YEREMIA 41
41
1Mwiiri va mfungare Ishmaeli mwana wa Netania mwana wa Elishama va mmba ya mangyi, umwi va vashilyi vaniini va mangyi, kasheya Gedalia mwana wa Ahikamu na vandu ikumi kulya Mispa. 2Elyi veifo veelyaa nkate kulya Mispa, Ishmaeli mwana wa Netania na vandu valya ikumi eerani nawo vakawoya Gedalia mwana wa Ahikamu mwana wa Shafany na usu, vakammbwaa, yeto mangyi ya Babilony alenniinga ushilyi lwa uruka. 3Ishmaeli kawaa na Vayuda vengyi vekee na Gedalia kulya Mispa na vasikari va Vakaldayo vekooywa-fo.
4Nkonu walatya iwaawa lya Gedalia 5Kulaore kwiifo nndu ammanya, vandu makumi nyanya vakasha wooka Shekemu na Shilo na Samaria veutye nguyo tawo na masara awo ekee maranndwe na miilyi yaawo isaarywa-saarywa, vakeende firaso fya soko na ubani mmba ya Nndumi Iruva. 6Na Ishmaeli mwana wa Netania kasha ooka Mispa ivavaria, kasha eeffiiraa. Akyikwaanannya nawo kavavia, “Oshony kwa Gedalia mwana wa Ahikamu.” 7Elyi vesha muriny, Ishmaeli mwana wa Netania na vandu valya veeriani nawe vakavawaa vakaveera kyiroriny. 8Indi lyo kwekaafo vandu ikumi nnang'ani yaao vevia Ishmaeli, “Kulaluwee-fo mashika lutirimbeshe ta nganu, shayiri, mafura na ukyi fisurumi mareminy.” Kweekyo kavara, nalavawee wo na vana va maaye vawo. 9Ulaalu kyirori yekyo Ishmaeli aleera minying'a ya vandu yewo alewaa nkyekee kyiniini ni kyo mangyi Asa esuma kya yoovya narishe Baasha mangyi ya Israeli; Ishmaeli mwana wa Netania kakyiishura minying'a. 10Llyoony Ishmaeli keepoo mifungwa taari toose ta vandu vekee Mispa, vefu va mangyi na vandu verewa Mispa yewo Nebusaradany nniini wa vasikari evarambikkya kwa Gedalia mwana wa Ahikamu. Ishmaeli mwana wa Netania kaweepoo mifungwa, kaala naruuke kwa vana va Amon.
11Indi lyo elyi Yohana mwana wa Karea na vasongoru woose va vasikari vekee nawe veeta kya makasha Ishmaeli mwana wa Netania antana, 12Vakeepoo vandu vawo woose vakandekabana na Ishmaeli mwana wa Netania. Vakansheya iruveny iniini lyikee kulya Gibiony. 13Na elyi vandu woose vekee na Ishmaeli velollya Yohana mwana wa Karea na vasongoru va vasikari woose kyimwi nawe, vakafura. 14Kweekyo vandu woose Ishmaeli emmbakamara mifungwa-uka Mispa vakainduka vakawuya vakeenda kwa Yohana mwana wa Karea. 15Indi Ishmaeli mwana wa Netania katurunya Yohana mwana wa Karea na vandu nyanya, karinshia kwa Vaamony. 16Llyo Yohana mwana wa Karea na vasongoru woose va vasikari kyimwi nawe vakeepoo vandu vengyi woose yewo Ishmaeli emmbeepoo mifungwa uka Mispa ekyimaa iwaa Gedalia mwana wa Ahikamu vasikari, vaka, vana na vakape-ndafu yewo Yohana evaviira uka Gibiony. 17Vakeenda vakandekaa Geruti Kimhamu kufii na Betleemu veekusarye yaanga Misri kyimaruma kya Vakaldayo; 18kya elyi vemmbeereya nnu, kya elyi Ishmaeli mwana wa Netania alewaa Gedalia mwana wa Ahikamu yeto mangyi ya Babilony emmwaallwa nshilyi wa uruka.
Currently Selected:
YEREMIA 41: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
