YEREMIA 31
31
Iwuya lya Israeli kkyeny
1Nndumi Iruva aamba indi, “Kwiifo kushaa kyeeri elyi nshevaa Iruva wa ngyufyari toose ta Israeli, nawo vaveva vandu vakwa. 2Kulya kasa mmbo shileora ilyilya lyakwa kwa vandu valekya ifwa. Kyeeri vandu valekunda iimuya, 3shavasheya shuuka kwashaa, yeni vandu va Israeli, mmbo shilemukunda kyeeri kyoose, ikunda lyakwa lyikava lya kyeeri kyoose. 4Mmbo nshemuumbaa-se, muveipoose finanda fyany mmpoke iimba na ifina. 5Muuke-fo mupoke-se ivaakya misabibu efo fidoorony fya Samaria. Neewo vavaakya vasheelya ndunda tavayo. 6Yee, kyeeri kiifo kishaa elyi varingyi vashevaangana wooka efo mafumbuny a Efraimu, vaambe, ‘Nkye nndeny-te lurwe na Sioni kwa Nndumi Iruva weeru.’”
7Nndumi mmbo aamba indi,
“Imbya Israeli na ifura, ewe kutiri finya ngota masanga,
Imba kiimbo kya yaarafuma,
Nndumi Iruva ammbouwa vandu vakwe, kakira woose veesaye-fo.
8Mmbo nshevaviiraa wooka na taari ya ndoo, shivasanyirye
wooke taari toose ta ulana.
Vafu miso na fitongororo vasheshaa nawo.
Vaka valemwa sanda na valya vakee kufii iwona,
vawuye woose vave ironda iniini lya vandu.
9Vandu vakwa mmbo vashewuya veshiiyaa, vatereve
shivatetere veewuyaa.
Nshevateteryaa mgyusokeny ta mura, shieny shisha valasinga-singa.
Yeny mmbo shikee nde kwa Israeli, na Efraimu kava mwana wakwa mmbe.”
10Nndumi Iruva aamba indi, “Eni vandu va masanga, aranyiny-te,
shirere neeny shuuka kwaasha mbai ya yeeve.
Mmbo shilenyanyata vandu vakwa, lyo mmbo nshevaummbyaa,
shuuke-fo shivaringe sheelyi mwiisi aringaa ironda lyakwe.
11Mmbo shalleka vandu va Israeli, shavaauwa maakony a vandu vatiri finya.
12Mmbo veewuya vishiimba na nsia yoo ifumbuny lya Sioni
veefuraa na mbora yakwa
mbora ta nswa na mfinyo na mafura.
Moonri na ng'umbe
Mmbo vavakaa irema lyikee inise nisha, vawoni wo kindo kivating'aa
13Nawo vana va kyika mmbo vashefuraa na nsia, na womi vakuu na vakoo vasennyo
Mmbo nshevaviryaa muu, shaalashe kiiyo kyawo kive nsia,
na tingwa tawo tive ikyesa.
14Vakohani nawo mmbo vashewuura shoonga shisha.
Vawonisye vandu vakwa woose kilya vakundye.
Ni yeny Nndumi iruva shaamba.”
Ulyilyi lwa Nndumi Iruva kwa Israeli
15Nndumi Iruva kaamba,
“Ni unyanga lwaitiwa kulya Rama, unyanga lwa kiiyo kiniini
Ni Raheli aiya kimaruma kya vana vakwe,
mmbo aiya nalakunde ilelembwa.
16Kulakiiye-fo, angata misoru yafo, Efyo fyoose kuletannya vana vafo mfiraa
filakumbuwaa-fo, nawo vashewuyaa kyeny wooke urukeny lwa vakiduva vawo.
17Kwiiyo ivika nsia, vana vafo vawuye na kyeny, Ni yeny Nndumi Iruva sharera indo.
18“Mmbo shaita vandu va Israeli varera na irovyo vakaamba,
‘Nndumi Iruva mmbo lulevaka ifisi lya kasa, lyo kwalulosha ikwiinndya,
Luviireny-dwa, mmbo lulangye ikuwuiya, ewe Nndumi Iruva weeru.
19Mmbo lwekukapa mungo, lyo lukalanga iwuya uviny, llya kulelukapa,
mirwe yeeru ikaishwa ting'wa. Lukasuka na irovyo,
elyi lluletana ulyamari uka udu lweru.’
20“Israeli, kukee mwana wakwa nkunde nnu, shinkunndye nnu deny.
