimusurumaa mialye yakwe Iruva muni finya-fo.
12Indi yeni mwiishi mbony yei nisha nnu!
A ni indany mwarera usembo?
13Yekyi nkyo Iruva avikkye nndu nravi,
Akemwaavye mwilamya ni ekyi:
14Vana vakwe na vakawa veengyi mmbo vawawaa na usu;
ngyeeri takwe mbawonaa shoonga ivafye fo.
15Valya vakkyau mmbo vafwaa na ndwari sheesi,
vaka vawo va dingu nta mmbavaa iiya fo.
16Naakwa asangyiryaa fesa sha kiluulyi,
na soori sha uteri lwa yuumba nungu,
17nasangyirye da, indi mworotu mmbwe ashetiraa,
na fesa takwe mmbo vakwaavyaa vandu valatiri mbese.
18Mmba itanwaa ni nndu nravi n sha ruu ta mbuu,
n sha itengo lya nringyi nndeny.
19Mmbo andelalaa isimba, indi ni lya ifurumya;
mmbo atarammbwa miso akwe, na usimba lwakwe lulemmaya!
20Weresi lummboyaa sha mura mwiingyi;
kio awoywa nkitita si.
21Urato lwa taari ya ngama lumbivitaa asarumyi;
lumwaiyyaa kwaashaa nauke ando akwe.
22Uraato elo llumboyaa lulatiri ulyilyi;
akuutaa ilurishaa indi nkivaa kya ruu.
23Uraato luntatalaa erishaa,
na insumya uka ando akwe.”
Currently Selected:
YOBU 27: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
