YEREMIA 4
4
Vavio vaalashike nrima
1Nndumi Iruva aamba indi, “Yeni Israeli, kwakooya mukunndye iwuya, shiindukyeny. Kwakooya mushuutaa mbee yakwa uravi yelo shilusuuye, na kulare musingasingaa lyingyi 2na kwakooya mulyaa mboo, ‘Shaasa Nndumi Iruva eefo na muu,’ kya udede, kya usumanu, na waarya, llyo masanga ashewonaa ngarami kwakwe na ikwiitikisa kwakwe.” 3Nndumi Iruva mmbo arera na vandu va Yuda na Yerusalemu, kaamba, “Reminy marema any, nta mulavaaye mbeu efo miingeny-fo. 4Kurininy kwa Nndumi Iruva, ereny kishongu yekyo kwaasha neeni rininy mirima vandu va Yuda na yeni mukaa Yerusaalemu; nyashi yakwa ilasheakaa sha muro, yaaka lyilawonaa mwiirumya, kyimaruma kya uravi lwa mitannyi yaany.”
Yuda ikesheywa mmisa
5Rerya kulya Yuda, ongoya Yerusalemu, “Kapeny iranda urukeny koose;
Ongora deny kwaamba,
‘Kuumbyeny amwi, lurishye yaanga miriny itiri turuve!’
6Vingya Sioni, risheny mukyire muu, mulavere-fo,
mashika shikeeyende ngapo yuuka taari ya ndoo na urumato uniini.
7Miiso yammuuka ngoroshony ya vayo,
mwiirumata masanga ankudeesya
ansumuka uka ando akwe ishaallwa uruka lwafo nrapu,
Miri yafo ishaaluwa sama ilatiri vandu.
8Kya indi, reeny makunnya, mufwe neekapa kiiyo nnu;
Mashika nyashi shinyaasi ya Nndumi Iruva nnyishiindukaa ilure-fo.”
9Nndumi Iruva aamba, “Nkonu yeto ukaari lwa vamangyi na vasongoru; vakohani vashesongoloo na vakisuku vasheising'ang'aa.” 10Na yeny shaamba, “Woi Nndumi Iruva, Iruva kya dede deny mmbo kulelemba vandu eva na Yerusalemu, kwishaamba, ‘Nkyishaaluka unapwe kyany;’ indi usu mmbo lwakooya muu wawo veni.” 11Kyeeri yekyo nkyishevywaa vandu na Yerusalemu, “Uraato lwa muro uka uwe ya fidooro yefo kasa koomu lukesheya mfu va vandu vakwa, nshi lwaiyeela ao ivivita mamburu-fo, 12uraato lwa finya niini na ngota yelo shilurumaa. Ulaalu ni Yeny shireraa iwootya uvingo.”
Yuda yaringitywa ni vakiduva
13Lola, akakato akeesha sha mafishi, mitika yakwe mmbo ivakkye kitita-si; frasi tawo mmbo tirishaa ngota ngoru woshiny llweru, lwanreka! 14Yewe Yerusalemu, sambya uravi lwa nrima wafo naambo kukooye ikyirwa. A ni fika indii kukaa na makusaro afo makasha? 15Mashika unyanga llukeyaamba uka Dani na irera makasha uka mafumbuny a Efreemu. 16Kangayeny masanga sheelyi afo ashaa; vambiseny yefo Yerusalemu, “Vakyiishi vakeesha wooka uruka lwa kwaasha; mmbo vasheongoraa kya miri ya Yuda. 17Sha veeringa marema ni indo vanringyitye riti, mashika mmbaleshikapa mungo, ni Nndumi Iruva aamba indo. 18Ni yewe kumuni kulekwengye ngapo yei kyeendwa ni shia na mitannyi yafo kumuni. Yelu ni urumato lwafo, mmbo luvavaa; lwankooya ngoo yafo.”
Yeremia atinnyo vandu vakwe
19Woo mavavyo, woo mavavyo! Shavavyo nnu ni muu! Woo, ngoo yakwa ikeiiluka-fo! Ngoo yakwa ikeekapa nnu; shikeidima imalallya-fo; mashika shamiita unyanga lwa maranda, yoona lya fira. 20Ngapo ikalatya ngapo shuumu, uruka loose lwammamika. Meema akwa akalyamarwa tiny, nsurumati yakwa ikalyamarwa sha ikafyaa. 21A ni fika indii shilollyaa pendera, na iita unyanga lwa maaranda? 22“Kya indi vandu vakwa mmbo vakee varung'ani, mmbashishi-fo; mmbo vakee vana varung'ani, valeeshi kindo. Mmbo vakee vatakusu itana fya ulyamari, vakalemwa fushu imanya itana mesha.”
Yeremia allollya urumato yelo lwiisha
23Nshelola urukyeny, wooo, mmbo lukee sama na nrapu; na ngyiniiu, indi, nkwiifo sa-fo. 24Shalola mafumbuu, woo, nnyekeeifina, na fidooro fyoose nfyeekeeyenda kunu na kulya. 25Shalola, woo, nkwiifo nndu-fo, na ndeye ta nginii-u ntenrisha-fo. 26Shalola, woo, uruka uviiri llwammaaluka kasa koomu, na miri ya wayo myoose ikaaluka sama mbee ya Nndumi Iruva, unyafiny lwakwe. 27Nalyo Nndumi Iruva mmbo aamba, “Uruka loose llushevaa kasa koomu; lyo nnshishelurumataa deny-fo. 28Kyimaruma yekyi uruka llushiffwaa, na ngyina ifwani shuu; shammaayaamba, na shilanngye; nshikuryaa nta nshishiindukaa-fo.” 29Elyi vasikari va frasi vashitiwaa na veeasa ngyura, wo muri mmburishaa; vaange ngoroshony; vasaami mawe a ngyina; wo muri urewa irama, nta nndu nalakyikaa-fo. 30Woo, yewe kukee nrapu, A nkyiriye yaamba kyi elyi kukweerye masara mesha indo, kwaraa fipulyi fya saabu, na miso kwang'anisa na fwana shive? Nkwakutokopa ruu. Vakunde vafo mmbo vakuminnye; mbakeeruuya muu wafo. 31Mashika mmbo sheeta kyiiyyo sha kya nka ashiiraa muna, sha nka akeira nkoku wa mbee, kyiiyyo kya mfu va Sioni akapannya muumuyo, eeshoorwa maako akwe, “Woshiny lwakwa! Mmbo shikeesiyyony finya mbee ya yewo vakeeshuuta muu.”
The Holy Bible in Kimashami © Bible Society of Tanzania, 2016.