YEREMIA 5
5
Ulyamari lwa Yerusalemu
1Risheny kunu na kulya yefo shieny ta Yerusalemu, lola na imanya! Sallwa mbata toose kulle kwakooya kuwonisaa-fo nndu umwi atanaa fya usumanu na iruuya udede; naambo shiusarye. 2Naakwa neelyi vaamba, “Shaasa Nndumi iruva eefo na muu, indi mmbalya mboo ya wongo. 3Woi Nndumi Iruva, a miso afo nnyaruuya udede? Mmbo kulevakapa indi mmbalevavywa-fo; mmbo kulevamira indi vakalema ikangaywa. Vakaumisa fisangu sha iwe lya nka-makoti; vakalema ikurya.” 4Naasa shaamba, “Yewo mmbo vakee vaturi nsi, mmbatiri urango-fo; mashika mmbaishi shia ya Nndumi Iruva-fo, ivavaso lya Iruva waawo. 5Mmbo nsoraa vandu vasuri, shinderere nawo; mashika veeshi shia ya Nndumi Iruva, ivavaso lya Iruva waawo.” Lyo woose ni kyimwi, mmbalefisha yookyi, na iporommwa fyoove. 6Kweekyo miiso ishuukaa nturu nyiwaa, ngare yooka kasa koomu ishevarattwa-rattwa. Nyamandu mmbo ikeleveya miri yaawo, na wo nndu asomukaa-fo asheratuwa-ratuwa; mashika ngyulyamari tawo nshiingyi, na ikutuula lyawo ni yiingi. 7“A niinda shikusarya? Vana vafo mmbo valeshikapa mungo, na ilya mboo na yewo valakee maruva. Llya shilevawuutisa vakawuura, llyo valetuusa neeyakana yefo mmba ta masonga. 8Vakava sha frasi tawuutye lango, wo nndu kalanga nka wa uroye. 9A nshiraa inda shilavakaba kyimaruma kya findo yefi fyoose?” Ni Nndumi Iruva aamba; a nshitaiyyaa-se kyiduva isanga sha elyi? 10“Saama yefo ireminy lya misabibu kwaruuna, lyo kularumate-fo; ambuya maramba a vayo, mashika nnyakee a Nndumi Iruva-fo. 11Mashika mmba ya Israeli na ya Yuda mmbo valeshiinyala deny, ni Ndumi Iruva shaamba.”
Nndumi Iruva alema Israeli
12Mmbaleamba wongo kya Nndumi Iruva, vakarera sheelyi,
“Nnyatanaa kindo-fo; nkwiifo ukasha lulusheyaa-fo,
Llulollya usu nta shaa-fo.
13Vakisuku mmbashaaluka uraato;
mmbatiri irero-fo. Ni indo vatannywaa!”
14Kweekyo, Nndumi Iruva aamba, Iruva muni matorito:
“Kimmba vandu yeva valeamba irero yelyi, lola, Yeny nshikeevika
marero akwa efo kaniny kyafo ashevaa muro,
Vandu yeva wo vave ngwi,
na muro uvamamite.”
15“Lola, Yeny nshikeemweengye isanga lyuuka kwaasha lyimuwoye, yeni mmba ya Israeli,
ni Nndumi Iruva aamba. Ni isanga itakusu, isanga lya
kasha nnu, isanga kuleeshi kyishomu kyawo nta
kulamanyaa yekyo vakeerera.
16Shombo yaawo ni kyifu kyikee ng'alau, woose ni vandu vakaari.
17Mmbashelyaa fimu fyany na shoonga tany;
mmbalyaa vasoro vany na vefu vany;
mmbalyaa maronda a mburu tany na a ng'umbe tany;
mmbalyaa misabibu na miri yany ya tiini;
na miri yaany ya turuve yeyo muivikkye nsia
mmbasheisambwaa na usu.”
18Indi naakwa ni mikonuny yeyo, Nndumi Iruva aamba, nshimumamitaa deny-fo. 19Na elyi vandu vavesaa, “A nkyikyi elyi Nndumi Iruva alutannya yefi fyoose? Yewe nkushevavaa, ‘Shaasa valeshikaba mungo vakarunndya maruva meny kunu urukeny lwawo, niindo vasherundyaa veny urukeny lulakee lwawo.’”
Iruva eekyimba vandu vakwe
20Vambisa mbony yei yefo mmba ya Yakobo, yaambe yefo Yuda: 21“Aranyiny, yeni vandu varung'ani na matondo, mutiri miso mulalollye, mutiri maarwi lyo mulashiitaa. 22A musheereiyye-se? Ni ndumi Iruva avesa; Mureremaa-se mbee yakwa? Mmbo shilevika nsanga uve nnyanu wa yeeve, nnyanu ilashiidimaa ikillya; ra neelyi matundulu akweeraa, lyo nnyikillyaa nnyanu yeto-fo; 23lyo vandu yewo mmbatiri mirima myuumu na ilyang'aa; Mmbo muleshirisha na ishikaba mungo. 24Mmbakeeikusara miriminy yaawo sheelyi, ‘lwiindye Nndumi Iruva, Iruva weeru-fo, yeto alurikyaa mmbwa kwa kyeeri kya vayo, kisye na mateeri, kalurikkya fyeeri fikwaani fya iilula.’ 25Lyo ngyulyamari tany mmbo tilerishasa yefo fyoose, na uravi lukapaaya wo kyindo kisha kilamusheye.
26“Kyimmba vandu varavi vasasangyi nnang'ani ya vandu vakwa; mmbalaa sha nreiyyo uvera itira. Mmbaala nreiyyo; neetira vandu. 27Sha kyikabu kyiisshwe ndeye, mmba tawo ntiishwe ntambo; nkyo kyaniinga vakang'ana na iva masimba, 28mmbammbongya na irendeya. Mmbatiri nnyanu wa uravi lwawo-fo; nta mmbawonisyaa mwana wa ngwera usumanu lwakwe-fo, naambo vavessywa, nta mmbawaannya vaturi vaidimi iwona waavi lawo-fo. 29A nshishevakapaa-se kya findo yefi? Ni Nndumi Iruva aamba, anshivataiyya-se kyiduva isanga sha elyi?” 30Kyindo kya iting'a na yeeresa kyammbutika kunu urukeny: 31vakisuku mmbo vakeerera wongo, na vakohani vakasora irero lyawo; vandu vakwa mmbo vakundye yeenda indo, lyo nkyokyi vashetana elyi umando lushaa?
The Holy Bible in Kimashami © Bible Society of Tanzania, 2016.