YEREMIA 39
39
Muri wa Yerusalemu walyamarwa
1Wikee mwiiri wa ikumi wa mwaaka wa kyeenda wa ushilyi lwa mangyi Sedekia wa Yuda, mangyi Nebukadnesa wa Babilony kasha na ironda lyakwe lyoose lya vasikari, kakapa Yerusalemu. 2Nkonu wa kyeenda wa mwiiri wa kaana, wa mwaaka wa ikumi na umwi ushilyi lwa Sedekia, isimamba lya muri wa Yerusalemu lyikatirwa.
3Kyeeri Yerusalemu uletirwa, vasongoru va mangyi ya Babilony mmbo vesheye-fo, vashetira ando awo alya Ngiriny ya mbee Nnang'ani ando amwi na Nergali Saresa, Samgar-nebo, Sar-sekimu, na Nergali Saresa-se.
4Llya mangyi Sedekia na vasikari vakwe woose valelollya kilya kyekeetanyika, vakeesa yuuka kulya muriny kyeeri kya kio. Vakasora shia ya bustani ya mangyi, vakasora shia ya yoo nnang'ani ya masimamba avii, vakasomuka na taari ya imungo lya Yordan. 5Lyo vasikari va Babilony vakavingya vakatira mangyi Sedekia, efo mbateny kufiitani na Yeriko. Naasa vakanrwaaya mangyi Nebukadnesa ekee muriny wa Ribla kyuungony kya Hamat, nang'u kweni mangyi Nebukadnesa kumuutya uvingo. 6Yoo Ribla mangyi Nebukadnesa kavavasya vana vakwe vawaawa, Sedekia eelollye, na vasongoru va Yuda kiwo. 7Naasa llyo kavavasya Sedekia nailuva miso nafingwa na mise ya minya narawa Babilony. 8Kyeeri eeki Vababeli mmbo vekekora mmba ta kimangyi, na mmba ta vandu, neewunndwa isimamba lya Yerusalemu. 9Numa nndu evangwaa Nebusaradani ekee nsongoru wa fira, keepo vandu valya valesaa kulya muriny kavarwaa Babilony, ando amwi na valya valekulunga nawo. 10Kulya urukeny lwa Yuda kara-fo vandu valya vekee vafwafwa deny, vakiva valatiri nta kindo, kavaavya marema a misabibu na marema engyi-da.
Yeremia alekeyo
11Naasa Nebukadnesa kavavasya Nebusaradan ulya nniini wa vasikari indi, 12“Enda ruuya Yeremia kullole nisha. Kulantanyi kivisho-fo ntanyi ekyo kyoose akunndye.” 13Nalyo Nebusaradan ando amwi na vasongoru woose wo Nebushani, na Nergali Saresa na vasongoru vengyi va mangyi ya Babilony 14vakasheende kulya kari ka mangyi. Vakashirammbikya nndu avangwaa Gedalia nashilole, nawe ekee mwana wa Ahikamu na nshuku wa Shafan, nambo vashifite kyeeny na ufoo. Naasa shandekaa-fo na vandu vengyi.
Nsia kwa Ebedmeleki
15Naasa kyeeri kilya shevekee mfinge kulya kari kalya Nndumi Iruva kashivia 16shivie Ebedmeleki ulya Mwisopia sheelyi Nndumi Iruva muni finya, we Iruva wa Israeli mmbo aamba, “Shaasa llya shileamba nshendee urumato kunu muriny yeu na nshi mbora-fo. Nalyo elyi ekyi kyishetanyika mmbo mukoyaa mwiiyo mulollye. 17Lyo yeny Nndumi Iruva mmbo nkuringaa nta nkusherammbikywa vandu yewo kuveereiye-fo. 18Mmbo nshekuringaa, nta nkuwawaa-fo. Mmbo kusherishaa kukire muu wafo kimmba kuleshivika nsia. Ni yeny Nndumi Iruva shamba indi.”
Currently Selected:
YEREMIA 39: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
