YEREMIA 12
12
Yeremia adeeryaa Nndumi Iruva
1Woi Nndumi Iruva, yewe nkukee nsumanu elyi shikukunung'unnyaa; naakwa ni indo shikoosiraa kya mbony ta usumanu. A nkyikyi vandu varavi vavesywaa? Neewo vambafu vakakukaya kippwa? 2Nnyewe kumuni kulevaronga, nawo vakavamba miraarii; vakammya vakavika ndunda; yewe nkuishiwa nnu firommuny fyawo indi mirima yaawo ikakaa kwaasha neewe. 3Lyo yewe Nndumi Iruva mmbo kushiishi; nkushilollye, na nkweesa makusaro akwa. Woomuye poo sha yoonri lyindeshishwaa, vadeesye kya urumato lwawo. 4A mfika indii uruka lushaatarikaa, na mare a marema inaa? Kyimaruma kya uravi lwa veekaa muriny yeto mafisi a ngoroshony na ndeye nfikeemamitwa, vandu mmbakeyaamba, “Nnyalollyaa ufishyony lweru-fo.” 5“A kwakooya kulerisha na marende vandu vakakwaarisa-le, a ni inda kukweesa na frasi? Na kwakooya kwalelemwa ando kurambalalyi, nkushiidima inda yefo kasa ka Yordan? 6Mashika naakwa ni vana va mau va mmba ya ndoo, ra neelyi vekuriingya; vakaffwaa kyuumu; na ikurerya marero mesha kulavairikye-fo.”
Nndumi Iruva aisityo-u vandu vakwe
7“Shammiisityo-u mmba yakwa, na ireellya ding'u yakwa; shanrambikkya nkunde wakwa maakony a vakyiishi wakwe. 8Ding'u yakwa yanshiviyya sha miiso ya nturu, ammiipoo unyanga kyilasha kyakwa, kweekyo nshammusswa. 9A ding'u yakwa mmbo ilevaka ndeye shisha ireiyywaa? A ngoru ntinringitye taari toose? Endeumbya mafisi moose a ngoroshony, nasheratwa-ratwa. 10Veesi veengyi mmbo valelyamara irema lyakwa lya misabibu, vakavavara waavi lwakwa, vakaallwa kyaau kyakwa kyiviiri, kasa ka nng'alo. 11Lukava kasa koomu, lukava nrapu misony akwa. Uruka loose lukava kasa, kulaifo nndu asara kyavayo. 12Neefo kwammba kasa fidooro-u, veelyamara vakasha-fo; mashika usu lwa Nndumi Iruva llumamitaa uka taari imwi ya uruka fika ingyi; kuleefo umwi atiri unapwe. 13Mmbaleera nganu vakeelula miinga, vakarunda na sina valawoni mbusha. Mmbashiilulaa veesukkywa kyeendo ni nyashi ya Nndumi Iruva.”
Kyaasa kya Nndumi Iruva na Vaamrasa va Israeli
14Nndumi Iruva aamba indi kya vaamrasa varavi yewo valepaana ding'u yeyo shilenniinga vandu vakwa Israeli: “Lola, mmbo shivakurrwa kuru urukeny lwawo, na mmba ya Yuda shiikurrwe kuru nnang'ani yaawo. 15Shammaa ivakurrwa, shivalyillye, shivaviire lyingyi wo umwi urukeny lwa ding'u yakwe. 16Na kisheshaa kyeeri, kwakooya vakulosha na nrima imanya shia ta vandu vakwa, ilya mboo na irina lyakwa veshaamba, ‘Nndumi Iruva eefo na muu,’ shaasa velosha vandu vakwa ilya mboo na Baali, llyoony vashekaa nnang'ani ya vandu vakwa. 17Lyo, kwakooya isanga lyive lyilashaarannyaa, mmbo shishelyikurrwa kuru na ilyimamita, ni Nndumi Iruva aamba.”
The Holy Bible in Kimashami © Bible Society of Tanzania, 2016.