YEREMIA 33
33
Kyaasa kingyi kya nsia
1Kyeeri shekee mfinge kulya kari kalya, nrumi ya Nndumi Iruvaa ikasheshifikya-se. 2Nndumi Iruva yeto aleumba ulana, kaluumba kaluvika ando avayo, karera neeny. Yeto irina lyakwe lyikee Nndumi kaamba, 3“Shivaanga, neeny nshekwiirikyaa, shikoore findo fya wende finiini kulore kufiishi. 4Yeny Nndumi Iruva wa Israeli mmbo shaamba sheelyi mmba ta Yerusalemu na ta kimangyi ta Yuda tishewunduywaa si kyeeri vasheshingillyoo. 5Maata mmbo vashesaa ikabana na Vababeli, nawo vasheishura mmba yeto na minying'a ya vandu yewo nshevarumbikyaa vakapwa kimaruma kya unyafi lwakwa. Mmbo shaura muri yeu kimaruma kya uravi vandu valetana. 6Lyo nsheviiryaa vandu yeva muu shivavirye-se finya. Shiwoore unapwe na uringyi lwa dede. 7Israeli na Yuda mmbo vashevesyo, shivaviire vakae nisha sha llya kasha. 8Shivailyise kya ngyulyamari tawo. Valetana shavaswa. Shisarye ulyamari na uravi lwawo. 9Yerusalemu mmbo kushevaa kimayeny kya ifura na nnduma na wiidimi kwakwa, kutani wo vandu ulaniny vaireya na ireremya-u elyi vashitaa kya findo fisha shatannya vandu vakwa va Yerusalemu na kya iivesyo elyo nshendee muriny.”
10Nndumi Iruva kaamba, “Vandu vakeyaamba ando yaa mmbo kukee sha kasa koomu, kulaifo vandu nta mafisi, nta mbarekwa-fo. Mashika miri ya Yuda na shia ta Yerusalemu ntitiri vandu-fo nta nkwiifo findo fya mmba-fo. Lyo numa musheitaa kyavayo. 11Fyoorongye fya ifura na nsia wa ngyalyi tisheitiwa-se. Musheita vandu vashimbaa elyi varie firaso fyaawo fya fyaanu mmba yakwa, veshaamba,
‘Aniny Nndumi Iruva muni matorito,
kimmba Ndumi Iruva ni nsha nalyo ikunda lyakwa lya llung'anu.’
mmbo nshevikyaa uruka elu mbora lusheva sha llya kipooka.
Ni yeny Nndumi Iruva shaamba indo.”
12Nndumi Iruva muni finya kaamba. “Kunu urukeny elu lluvakye kasa koomu kulaifo nta vandu nta findo fyeevikya, mmbo kushekaa-fo ura lwa findo, veni veese-fo moonri awo. 13Efo miriny yeefo mafumbu neefo si ya mafumbu, na taari ya sinde ya Yuda, neefo urukeny lwa Benyaminy. Neefo myuungony iringitye Yerusalemu, neefo miriny ya Yuda, veeveni moonri vashefura vesheekena maronda awo, ni yeny Nndumi Iruva shaamba indo.”
14Nndumi Iruva kaamba, “Kyeeri kiifo kishaa elyi nsheinutyaa kyaasa kilya shilevika na vandu va Israeli na Yuda. 15Kyeeri ekyo mmbo nshevasangyaa nndu nsha wa ufyari lwa Davidi. Na mangyi yeu mmbo ashetana mesha na usumanu urukeny koose. 16Vandu va Israeli na Yuda mmbo vasheona vashekyirwaa na muri va Yerusalemu mmbo uvaa lleke. Na muri wawo uvaangwa, ‘Nndumi Iruva ni ukyiro lweru.’ 17Yeny Nndumi mmbo shavika kyaasa sheelyi wo kyeeri mmbo kushekaafo nndu wa ufyari lwa Davidi nave mangyi ya Israeli, 18na Valevi va ufyari lwa Levi vashirundye neeninngya firaso fyeekora na muro, na fya nswa na firaso fyeekora na muro.”
19Nndumi kashivia, 20“Mmbo shavika kyaasa na nsanyiny na kio, fikae-fo kyeeri kyoose. Kyaasa eki nkikaa kimande-fo. 21Na indo-da shilevika kyaasa na nsero wakwa Davidi, kwakwe nooke-fo mangyi. Shavevika na kyaasa na ufyari lwa Levi, wo vave vashirunndyaa. Na fyaasa efi mfishaalashikaa-fo. 22Mmbo shivikyaa ufyari lwa nsero wakwa Davidi mbora, kiwo neelo lwa Levi vafumbuke, nta valavaa yeekyena vave shaasa tikee nyinyiri ta nginii-u ao nsanga wa mbai ya nruva.”
23Nndumi Iruva kashivia, 24“Kwiitye shaasa vandu vakeyaamba mmbo shilelema nrima wa Israeli na Yuda yewo shilevasauwa? Nkyo ulaalu vakavalola na kiila valakivalollye m'vandu. 25Kyeendi yeny Nndumi Iruva mmbo shivikye kyaasa na kio na nsanyiny. Shavevika-fo na fyeeso fyeeshillya ngina na si. 26Naa dede shaasa shivikye-u efyo fyoose, niindo-da nsheringaa kyaasa kyakwa na ufyari lwa Yakobo na ufyari lwakwe na nsero wakwa Davidi. Mmbo nshevika umwi wa ufyari lwa Davidi nashillye va ufyari lwa Abrahamu, na Isaki na Yakobo. Mmbo nshelyillyaa vandu vakwa shivavikye mbora.”
Currently Selected:
YEREMIA 33: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
