YEREMIA 35
35
Yeremia na Varekabi
1Kyeeri Yehoiakim mwana wa Yosia ekee mangyi ya Yuda, Nndumi Iruva mmbo eshivia, 2“Enda sora Varekabi kurere nawo. Kuveende kulya mmba ya Iruva kiryeny kimwi kuvaniinge mfinyo.” 3Neeny sheenda sheepoo ufyari loose lwa Varekabi-yaasania mwana wa Yeremia ungyi ekee wa Habasinia na vana vamaye woose, 4shaveende kulya mmba ya Iruva, shavaata kulya Igdalia, kiria eki mmbo kyekee uwe ya kiria kya Maaseiya wa shalumu ekee nndu nniini efo mmba ya Iruva, yekee nkufii na firya fya vasongoru vengyi-da. 5Naasa shadeesya mbata na ndeeva shafiishura mfinyo mbee ya Varekabi, shavavia, “Ngeny mfinyo mwaangu.”
6Lyo wo vakaamba, “Llunii mfinyo-fo-te. Nniini weeru Jonadabu wa Rehabu mmbo eluvavasa lulani mfinyo nta vana veru numa yeeru-fo! 7Vakavelwiima lulatani mmba nta irema, na lulavaaye misabibu nta yuura-fo. Mmbo eluvavasya lukaa meemeny nambo lukae kunu urukeny elu lukee veny. 8Niindo lutanaa shaasa nsongoru weeru Jonadabu mwana va Rekabu aleluvia. Yese llunii mfinyo tara-fo, nta vaka veru-fo, nta vana veru va kyuumi nta va kyika-fo. 9Llutana mmba shisha kyeny-fo meemeny lukaa, lulatiri nta misabibu, llutiri marema a irema nta ivaaya mbeu-fo. 10Mmbo luletana fyoose shaasa nniini weeru Jonadabu aleluvia. 11Lyo kyeeri Nebukadnesa aleshiingillya uruka, lukakunda isha Yerusalemu nambo tupu lukae kwaasha na ushilyi lwakwe na vasikari va Siria. Nkyo kimaruma lukee kunu Yerusalemu.”
12Naasa llyo Nndumi Iruva muni finya. Iruva wa Israeli aleshivia sheende shindevia vandu va Yuda na Yerusalemu, 13“Yeny Nndumi Iruva, yeni vandu nkiki elyi mukelema ishaarannya mutani efyo shilemuvavasya. 14Vandu va Jonadabu mmbo valeirikya mavavaso akwe vakalema mfinyo, na kufike inu kulaifo mwiina mfinyo. Lyo yeny sheengera irera neeni lyo nkwiifo nndu asharannya-fo. 15Mmbo shileengera imurikya varundi vakwa wo vakisuku, vakamuvia mure shia tany shiravi mutani filya fisumani. Vakamwiikimba mulainndye maruva a wongo nta yaarunndya, nambo mukae na ifura urukeny llwa shileniinga vaniini vany, Lyo mmuleshaarannya nta ishisara-fo. 16Lyo vandu va Jonadabu wo mmbo vakeindya deny filya nniini waawo alevavia, lyo yeni-fo. 17Nkyo ulaaluny, yeny Nndumi Iruva muni finya. Iruva wa Israeli mmbo nshemwengyee urumato llwa shaasa shileamba, yeni vandu va Yuda na Yerusalemu. Shitani indo mashika mmuleshiirikya lya shilerera neeni-fo, nta shamuvaanga mulashiirike.”
18Naasa llyo shilevia vandu yewo na Rekabite sheelyi Nndumi Iruva wa Israeli mmbo aleamba, “Mmbo muleinndya ivavaso lya nniini waany Jonadabu alemuniinga, mukasora mavavasyo akwe moose, fyoose alemuvavasya mukasora. 19Nkyo ulaalu yeny, Nndumi Iruva muni finya. Iruva wa Israeli, mmbo shavika kyaasa sheelyi Jonadabu mwana wa Rekabu efo kwakwe mmbo kushekaa-fo nsoro asheshirundyaa, wo kyeeri.”
Currently Selected:
YEREMIA 35: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
