VALETI 21

Vaka va Ufyari lwa Benyaminy

1Nalyo vandu va Israeli woose mmbo vellya mboo alya Mispa, vakaamba, “Nkwiifo muumu nndu wa Israeli naniingye mwana wakwe noorwa ni nndu wa Benyaminy-fo.” 2Nawo vakasherwa mbee ya Iruva kulya Betheli vakakaba kiiyo kiniini nnu. 3Vakaamba, “Woi Nndumi Iruva wa Israeli, a nkyiki-dwa elyi kindo ekyi kiroo indi kilewoya Israeli, nang'u kukooka-u ufyari lumwi kunu Israeli.” 4Nalyo elyi lya ndesi vandu yewo vakakwiiboo ngama nraasi, vakatana kitara kyeerasya, vakootya-u firaso feekora na muro na firaso fya ufoo. 5Vana va Israeli vakaamba, “Kunu ngyufyariny ta Israeli ni ufyari lungalu kulore lwasheenndya Nndumi Iruva yaa?” Mashika mmbo valelya mboo vakaamba, Yeto araa nalesheenndya Nndumi Iruva yoo Mispa mmbo awaawaa, dede deny. 6Vana va Israeli vakavavyo nriminy nnu kimaruma kya ufyari lwa Benyaminy, vakaammba, ulaalu ufyari lumwi lwamuuka kunu Israeli. 7Alukatana inda Luwonisye womi yewo valesaa-u vaka, mashika lyo mmbo lwellya mboo lukaammba lluvaniingaa vana veru vavarwaa-fo. 8Vakaamba, “Ni ufyari lungalu lwa Israeli kulore lweeiyo alya Mispa?” Na vakakooya ate! Nkwiifo nndu alesha alya ulaleny aleuka Yabesh-gilead nashe ikwaanuny-fo. 9Mashika llya valeekyeno nkweiyo nta nndu umwi wa Yabesh-gileadi-fo. 10Naasa llyo ikwaanu elyo lya vandu lyikarumafo vandu fiku ikumi na fivii wooka efo vanduny yewo vakaari deny, vakavavia, Endeny mundekaba vandu yewo va Yabesh-gileadi, mukabe na vaka vawo na vana vadu. 11Mukammeenda mmbo muwaa womi woose na vaka yewo valenkaa na womi. 12Efo Yabesh-gileadi vakawonisa-fo vana va kyika mayana aana-nsi valaishi womi, vakandevarwaa ulaleny kulya shilo, urukeny lwa Kanaani. 13Naasa llyo ironda elyo lya vandu lyileruma vandu vanderera na vandu va Benyaminy yewo veekusurumye kulya iweny lya Rimon vakavavia, “Kukaeny na Ufoo.” 14Naasa va-Benyaminy yewo vakawuya, Israeli vakavaniinga vana valya va kika valevanta kulya Yabesh-gileadi, lyo mmbalevamaa-fo, womi vakaingifwa mmwasi. 15Vandu vakarovyo nriminy kya Benyaminy, mashika elyi Nndumi Iruva aleuta Benyaminy yeekeniny lya Israeli.

16Llyo vasongoru va vandu valeammba, “A lukatana inda naambo luwonisye yewo vengyi vaka? Mashika efo Benyaminy nkwiifoo vaka-fo, mmbo valewaawa woose.” 17Vabenyaminy yewo valeturunya nkuti vaonise vayading'u naambo ufyari lwa Benyaminy lulareke kulu kunu Israeli. 18Lyo llushiidimaa ivaniinga vana veru-fo, mashika Israeli valelya mboo vakaammba, “Yeto aniingaa nndu wa Benyaminy nka mmbo avaan-denge.” 19Llyo valeammba, “Shaasa lwiishivye mmbo kwiifoo sukukuu wo mwaaka kulya Shilo, nafo n'taari ya ndoo ya Betheli, mfo taari ya ngama ya shia yeyo yooka Betheli fika Shekemu, na taari ya sinde ya Lebona.” 20Naasa vakavia vana yewo va Benyaminy, “Kyasia endeovyeny kulya mareminy a misabibu muvereye-fo,” 21kyeeri vana va kyeny va Shilo vasomukyaa indefina efo sukukuuny, llyo musomuke efo mareminy a misabibu, wo nndu naware-u nka yeto ankunda efo vaniny va Shilo muwuyeny na urukeny lwa Benyaminy, 22Nalyo elyi vande vawo ao vandu vawo vashevasoraa kya mwaandu, yese luvavie, “Lusaryeny, mashika llulevatirya fireny-fo, nta nshi mulevaniingya yeni-fo, kive indo uvingo mmbo lweevaa lwany.”

23Naasa vana va Benyaminy vakatana shaasa valeolonngyo, wo umwi kawonisa nka vaniny va kyeny valya valefina. Vakeenda nawo. Naasa vakawuya urukeny lwa Benyaminy vakapooka itana-se miri ilya yaawo neekaa-fo. 24Kyeeri ekyi vana va Israeli vakandekaa wo nndu efo ufyariny lwakwe, kyeny kwakwe muni, ding'uny yakwe. 25Lyo Israeli nkweefo mangyi-fo. Wo nndu mmbo aletana ekyo kilensennya we muni.

Currently Selected:

VALETI 21: MAS2

Highlight

Compare

Copy