YEREMIA 40
40
Yeremia andekaa na Gedalia
1Irero lyesheya Yeremia lyuuka kwa Nndumi Iruva numa ya Nebuzaradany nniini wa vasikari imwiipoo uka Rama, llya emwiipoo emfingye na mise ya minya amwi na mifungwa ya Yerusalemu na Yuda yewo vekamarwa mifungwa fika Babilony. 2Nniini va vasikari keepoo Yeremia kammbia, “Nndumi Iruva, Iruva vafo nnyalesenda makasha kya ando yaandi; 3Nndumi Iruva nnyaletana shaasa eyamba atana. Kyimaruma mmulelyang'aa Nndumi Iruva nta kulare mulearannya unyanga lwakwe, nkyo kyeende mbony yei. 4Ulaalu lola, mmbo shaporommwa inu mise ya minya maakony afo. Kwakooya kukundaa yeenda neeny Babilony, osho, na yeny shishekufurukannyaa nisha; lyo kwakooya kulollya ni kyikasha lweende kyimwi Babilony, kulashe-fo. Lola, uruka loose ni mbee yafo lukai; enda ando koose kulollyaa ni kusha na ni kyisha yeenda. 5Kwakooya kusaa yaa, wuyaany kwa Gedalia mwana wa Ahikamu mwana wa Shafany, yeto mangyi ya Babilony alenniinga iva nshilyi wa miri ya Yuda, kwakaa nawe nnang'ani ya vandu; ao kweenda ando kulollye ni songosiny yeenda.” Kweekyo nniini ya vasikari kanninga shoonga ya kyisha-u na kyindo kya pya kanra neende. 6Indoony Yeremia keenda kwa Gedalia mwana wa Ahikamu yefo Mispa, kakaa nawe nnang'ani ya vandu yewo verewa efo urukeny.
Gedalia ashillya Yuda
(2 Vam 25:22-24)
7Elyi vaniini woose va vasikari va uruka lurambalalyi na vandu vawo veeta sheelyi mangyi ya Babilony aleniinga Gedalia mwana wa Ahikamu ushilyi lwa uruka na inrambikkya womi, vaka na vana yewo vakee ngwera vakailannya urukeny, yewo kulare valeipowa mifungwa ikamarwa Babilony, 8Vakeengya Gedalia kulya Mispa Ishmaeli mwana wa Netania, Yohanany mwana wa Karea, Seraya mwana wa Tanhumeti, vana va Efai Nnetofa, Yesania mwana wa Mmaaka, wo na vandu vawo. 9Gedalia mwana wa Ahikamu mwana wa Shafany kawalyiyya mboo wo na vandu vawo kaamba, “Mulaereye irundya Vakaldayo-fo. Keeny ni urukeny mukarundya mangyi ya Babilony, kyive kyippwa kyaany. 10Yeny mmbo shikaa yaa Mispa shimwiise na Vakaldayo yewo valusheyaa; lyo yeni sangyirieny mfinyu na ndunda ta kyeeri kya mwi na mafura, musurumyi nunguny tany, mukakaa yefo miriny yaany yeyo mwantira.” 11Indo-da, elyi Vayuda woose yewo vekee Moabu na nnang'ani ya vana va Amon na yefo Edomu na yefo ngyurukeny tingyi valeita sheelyi Nebukadnesa mangyi ya Babilony alera sasari yefo urukeny lwa Yuda na aleniinga Gedalia mwana wa Ahikamu mwana wa Shafany nave nshilyi waawo. 12llyoony Vayuda woose vakawuya wooka wo ando werishisywa vakawuya urukeny lwa Yuda, kwa Gedalia alya Mispa; vakasangyirya mfinyu na ndunda ta kyeeri kya mwi shiingyi nnu.
Gedalia awaawo
(2 Vam 25:25-26)
13Ulaalu Yohanani mwana wa Karea na vaniini woose va vasikari va uruka urambalalyi vakasheya Gedalia alya Mispa 14Vakammbia, “A ndesa kwiishi sheelyi Baalisi mangyi ya Vaamony nnyaleruma Ishmaeli mwana wa Netania nashekuwaa?” Indi lyo Gedalia mwana wa Ahikamu nnyevatirya kyikusiryo-fo. 15Llyo Yohanani mwana wa Karea karera na Gedalia kyisurukumu yefo Mispa kammbia, “Shira shindewaa Ishmaeli mwana wa Netania nta nkwiifo nndu amanyaa-fo. A nkyikyi nakuwee, naambo Vayuda woose yewo vakusangyirie yaa kwafo vanyanyatwa na seseri ta Yuda varumake?” 16Indi Gedalia mwana wa Ahikamu vkavia Yohana mwana wa Karea, “Kulatane kyindo yekyo-fo, mashika yewe nkukeerera wongo kya Ishmaeli.”
Currently Selected:
YEREMIA 40: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
