YEREMIA 37
37
Kiterewo kya Sedekia kwa Yeremia
1Mangyi Nebukadnesa wa Babilony mmbo avika Sedekia mwana wa Yosia nave mangyi ya Yuda ando a Yehoiakin mwana wa Yehoyakimu. 2Lyo Sedekia na vasongoru vakwe nta vandu vakwe mmbaleirikya nrumi ilya ya Nndumi Iruva aleruma Yeremia-fo.
3Mangyi Sedekia mmbo aleruma Yehukai mwana wa Shelemia na nkohani Sefania we mwana wa Maaseia vashivie shitereve Nndumi Iruva weeru ando a vandu va uruka woose. 4Kyeeri ekyi nshemfingwa-fo, nkyo sheetiri mwaanya deny wa iru-rua efo vanduny. 5Vasikari va Babilony lyo mmbo vekeringitya Yerusalemu, lyo kyeeri veeta sheelyi Vamisri nawo vankilya vakaruuka nnyanu, wo Vababeli wakawuya numa.
6Naasa Nndumi Iruva wa Israeli kashivia shivie Sedekia, 7“Vasikari va Misri vakeesha ishekweekya, vakammaa vawuye. 8Llyo Vababeli vawuyaa lyingyi ishekapa muri yeu, vautire neukora. 9Nkyo yeny Nndumi Iruva mmbo shamwiikimba mulashekulemba muveni mwaambe Vababeli mmbakewuya, mashika nkuti vawuye. 10Naakwa mweeshidimaa ivinga vasikari yewo va Babilony kutani vasaa-u vasikari vabobore deny vakalala meemeny awo, lyo mmbo vashekwiipoo vakore muri yeu usye.”
Yeremia arawa kifingyony
11Vasikari va Babilony mmbo vewuya numa kimmba vasikari va Misri vekeesha. 12Nkyo yeny shooka kulyaa muriny sheenda kulya kwa Benyaminy shindevarya ding'u yakwa efo ufyariny. 13Lyo kyeeri shefika alya Ngiriny ya Benyaminy, nsongoru wa vasikari yewo vetiri ikamba lyeeringa, avaangwa Iriya mwana wa Shelemia avekee nshuku wa Hanania, kashisaleesa kaamba, “Yewe mmbo kukee umwi wa Vababeli.” 14Yeremia kammbia, Ekyo nshi dede-fo. Yeny nshikee umwi nawo-fo. Lyo Iriya nnyaleshaaranya-fo, nkyo kashitira kandeshirwaaya vasongoru vakwe. 15Vakashinyaasya neevavasya shirawa shindefingyo kulya mmba kwa Yonatan ulya ekee mwireiya wa barasa. Nayo mmba yakwe mmbo yemmaluwa kifingyo. 16Kyeeri Yeremia eekeemfinge efo kiryeny kya si ya mmba kundo alekaa kyeeri kyaasha. 17Elyi numa mangyi Sedekia karuma shindeendwa, na kulya mmba kwakwe kashivesa kirika kaamba, “Kwiifo nrumi shoose yooka kwa Nndumi Iruva?” Shammbia, “Ee, iifo.” Shammbia, “Mmbo kukeetirwa kundevikwa maakony a mangyi ya Babilony.” 18Naasa Yeremia kevesa Sedekia, “A nkyokyi shilekulyamarya yewe ao vasongoru vafo ao vandu va uruka kutani sheerwa kifingyony? 19A nkyokyi nta kilekooya kisuku vafo valya valekuvia sheelyi vababa mmbakusheyaa nekaya uruka lwafo? 20Na ulaalu, woi mangyi mmbo shakutereva kushaarannyi eki. Shikunndye ikutereva. Mmbo shakutereva kuulashiviire kifingyony kulya mmba kwa Yonatan–fo. Shilasheendefiyya-fo.”
21Llyo mangyi Sedekia alevavasya shindefingyo kulya kari ka mmba ya mangyi. Kulya mmbo shilekaafo shava shiningwaa nkate wuuka kulya rukony kukafika nkonu ulya mikate ilesya kulya muriny.
Currently Selected:
YEREMIA 37: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
