YEREMIA 7
7
Yeremia aamba mbony mmba ya Iruva
1Irero lyilesheya Yeremia lyuuka kwa Nndumi Iruva: 2salala ipoony mmba ya Nndumi Iruva, kwavambisya-u irero kwamba; Aranyiny irero lya Nndumi Iruva, yeni vandu woose va Yuda mwaanga ipoony elyi indeindya Nndumi Iruva. 3Nndumi Iruva wa matorito, Iruva wa Israeli, kurieny kya shia na mitannyi yaany shimuniinga ikaa yaa. 4Mulavike nsia marero yaa a ukunang'ari-fo; Yei ni mmba ya Nndumi, ni mmba ya Nndumi ni mmba ya Nndumi.
5“Kwakooya mwakurya kya dede na nshusshwa; kwakooya murumbuyaa kya usumanu muveni na muveni, 6kwakooya mulalyilyisaa veny, vana va ngwera, vaka va ding'u ao ipusswa samu ya nndu nsumanu yaa na mulalatya maruva engyi efo mmbeny tany.” 7Llyoony shimuraa mukee yaa, urukeny sheniinga vasauwe vany uka kasha. 8Loleny, mmbo mukusirye marero a ukunang'ari alashiidimaa imuwonisya kyindo. 9A mmbo mushiivaa, mmuvaa, mmutuusa na ituuswa, mmulyaa mboo ya ukunangari, mmukorya Baali ubani na ilatya maruva engyi kulaore mweeshi, 10na mushesalala mbee yakwa mmbeny yei ikeevaangwa na irina lyakwa, na yaamba, “llukeevakyire llukeevakyire! Yeengyera itana utefusu yelu”? 11A mmba yei, ikeevaangwa kwa irina lyakwa, nyammaluka nndeshe wa vaala-shia misony any? Loleny yeny shimuni shallollya, ni Nndumi Iruva aamba, mmbo mukusarye mmba yakwa ni kwa vasoki kwa yoovya? Mmbo shilollye efyo mukeetana fyoose. 12Enda ulaalu ando akwa alya kweekee kulya shilo, ando mapookyony shivika irina lyakwa kwandella yekyo shilentannya kyeendwa ni uravi lwa vandu vakwa Israeli. 13Ulaalu, mwantana findo yefi fyoose, Nndumi Iruva aamba, neelyi sherera neeni lyingyi na lyingyi kulaore mweshaarannya, neelyi shemuvaanga kulaore mweerika, 14Kweekyo nshitannya mmba yei ivaangwa na irina lyakwa yeyo muvikkye nsia na ando shemuniinga yeni na vandu vany shaasa shiletannyaa Shilo. 15Neeny shimweere kwaasha shilamulollye, shaasa sheera vana va maaye vany, ngyeeri ya Efreemu.
Ufiri lwa vandu yewo
16Lyo kyafo yewe, Nndumi Iruva kaamba, “Yeremia, kulasheterevya vandu yeva-fo, ao ivalookya, ao ivaterevya nta ishitereva shivalyillye, mashika nshikwarannya-fo. 17A nkulollye-se yekyo vakeetana efo muri va Yuda na Yerusaalemu? 18Vana vadu mmbasanaa ngwi, vande mmbaataa muro vaka vakaookya mikate nka-mangyi va nginii-u na iletya maruva engyi firaso fyeena, kya ishirosya ngoo. 19A ni yeny vakeshiuta usiro? Ni Nndumi Iruva avesa. A shivakuuta usiro na ikweengye sony wo veni? 20Kweekyo Nndumi Iruva: Lola, ngoo na nyashi yakwa nnyipusuywa yaandi, nndu na ifisi, miri ya marema na ndunda ta uteri, nnyikoraa nta nnyirumywaa-fo.”
21Nndumi Iruva wa matorito, Iruva wa Israeli: “Engyerieny firaso fyany fya muro, lyeny miteera. 22Mashika nkonu ulya shewoota urukeny lwa Misri nsherera na vandu vany ao ivavavasa kya firaso fya muro na firaso fya muu. 23Indi lyo ivavaso elyi shevaniinga, ‘Inndyeny unyanga lwakwa na Yeny shivaa Iruva waany neeni muve vandu vakwa, latyeny shia toose shimoora kyive nndumwa kyany.’ 24Lyo mmbeindya nta iloota karwi, indi vakaruya makusaro awo na umbafu lwa mirima, vakawuya numa ando a yeenda mbee. 25Uka nkonu ulya vande vany wooka urukeny lwa Misri fika inu, nshivarumyaa varundi vakwa kuleefo umando, nkonu kwi nkonu, 26indi mmbaleshaaranya-fo ao iloota maarwi, lyo vakanangisa nriya, vakailannya vande vawo ilyamara.
27“Indony, nkushevaviaa marero yaa moose, lyo mmbashekwarannyaa-fo, nkushevavaangaa lyo mmbashiirikaa-fo. 28Na nkushevavyaa, ‘Yelyi llyo isanga lyilya kulare lyileindya unyanga lwa Nndumi Iruva, Iruva waawo, nta iitikya wiikyimbi, udede llulensama kaniny kyawo.’”
Maravi efo imungony lya Hinomu
29Uteny fii tany mukateera kwaasha;
saamiseny kyiiyo uweny ya mafumbu,
mashika yeny Nndumi Iruva shammulema
Yeni muleteveta sharooywa ngoo.
30“Kya elyi vasero va Yuda valeshitana fivishwa, ni Nndumi Iruva aamba; mmbaletana utefusu lwawommbeny ivaangwa na irina lwakwa iitefusa. 31Na valetana ando a uwe kulya Tofeti yefo ulaleny lwa mwana wa Inomu irasya vana vawo va vomi na vakyika; kulaore shilemmbavavasya nta ikusara. 32Kweekyo, loleny, mikonu ikeesha ni Nndumi Iruva aamba, ulakivaangwa Tofeti nta ulale lwa Inomu lyo kuvaangwa ulale lwa ishishya: mashika mmbasherikaa yefo Tofeti, elyi kuleefo ando engyi a irika. 33Na minying'a ya vandu yeva ishevaa shoonga ta ndeye ta nginii-u na mafisi a ngoroshony; nta kulakaa-fo mwiiyanta. 34Llyo nshemandisa seko yefo miriny ya Yuda, shieny ta Yerusalemu, unyanga lwa ifura, unyanga lwa nsero aalyika na lwa mwana mfu aalyikwa; mashika uruka llushaaluka sama.”
The Holy Bible in Kimashami © Bible Society of Tanzania, 2016.