YEREMIA 14
14
Kyeeri kya mwi uvavaa kyuumu
1Irero lya Nndumi Iruva lyesheya Yeremia kya iwwo mmbwa:
2“Yuda nnyakeiffwa na ngyiri takwe ntikeideeka;
vandu vakwe mbakeeikwalala yefo si,
na kyiyyo kya Yerusalemu kyanrwa na uwe.
3Vasongoru vakwe mbarumaa mashinga awo mura;
akasha fika firoriny, akauwa mura, akaviira matete aruu,
eesukkywa na isaukwa, akasikkya mirwe yaao.
4Elyi mmbwa ileefo, na sumbai ikakaluka,
veerema vakafwa nrima deny, vakasikya mirwe yaawo.
5Naakwa nngoroshony sarya yamfeiya-fo,
ikara-fo ngurana elyi mare naleefo.
6Na itiko nalyo lyikasalala uwe ya kidooro,
lyikafura mmbwa sha iparwe
nta miso avayo nnyalollye-fo, mashika elyi mare naleefo.
7‘Lla neelyi uravi lweru alollyo paa,
Lweekye-dwa woi Nndumi Iruva, kyeendwa ni irina lyafo;
mashika ni keengyi lwankukapa mungo, lukakulyamarya.’
8Ni yewe kukee ngarami ya Israeli, nkyira waawo kyeeri kya ikyiva, A nkiki elyi kukee sha muny urukeny lweru, sha nndu wa kyaaro wa nkonu umwinsi? 9Nkyikyi elyi kwavaka nndu mweerei ashiraa, ao sha nsikari nalakitiri finya yekabana? Lyo dede Nndumi Iruva kukee neese na llukesendwa na irina lyafo; kulalure-fo mmbe.”
10Nndumi Iruva mmbo arera indi kya vandu yeva, “Mmbo valangye iraraa na shia, nta mbafiisa ngayo-fo; kweekyo Nndumi Iruva nnyavakunndye-fo, ulaalu nnyakummbwa uravi lwawo navakape kya ulyamari valetana.” 11Nndumi Iruva kashivia: “Kulashitereve sheekye vandu yeva-fo. 12Naakwa vakootoya, nshishearanyaa kyiyyo kyawo-fo. Naakwa vashirasya na iningya fimu fya soko, nshivaarannya-fo; indi mmbo nshevarumataa na usu, na shaa na ndwari sheeresi.” 13Naasa shaamba, “Woi Nndumi Iruva Mwishillya, lola, vakisuku mmbo vakeevia vandu, ‘Mmulollya fira nta shaa-fo, mashika mmbo kuwaniingye kyaasa sheelyi mmbo mushewonisaa urilalyi urukeny lwany.’”
14Lyo Nndumi Iruva kashirouwa kaamba, “Vakisuku mmbo vakeyaawuya fisuku fya wongo na irina lyakwa; nta nshilevaruma-fo, nta nshilevavasa kindo nta irera nawo-fo. Mmbakee yaawuya moorya a wongo, ilollya lyilatiri udede, makusaro a mirwe yaawo veni. 15Kweekyo Nndumi Iruva aamba indi kya vakisuku vakeeyaawuya fisuku na irina lyakwa kulare shilevaruma, na yewo vakeeyamba, ‘Usu na shaa nfisheyaa uruka yelu-fo;’ Vakisuku yewo mmbawawaa ni usu na shaa. 16Na vandu yewo vakeevaawuya mmbashewoyywa shieny ta Yerusalemu nshaa na usu, valatiri mwiivarika wo, vaka vawo, vana vawo va womi na va kyika. Mashika nshikevaletya uraravi lwawo.”
17Mmbo kushevaviaa marero yaa, “Reny miso akwa neerite misoru kyio na nsanyiny, nalamandaa, kya mwana wa kyeny va vandu vakwa ankapwa kyuumu na kyishavere kyiniini. 18Elyi shalola efo mareminy, mmbo shilollye-fo minying'a ya yewo valewaawa na usu! Na kwakooya shaanga muriny lola, ndwari ta shaa tiifo! Mashika nkisuku amwi na nkohani mmbakeekapa mbusha tawo efo urukeny, nta valaishi kindo vakeetana.”
Vandu varumana na Nndumi
19A Nndumi Iruva mmbo kwammiisitya Yuda deny? A nrima wafo mmbwammiswa Sioni? A nkyikyi mbee elyi kulevavisa indo kuleefo nri wa ilushiisa? Mmbo lweevika nsia wa iwona unapwe, lulawoni nta usha lumwi; lukavera ishia-dwa, indi lukawoywa ni isaukwa. 20Lwammanya makasha eru na uravi lwa vamiku veru woi Nndumi Iruva, mashika lulekulyamarya. 21Kyeendwa ni irina lyafo kulalulemi deny-fo; nta kulaipale kitima kyafo kya itumbe; kummbwa, nta kulafishe mma yafo neese-fo.
22A mmbo kwiifo nta iruva lyimwi lya wongo nnang'ani ya maruva yoo a masanga lyishiidimaa yeende mmbwa?
Ao ngyina ishidimaa yeende mmbwa?
A nshi yewe woi Nndumi Iruva weeru? Lukuvikkye nsia, mashika nnyewe kutanaa findo yefyo fyoose.
The Holy Bible in Kimashami © Bible Society of Tanzania, 2016.