YEREMIA 38
38
Yeremia oolotwa kiroriny kilatiri mura
1Shafatia mwana wa Matani, Gedalia mwana wa Pashuri. Yehukal mwana wa Shelemia na Pashuri mwana wa Malkia, yeva mmbo veeta marero moose Yeremia evia vandu sheelyi, 2Nndumi Iruva mmbo aleamba, “Nndu moose yeto ashekaa kunu muriny mmbo awawaa mfira ao shaa ao ndwari. Kyeendi kwakooya nndu ooka-fo kandekurambikya makony a Vababeli nnyashewawaa-fo, nkuti nakire muu wakwe.” 3Shaveva shivaviaa sheelyi Nndumi Iruva mmbo aleamba, “Mmbo nsheningyaa vasikari va Vababeli muri yeu vautire.”
4Nalyo vasongoru vakeenda kwa mangyi vakammbia, “Nndu yeu nkuti nawaawa. Elyi akerera indi mmbo ashengyee vasikari kunu muriny asye finya deny, nawe ni ndo akeevia wo nndu kunu muriny. Nnyakeekya vandu-fo, mmbo akevaawuta tupu.”
5Nalyo mangyi Sedekia kavavia, “Kyasyiany taniny nawe shaasa mukunndye, yeny nshimwimaa-fo.” 6Vekiita indo vakaipoo Yeremia vakandemoolota na fyoove kulya kiroriny kya mwana wa mangyi Malkia kyekee kulya kari ka mangyi. Nafo nkweefo mura-fo, ni ibwashi yeni, shasokya-fo.
7Lyo Ebedmeleki nndu umwi Mwisopia, nawe mmbo eerundaa efo kwa mangyi keeta sheelyi mmbo woolota Yeremia kulya kiroriny. Kyeeri ekyi we mangyi mmbo eevikye shila alya Ngiriny ya Benyaminy. 8Naasa Ebedmeleki keenda nang'u kandevia mangyi. 9“Mangyi mmbee, kindo ekyi vandu yeva vatana nkikasha. Mmbo valeolota nkyisuku ullya Yeremia kulya kiroriny kundo kulakee shoonga nkuti nafwe nshaa. Kimmba kunu muriny kulakiifo shoonga.” 10Llyo mangyi alevavasya Ebidmeleki na vandu vengyi vararu vasheshuuta kulya kiroriny kulore shamfwa. 11Naasa Ebidmeleki na vandu yewo vakeenda kulya itengony vakanderuuya-fo maratwe a soori kashoolotya na fyoove. 12Kashivia shitivike efo makyekyele nambo fyoove filashibushwe. Neeny shatana indo. 13Vakashisaamisa shooka kulya kiroriny. Naasa shanderawa kulya kari kwa mangyi.
Sedekia aumburana na Yeremia
14Naasa nkonu ungyi mangyi Sedekia kavaanga Yeremia na alya ngiriny ya kararu ya mmba ya Iruva, kammbia Yeremia, “Kwiifo kindo shikunndye ikuvesa, lyo kushive kya dede deny.” 15Yeremia karouwa Sedekia, “kwakooya shakuvia kya dede yewe kushiwaa-se? Naakwa shakuvia kyeetana nta nkusharanyaa-fo.” 16Llyo mangyi Sedekia alevia Yeremia kirika, kashivikya kyaasa, kaamba, “Mmbo shalya mboo na Iruva akee na muu, Iruva yeu alutirye-u na muu, sheelyi nshishekuwaa-fo, nta ikurambikya kwa yewo vakundye ikuwaa-fo”
17Naasa llyo shilevia mangyi Sedekia sheelyi, Nndumi Iruva muni finya shoose Iruva wa Israeli mmbo aambaye indi, “Kwakooya mwakurammbikya maakony a Vababeli mukiaa, nato muri yeu nta mmbukorwaa–fo. Yewe na vandu vafo mmbo mukyaa. 18Lyo mwanra mulakurammbikya kwa Vababeli muri yeu mmbo urammbikywa Vababeli nawo vaukore, neewe nta nkusheashukaa-fo.”
19Lyo we mangyi kaamba, “Mmbo sheereiye kya vandu veru yewo valenkulunga na Vababeli. Sharawa-fo mmbo vandeshilyisaa ukiva.” 20Shambia, “Nkushevikwaa maakony awo-fo. Mmbo shakutereva kwiirikye irero elyi lya Nndumi Iruva tupu, nalyo fyoose five fisha taari yafo, lyo neewe kukyaa muu. 21Nawe Nndumi Iruva mmbo aleshoora deny shaasa kivaa kyafo kwakooya kwalema ikurambikya kwawo. 22Nruminy yeyo mmbo shileorwa shaasa vaka va Yuda va kimangyi shaasa vasherambikyoo vasikari vasongoru va Babilony. Arannya shaasa vaamba elyi veefo veshendaa:
‘Ngyama ta mangyi atikundye tilellemba, vakamweeveta.
Ulaalu marende akwe antambya ibwashiny.
Na vambuya vakwe vakanra.’”
23Sheengera immbya, “Vaka vafo woose na vana mmbo vasherammbikyoo Vababeli na nta yewe nkushekuturushwaa-u-fo. Mangyi ya Babilony mmbo ashekukamaraa mfungwa, na muri yeu ukorwa uve ifu!” 24Sedekia karouwa kaamba, “Kulasheevia nndu kya usaare elu lweru-fo. Muu wafo mmbukee nrengeny-fo. 25Kwakooya vasongoru vamanya shanrera neewe, mmbo vashekwitikyaa kuvavie ekyo lwarera. Nawo vakuvikye kyaasa mmbakuwaa-fo kwammbavia fyoose. 26Vakankuvesa vavie mmbo kwefo kweshitereva nambo shilakweere kifingyony kundefiiya-fo.” 27Naasa vasongoru yewo vakasheya Yeremia wakambesa kavavia shaasa mangyi aleshivia shivavie. Nawo vakamalallya, kimmba kulore kweefo nndu alwaaranya kilya lweefo lureraa. 28Nalyo sheengera ifingyo kulya kari kalya kutani nkonu Yerusalemu uletirwa.
Currently Selected:
YEREMIA 38: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
