YEREMIA 13
13
Soori ya kisiny shimamiri
1Nndumi Iruva kashivia, “Enda kwandoora soori shimamiri ya kisiny, kundeifinga kisiny nta kulasheisangya-fo.” 2Naasa shoora soori ya kisiny, shaasa Nndumi Iruva aleshivavasya; shafinga kisiny, 3Naasa irero lya Nndumi Iruva lyikashisheya-se. 4Kashivia, “Ipoo soori ilya kufingyeny kisiny kweenda fika Efrate kundeisuruma efo mmbangany ya iwe.” 5Neeny shakwiipo shandeisuruma kulya efrate ndesa Nndumi Iruva aleshivavasya. 6Yiikyira mikonu miingyi, Nndumi Iruva kashivia “Kwiipo kweenda Efrate kundeepoo-fo soori ilya shekuvia endasuruma-fo.” 7Neeny sheenda Efrate, shandelukwa ando alya shesuruma soori ilya. Ate soori ilya mmbo yemma ilyamarika.
8Naasa irero lya Nndumi Iruva lyikashisheya, 9lyikaamba: “Naakwa nnyendo, mmbo shilyamaraa ukushobi lwa Yuda na ukushobi yelo uniini lwa Yerusalemu, ni Nndumi Iruva aamba. 10Vandu yeva valyamari, valakundye yaarannya marero akwa vandu mbafu valatya efyo fya makusaro awo meni vakalatya yiinndya maruva engyi, mmbo vashevaa kyimwi sha soori ilya ya ifinga kisiny, ilya ilemma ilyamarika. 11Ngata soori ikwiinivaa efo kisiny kya nndu, niindo shetannya vandu woose va mmba ya Israeli na vandu woose va mmba ya Yuda vashikoosorye yeny Nndumi Iruva, naambo vakooye iva vandu vakwa, irina lyakwa, lyirumishwa na itumbe lyakwa lyo vakalema yaaranya.”
Kyikombe kya mfinyu
12“Mmbo kuvavia marero yaa: Nndumi Iruva, Iruva wa Israeli mmbo aamba, ‘Wo kyikombe mmbo kishiishurwa mfinyu.’ Nawo mmbo vakuvia, ‘Ni kya dede mmbo luleeshi sheelyi wo kyikombe ni kuti kyiishurwa mfinyu?’ 13Naasa mmbo kuvavia, ‘Nndumi Iruva mmbo aamba: Lola, Nshiveishuraa unangwa vandu woose va uruka elu, vamangyi yewo vakaaye kitima kya umangyi lwa Davidi, vakoani, vakisuku na vandu woose va Yerusalemu. 14Mmbo nshevakapanisa wo nndu na ungyi, vandeye vakapani na vana ni Nndumi Iruva aamba. Nshivalyillya nta ivafwaaya-fo ni kuti shivanyamare.’”
Wiikyimbi lwa Yeremia
15Looteny maarwi mukaaraanya, mukara ukushobi,
mashika ni Nndumi aamba.
16Itumbe ni lya Nndumi Iruva, Iruva wafo,
kulaore ammeende ireema,
nta kulare kwankapa urende, lwafo ifumbu lyitiri ireema,
na kyeeri kusheruuya sa yaluuke ireema,
ireema lya makimima.
17Indi kulammirikya,
nrima wakwa mmbo usokywa mfyoova kyimaruma kya ukushobi lwafo.
Na miso akwa mmbo ashepusuka misoru kyimaruma kya ivavywo nnu.
Kyimaruma elyi ironda lya Nndumi Iruva lyankurikwa mifungwa.
18Enda kwaviva mangyi na maaye:
“Valekeye kitima kya umangyi lwambwa,
mashika utore lweeke nrweny mmbo wafo lwammbwa-si.”
19Miri ya Negebu yaaraywa,
kuleefo nndu asherrwa,
Uyuda shoose yankamarwa mifungwa,
shoose deny yankarrwa ushingeny,
20“Inuya miso afo kwalla uwe,
valya vakesha wooka taari ya ndoo.
Nkwi lyikai ironda llya kuleniingywa,
ironda lyafo isha?
21Mmbo kushaamba-kyi kyeeri mbuya vashekushillya yewe kumuni,
yewo kwevelosha kumuni iva vambuya vafo
A ndesa, nkushevavywa-se,
sha nka akeelyiwa ni usu lwa mwana?
22Nakwakooya kaamba efo nriminy wafo,
‘Nkyikyi elyi mbony eti tashikooya yeny?’
Ni kyimaruma kya uravi lwafo uniini,
kwaambuwa soori kwarewa mbereto,
na mavavyo ngyayony tafo.
23A ndesa Mwiisopia ashidimaa yaalasha fwana yakwe,
ao nyamandu mavara-vara a vayo?
Kweekyo mmbo kushiidima itana mesha
kwankooya kwiishivye itana makasha.
24Mmbo shinyanyataa sha kiluulyi
kyivivitwa ni uraato efo kasa koomu.
25Elu llo weesi lwafo,
llo waavi lwafo lukwaani na yewe, ni Nndumi Iruva aamba,
kyimaruma kuleshirekywa yeny
kwalisirya yewo veamba wongo.
26Yeny shimuni mmbo shikwaammbwa soori fika nrrweny,
na usutu lwafo lulollywa.
27Shilollya ulyamari lwafo, utuusilwafo,
na makasha engyi moose efo mafumbuu na mareminy.
Woshiny llwafo, yewe Yerusalemu!
Mmbo kufika indii kutani kwasheilyiswa?”
The Holy Bible in Kimashami © Bible Society of Tanzania, 2016.