YEREMIA 34

Nrumi kwa Sedekia

1Naasa Nndumi karera neeny kyeeri mangyi Nebukadnesa wa Babilony na vasikari vakwe veshekywaa ni maronda a vasikari va ngyuruka tilya tekee si yakwe, valesha ikapa Yerusalemu na miri ikee kufii nato. 2Nalyo nndumi Iruva wa Israeli kashivia sheende shinderera na mangyi Sedekia wa Yuda, shimmbie indi, “Yeny Nndumi Iruva mmbo nsherammbikyaa muri yeu kwa mangyi ya Babilony, nawe naukore. 3Nkukwiisaa-fo, mmbo kushetirwaa kuvikwa maakony akwe. Mmbo kushekwanannyaa nawe kurere nawe, kurawany Babilony. 4Sedekia, arannya ekyi shiifo nkuviaa. Fira nnyikuwaa-fo. 5Mmbo kushefwaa kyeeri kya ufoo, na shaasa vandu vakoraa ubani kyeeri varikaa vandu vawo, valya vekee vamangyi mbee yafo, niindo-da vashekoraa ubani kwafo. Mmbo vashekuiyaa vaambe, ‘Mangyi yeeru amfwa!’ Ni yeny Nndumi Iruva shaamba.”

6Naasa sharwaaya mangyi Sedekia nrumi yei kulya Yerusalemu. 7Kyeeri vasikari va Babilony vekeanga Yerusalemu. Nawo mmbo vekekapa Lakishi na Aseka, na nnyo miri yensaau ya Yuda yetiri turuve.

Ikaa na mashinga

8Mangyi Sedekia na vandu va Yerusalemu mmbo vemmiirikyana valekeye 9mashinga awo a Kiebrenia, va kyuumi na va kyika, nambo kulashekaa-fo nndu Mwisraeli atiri ishinga uroye. 10Vandu woose vakeerikyana ilekeya mashinga awo, vare valevawuiya lyingyi. Vakavalekeya woose. 11Lyo numa vakaalasha makusaro, vakavaviira, vakavaitikya iva-se mashinga.

12Nndumi Iruva aleamba, 13Iruva wa Israeli mmbo aleshivia shivie vandu, “Mmbo shevika kyaasa na vasongoru vafo kyeeri shilevauta ushungeny kulya Misri mmbo shevavia 14wo myaaka mfungare nkuti valekeye mashinga a Kiebrania elyi varunndya myaaka irindaru. Lyo vamiku vany valairikye nta ikunda itana kilya shilevavia. 15Mikonu myaangu-da mmbo mulealasha makusaro any mukatana ekyo kishisennyi. Moose mmbo muleirikya ilekeya mashinga wooroye vany, mukavika kyaasa mbee yakwa, kulya mmba yakwa kundo musheshindya. 16Lyo mukashilema elyi mulealasha makusaro any, neeni moose mukaviira-se mashinga alya mwemirikya ivalekeya. 17Nkyo ulaalu, yeny Nndumi Iruva, mmbo shaamba mwashimina mmwakunnda ilekeya woroye vany-fo. Kyasiany-te, neeny shamuniinga uleke, uleke lweefwa fireny, ndwari na shaa. Wo vandu ulaniny mmbo vasheawutwaa nnyekyo nshemutannyaa. 18Vasongoru va Yuda na va Yerusalemu ando amwi, neewo va mmba ya mangyi vakohani na vasongoru woose, mmbo valevika kyasa neeny veshiraa yoo nnang'ani kavii ya shau venyaava kavii. 19Lyo vakafisha kyaasa ekyo valakikilatye. Nkyo ulaalu kilya vandu yeva valetannya shau ilya nkyo neeny nshevatannya, 20Mmbo nshevarambikyaa vakiduva vawo, vavawaa, na miili yaawo ilyiwa ndeye na mafisi. 21Mmbo nsherambikya mangyi Sedekia va Yuda na vasongoru vakwe kwa yewo vakunndye ivawaa. Mmbo shivarambikyaa kwa vasikari va Babilony, yewo vemmaa ira imukapa, 22Mmbo nshevavasyaa vawuye kunu mriny. Vaukape, vautire, vaukore moose. Miri ya Yuda mmbo nsheyallwa ive kasa koomu kulaifo nndu, Ni yeny Nndumi Iruva shaamba.”

Currently Selected:

YEREMIA 34: MAS2

Highlight

Copy

Compare