YEREMIA 29
29
Barrwa ya Yeremia kwa Vayuda vakee Babilony
1Yaa nng'u marero a barrwa nkisuku Yeremia eruma Yerusalemu kwa vasongoru va mifungwa, na kwa vakohani, na veawuya fisuku, na vandu woose, yewo Nebukadnesa evakamara mifungwa uka Yerusalemu fika Babilony. 2Yekyi nkyekee nnuma ya Yekonia, na maaye va mangyi, vakape-ndafu, vasongoru va Yuda na Yerusalemu, mafundi, na vafuru venrisha Yerusalemu. 3Barrwa nnyerikwa kwa woko lwa Elasa nsero va Shafany na Gamaria nsero wa Ilkia, yewo Sedekia mangyi ya Yuda evaruma Babilony kwa Nebukadnesa mangyi ya Babilony. Ikaamba indi; 4“Nndumi Iruva wa matorito, Iruva wa Israeli aamba, kwa mifungwa myoose yeni shilemurwaa ushingyeny uka Yerusalemu fika Babilony; 5Taneny mmba mukakaa-fo; reminy marema mulye fimu fya vayo. 6Oreny vaka mwiire vasero na sambura; alyikkyeny vasero vany vaka na niingyeny mumu sambura tany taalyikwa naambo veere vasero na sambura; fumbukyeny mweengyereke nta mulaanngwe-fo. 7Lyo ruuyeny iviiri lya uruka yelo shilemurwaa ushingyeny, lutereveny kwa Nndumi Iruva, mashika iviiriny lya vayo ng'u muwona iviiriny lyany. 8Mashika Nndumi Iruva wa matorito, Iruva wa Israeli aamba; mularee vakisuku na veelafya vakee nnang'ani yaany vamulembe-fo, nta mulaarannye moorya yoo vakeeyoorya-fo, 9mashika ni wongo yelo vakeeyawuya irina lyakwa, nta nshilevaruma-fo, ni Nndumi Iruva aamba.
10“Kweekyo Nndumi I ruva aamba: elyi myaaka makumi mfungare ishisyaa ya Babilony, Yeny shimusheyaa, shishemufitya kyaasa kyakwa na imuuviira yaandi. 11Nndumi Iruva aamba; Shiishi uramba shimutirie, uramba lwa iviiri nta nshe lwa makasha-fo, imuniinga muu mwaasha na nnduma. 12Lyo musheshivaanga, mweende mushitereve, neeny shimwiite. 13Mushiruuya mushiwonise; elyi mushiruuya na mirima yaany myoose, 14mmushikooya ni Nndumi Iruva aamba, Neeny shisheviira mesha any na imusangyirya uka masangyeny moose na wo ando shilemukamara, ni Nndumi Iruva aamba, Neeny shimuviira fika alya shemwiipoo ivakamara ushingyeny.
15“Mashika muleamba, Nndumi Iruva alelurumya veawuya fisuku kunu Babilony, 16Nndumi Iruva aamba ule kya vamangyi vakaaye kitima kya Davidi, na kya vandu vakee muriny yeu, vana va mau kularevalekamarwa ushingyeny neeni: 17‘Nndumi Iruva wa matorito aamba ule, Loleny, nshikeevarikkya usu, shaa shinyaasi na ndwari sheeresi shimwaallwe sha tiini shiporu, ilashhidima ilyiwa. 18Nshivallatya na usu, shaa shinyaasi na ndwari sheeresi, shivaallwe iipalwa lya wo umangyi urukyeny, vaaluke kyidengo, kyindo kyeeresi, kyindo kya mwaala, na kyindo kya iteendwa nnang'ani ya masanga moose yefo shilevarwaa, 19Mashika mmbaleiindya marero akwa-fo, ni Nndumi Iruva aamba, yoo shemurumya wo kyeeri shiiruma varundi vakwa veawuya fisuku, indi mulavaarannye, ni Nndumi Iruva aamba 20Arannyiny irero lya Nndumi Iruva, yeni moose shilemukamara mifingwa uka Yerusalemu fika Babilony: 21Nndumi Iruva muni matorito, Iruva wa Israeli aamba ule, kya Ahabu nsero Kolaya na Sedekia nsero va Maasea, yewo vakemwaauya fisuku fya wongo na irina lyakwa: Loleny, nshikeeivangya wokony lwa Nebukadnesa mangyi ya Babilony, navatummwe mwiilollye.’ 22Kyeendwa ni wo kyidengo yekyi nkyishevaa sumu kwa mifungwa myoose ya Yuda yefo Babilony: ‘Nndumi Iruva nakwaallwe sha Sedekia na Ahabu, yewo mangyi ya Babilony yewookya murony,’ 23Elyi valetana usembo yefo Israeli, vakatuusa vaka va vaamrasa vawo, vakarera marero a wongo na irina lyakwa kulareshirevaruma. Ni Yeny shimuni shiishi, na Yeny ni nkureekyi, ni Nndumi Iruva aamba.”
Barrwa ya Shemaiya
24Na kya mbony ta Shemaya va Nehelami kusherera, kwaambe: 25“Nndumi Iruva muni matorito, Iruva wa Israeli aamba ule: Nkuleruma barrwa na irina lyafo kumuni kwa vandu woose vakee Yerusalemu, na kwa Sefannya nsero va Maaseya nkohani, na kwa vakohani woose kwiishaamba, 26‘Nndumi Iruva nnyalekuvika nkohani ando a Yehoyada nkohani, isalallya mmba ya Nndumi Iruva kwa wo kyisaya na kyiroro yewo vaawuyaa fisuku, imwaavika ngove na mise ya minya. 27A ulaalu nkyikyi kulare kulekangaya Yeremia wa Anatoti yeto akeemwaawuya fisuku?’ 28Mashika nnyalelurumyaa Babilony, eshaambaa, ‘Ushinga lwany llwa kyeeri kyaasha; taneny mmba mukakaa-fo, reminy marema any mulye fimu fya vayo.’”
29Sefannya nkohani kasoma barrwa yei kurwiny ka Yeremia nkisuku. 30Llyoony irero lya Nndumi Iruva lyikasheya Yeremia lyikaamba: 31“Rwaaya vandu woose vakamare-mifungwa, kwaamba, ‘Nndumi Iruva aamba indi kya mbony ta Shemaya wa Nehelami: Kya elyi Shemaya alemwaawuya fisuku kulare shilenruma, na imuniinga nsia va irero lya wongo, 32Kweekyo Nndumi Iruva aamba: Lola, nshikapa Shemaya va Nehelemi na ngyeeri takwe; nalawonise-fo nndu umwi nnang'ani ya vandu yeva alolyaa mesha ntannya vandu vakwa, ni Nndumi Iruva aamba, mashika elyi alerera marero a ilyang'aa Nndumi Iruva.’”
Currently Selected:
YEREMIA 29: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
