YEREMIA 30
30
Kyaasa kya Nndumi Iruva kwa vandu vakwe
1Naasa Nndumi Iruva, Iruva wa Israeli: 2kashivia, “reiya kyitabuny kyafo, findo efi fyoose shikekuvia, 3Mashika kyeeri kishaa elyi nshewouwaa vandu vakwa va Israeli na Yuda. Mmbo nshevaviraa urukeny lwawo llwa shileniinga vakuu-vawo, vashekaa-fo. Ni yeny Nndumi Iruva shaamba indo.”
4Nndumi Iruva mmbo avia vandu va Israeli na Yuda indi,
5“Mmbo shileeta kiiyo kyeeresye, kiiyo nta nshi ufoo-fo.
6Ulaalu irisha kukusare,
swaa, ndesa nndumi ashiraa mwana?
A nkikiny shilollye womi vevikye woko yoo ndeu sha nka akeeniingwa mwana.
A nkiki elyi fisaangu fyawo fitefukye?
7Kukeesha nkonu weeresye, wiirye mikonu ingyi myoose.
Nkonu wa ngatara niini kwa vandu vakwa, lyo mmbo vashekirwaa.”
8Nndumi Iruva muni finya mmbo aamba, Elyi nkonu yeto ushaa, mmbo nshefishaa kifingyo ekyo kikee efo singony tawo, shiwoote mise yeyo ivafingye, nta valakivaa mashinga a veny. 9Lyo mmbo vashirundyaa yeny Nndumi Iruva muni finya, Iruva waawo, na mangyi waawo wa ufyari lwa Davidi yeto nshemmbikaa
10Vandu vakwa nta mulairyaa-fo, vandu vakwa nta mulamatuwa
Mmbo nshemwauwaa efo urukeny yelo lwa kwaasha, efo mukee mashinga.
Mushewuya kyeny mukaye na unapwe. Mukee kipwa, nta mulakiryaa.
11Mmbo ushemusheyaa shimwaane,
Shimamite vandu va masanga efo munyanyatye lyo yeni nshimulyamaraa-fo.
Nshiraa shilamukapa lyo fo.
Shammukapa lyo mmbo nsheesyaa. Ni yeny Nndumi Iruva shaamba.
12Nndumi mmbo avia vandu vakwe indi, “Matiinga any
nnyavaa ishiisa-fo
nta fishavere fyaany mfivaa ivavara-fo.
13Nta nkwiifo nndu ashiidimaa imuvavara-fo, nkwiifo nri wany-fo.
nta ivika nsia lya ishia-fo.
14Vakunde vany woose mmbo vammuurekywa, mmbakimusarye-fo
Mmbo shilemukapa sha nkiduva, ngapo yafo ikarovya
elyi maravi afo afumbuka, na ulyamari lwafo lukang'ana.
15Kulakiaa kimaruma kya ivavyo lyafo, nkutiri nri-fo.
Mmbo shilekukapa indi, mashika elyi makasha afo akee meengyi na maravi afo akafumbuka.
16Lyo ulaalu yewo vashekuwonnya nawo mmbo vashewonnywa
na vakiduva vafo woose vashekamarwa mfungwa.
Na woose vashekuwonnya nawo vashewonnywa
neewo vashekulamyaa ikusoka masaa afo, nawo vavesokwa
17Mmbo shekushisaa, shishiise matiinga afo, na kyikava
vakiduva vafo vaamba, ‘Sioni mmbo anrekywa-fo, nkwiifo nndu
ansarye-fo: Nnyeny Nndumi Iruva shaamba indo.’
18Nndumi Iruva aamba indi,
Mmbo nsheviraa vandu vakwa urukeny lwawo, shilyillye wo mmba yaawo
Yerusalemu mmbo ishewuyaa-se itanwa, na mmba ya mangyi ivauwa.
19Vandu valelefo mmbo vasherumishaa, vaonise unyanga lwa ifura.
Kimmba shivavikyaa mbora mmbo vashefumbukaa,
mbora yakwa iveengye nnduma.
20Nsheviirya vandu yeva finya ilya ya kasha, vaviiryo finya deny.
Neewo woose vashevalamyaa shivakape,
21Vevashillya vasheukaa kwawo veni
Na mangyi waawo nave waawo veni
22Nawe nashisheye elyi nshembiaa
A mmbi yeto ashaa nalavaangwa?
Mmbo vashevaa vandu vakwa, Neeny shive Iruva waawo.
Ni yeny Nndumi Iruva shaamba indo.”
23Unyafi lwa Nndumi Iruva nsha uraato uniini, uraato lwa finya lusheira efo kutani mirweny ya vandu varavi. 24Nalo llushemandaa-fo kutani lwatana ekyo lwasheyaa. Mikonu yeyo ishaa elyi vandu vakwe vashemanyaa eki nisha.
Currently Selected:
YEREMIA 30: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
