YEREMIA 6
6
Yerusalemu washingillyo ni vakiduva
1Risheny mmukyire muu yeni vandu va Benyaminy, ukeny kunu Yerusalemu! Kapeny iranda kulya Tekoa, mwaate na muro wa wiikimbi kulya Beti-akeeremu; mashika ngapo nnyikeeyaamayya yuuka taari ya ndoo na urumato uniini. 2Mbeu shiiyya na shimamiri nshisheilyamaraa, ni mfu va Sioni. 3Veesi na maronda awo a moonri mmbashemmbinngyaa; mmbashemmanyaa ulale na meema awo, vasheesa findo wo umwi ando akwe. 4Kudeesye inkapa; kutakureny, nndeny lummboye nsanyiny kyere! “Woshiny llweru, mashika nkonu wankyikyina, mashika firishe fya nkwaany nfikeilyaa. 5‘Kutakureny, nndeny luukabe elyi kio, lulyamare mmba takwe ta usuri.’ 6Mashika Nndumi Iruva wa matorito aamba indi, ‘Arambweny miri yakwe songoseny mitaato iringitya Yerusalemu. Yeu ni muri ukee kuti ukapwo, nkwiifo kyindo kuuta ni ilyilyiswa-fo. 7Shaasa kyirori kyiruta mura nsha, ni indo nawe aruta uravi; kyituuru na ulyamaro nfikee nnang'ani yakwa, ndwari na fishavere nfike mbee yakwa mikonu myoose. 8Kwiise, yewe Yerusalemu; nrima wakwa ulasheelakana neewe, shikwaallwe sama uruka lulakaywaa ni vandu.’”
Umbafu lwa Israeli
9Nndumi Iruva muni matorito aamba ule, “Sangyireny sasari ta Israeli sheelyi musangyirya sasari ta nsabibu; sha mwiisangyirya sasari ta nsabibu, iita woko lwaffo lyingyi yefo firambeny.” 10“A nshirera navi, shinrike wiikyimbi wamwaaranyi? Lola mmbafinikkye maarwi, mmbakeyaarannya-fo; irero lya Nndumi Iruva kwawo ni kyindo kya tangalu, mmbalyifuryaa-fo. 11Kweekyo nshiishwe unyafi lwa Nndumi Iruva, nshammayaara ilusiika. ‘Lettya vana vakwe yefo shia na makwaanuny a vana vakoo, mmi na nka veepowa amwi, vamiku na vakuu deny,’
12“Mmba tawo Ntiningywa vengyi, marema na vaka vawo amwi, Mashika mmbo shishooroya woko lwakwa vandu va uruka. Ni Nndumi Iruva aamba. 13Mashika nka n-ndu fika nniini waawo, wo umwi atiri lango ta ilyima na uka nkisuku fika nkohani, wo umwi akee llembi. 14Mmbo vakeevavara fyaasha fya vandu vakwa uwe-uwe, veeshaamba unapwe, unapwe nta kuleefo unapwe. 15A vesukkywa llya velyang'aa? Ode, mmbesukkywa tusu-fo; mmbemanya itirwa sony-fo. Kweekyo mmbawoo sha yewo wawee; shishevakapaa llyo vatuulwaa,” ni Nndumi Iruva aamba.
Israeli alakana na uramba lwa Iruva
16Nndumi Iruva aamba, “Salaleny mbai ya shia, mulole, muvese myeengye ya kasha, kundo iriko isha lyikai; mulyilatye muwonise kyiimuyo kya mirima yaany. Indi vakaamba, ‘Llushiirafo-fo.’ 17Shakuvikkya varingyi, shaamba, ‘Itumuso unyanga lwa iranda!’ Indi mmbakeeyamba, ‘Llushitumuso-fo.’” 18Kweekyo aranyiny, yeni masanga, mumanyi yeni ikwaanu, yekyo kyivakooya. 19Arannya yewe uruka; Lola, shikeyeenge renga vandu yeva, ndunda ta mitannyi yaawo, mashika mmbaleitumuso marero akwa-fo; shaasa kyikwaani na ivavaso lyakwa mmbalelyilema. 20A nkyimaruma-kyi sheengywa ubani luuka Sheba, ao findo fifwaama fyuuka uruka lwa kwaasha, firaso fyaany fyeekora na muro fisumani-fo nta firaso fyaany fya muu nfishisennyi-fo. 21Kweekyo Nndumi Iruva nnyaamba, “Lola, nshishevareiyya iwe lya itumbullwa na lyivatumbullwe, vande na vasero amwi, vaamurasa na vambuya vamamike.”
Isanga lyooka na ndoo
22Nndumi Iruva aamba indi, “lola, isanga lyikeesha lyuuka na ndoo, isanga iniini llyikeituta lyuuka uruka lwa kwaasha deny. 23Mmbariye ura na ifumu ni vambafu, nta mmballyillyaa-fo, na irig'inda lyawo sha lya yeeve; mmbasaamye frasi mmbaree sha ndu asheenda fireny kyilasha kyafo yewe mfu wa Sioni.” 24Lwammiita rumi ya wayo; maako eru akava mareeree, lyammboywa ni fyoova; usu sha lwa nka ashiiraa mwana. 25Muleende mareminy, nta muleere shia; mashika nkiishi arie usu, usau llukee taari toose. 26Yewe mfu va vandu vakwa, raa makunnya, kwalale mafwiny; kapa kyiiyo sha kya mwana va ngitany, kyiiyyo kya uvawisi lwiilannyi mashika mwiilyamara nnyalusheyaa tiny. 27Nshakuvika kuve mfuru na mwiesa nnang'ani ya vandu vakwa naambo kumanye na yeesa shia tawo. 28Woose mmbo vakee valyang'a vakailannya, varingyi; mmbakee arera na minya, woose deny mmbalamyaa. 29Mariko a yeeta minya nnyakeyaaka kyuumu, risasi nnyikeemamitwa ni muro; muro ni waruu-da, mashika veesi mmbakeiyuuka-fo. 30Mmbavaangwa mbulula, mashika Nndumi Iruva ammbalema.
The Holy Bible in Kimashami © Bible Society of Tanzania, 2016.