Elyi shakusenda mmbo shasennywa nnu,
Nrima wakwa mmbo wasembeya kufii neewe.
Mmbo nshekulyillyaa.
21Deesya shia kuvike-fo na fyoolongya; kulollye shia ilya kuleira mbee.
Wuyeny, yeni vandu va Israeli. Wuyeny kyeny miriny ilya mulera.
22Mmbo mushetirwaa nnyinyira fika indii, mukee va iirikyo yaangu?
Shansongosya kindo kingyi kiiya, sha nndu nka aruyaa nndumi.”
Ulyimi lwa vandu va Nndumi
23Nndumi Iruva muni finya, Iruva wa Israeli aamba indi,
“Elyi nsheviraa vandu urukeny lwawo, llyo vashereryaa
efo urukeny lwa Yuda na miri ya vayo, vaambe,
Nndumi Iruva navikye ifumbu yeele lya Yerusalemu mbora, yoo ando kweele akai.
24Vandu mmbo vashekaa efo Yuda neefo miriny ya vayo myoose, kukaefo varemi na veesa findo fyawo. 25Shiviirye muu yewo vaaraye nriminy, neeto akee mfwafwa wa mwiili shimmbirye muu. 26Nkyo vandu mmbo vasheamba, ‘Mmbo shilelala shakwiipoo shambuiyo muu deny.’
27“Yeny, Nndumi Iruva mmbo shaamba kwiishaa kyeeri elyi nsheeishuraa uruka lwa Israeli na Yuda vandu na findo fyeevikya. 28Na shaasa shelatya waarya shamwiilwa, shamusambwa, shamutuula, imulyamara na imulyisa ukiva, ni kiwo-da shilatyaa waarya lwa imuvaaya na imuvangisa wiyya. 29Kyeeri ekyo kyikamfika vandu nta mmbashekyaamba,
‘Vande veru mmbo vavakye ndunda tivavaa-fo.
Na vana vakawona kivawo-fo.’
30Kyeendi mmbo vana vashelyaa ndunda eto mayoo awo navangiswa, na nndu nafwe kyeendwa ni ulyamari lwakwe we muni.”
31Nndumi Iruva aamba, “Kyeeri kiifo kishaa elyi nshevikaa kyaasa kiiya na vandu va Israeli na vandu va Yuda, 32nkishevaa sha kilya kya mbee shilevika na vakuu vawo llya shilewoota kulya urukeny lwa Misri-fo. Na yeny kwawo mmbo shileva sha Nndumi, lyo wo mmbaleringa kyaasa kilya-fo. 33Kyaasa ekyo kiiya nshevikaa na vandu va Israeli mmbo kishevaa indi, Mmbo nshevika mavavaso akwa efo nriminy wawo shiareiye-fo shive Iruva waawo nawo vave vandu vakwa. 34Nkwiifo nndu asheloshaa urooye kya imanya Nndumi Iruva-fo, kimmba woose vasheshimanyaa, kupookya ndu kundefika nniini. Mmbo nshevasaryaa ulyamari lwawo nta shilakikummbwaa uravi lwawo. Ni yeny Nndumi Iruva shaamba indo.”
35Nndumi Iruva mmbo eende mwi wakwe uve saa ya nsanyiny
na mwiiri na nyinyiri fimike kio,
Kasarya yeeve lyive na matundulu, irina lyakwe ni Nndumi Iruva muni finya
36Mmbo avikye kyaasa kaamba kyeeri ngina na ulana fiiyo,
na Israeli nniindo-da ashekaa-u.
37Kukooye ngina yeevaa yeesa, na ulana si lusaiywa
llyo-da eeshidimaa ilema vandu vakwe va Israeli, kya efyo vatanyi.
Ni Nndumi Iruva aamba indo.
38“Kyeeri kiifo kishaa,” ni Nndumi Iruva aamba, “Elyi Yerusalemu ushetanwaa-se uve muri wakwa, kuuka Nnara wa Hananeli taari ya nkwaany kundekooya Ngiri ilya ya mbai. 39Na nnyanu wa vayo wuuke taari ya nkwaany kundekooya ifumbu lya Gareb kuringitye kukooye Goah. 40Imungo elyo yoose, efo vafu varikwaa na findo yeeryo, na marema moose imungony lya kidorony kweende indo kundekooya ngiri ya Frasi kulya taari ya ngameny, koose efo kuve kweele kwakwa. Muri yeu mmbukaa usambuwa ao iwunduwa-se-fo.”
Currently Selected:
YEREMIA 31: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
