RUTI 1
1
Elimeleki na Vammba Yakwe Vasamya Moabu
1Naasa kyeeri kilya kya Veesalallya Israeli mmbo kweefo shaa niini urukeny. Nafo mmbo kweefo nndu umwi wa kulya muriny wa Betlehemu ya Uyuda, kaukafo keenda kulya urukeny lwa Moabu, we na nka vakwe na vana vakwe va kyuumi vavii. 2Nndu yeu mmbo evaangwaa Elimeleki na nkaakwe ni Naimi, na vana yewo vakwe ni Maloni na Kilioni, mmbo vekee va kyuungo kya Efrata kya Betlehemu. 3Naasa Elimeleki kafwa, na nkaakwe Naimi kasaa na vana yewo vakwe vavii. 4Vana yewo vakwe vakaora vaka va Moabu, yeto umwi evaangwaa Orpa neeto ungyi ni Ruti. Vakakaa kulya urukeny lulya lwa Moabu ando a myaaka ikumi. 5Naasa Maloni na Kilion vakavefwa, nkyo Naimi kafiiywa ni mmi na vana veevavii.
Naimi na Ruti Vawuya Betilehemu
6Naasa Naimi kakwiipoo we na valyi yewo vakwe wooke efo Moabu veende kulya Uyuda. 7Naasa kakwiipoo-fo we na valyi valya vakwe, veende kutani vandefikaa kulya Uyuda. 8Elyi varye shia veefo vesheendaa Naimi kavia valyi yewo vakwe, “Kewuyeny kyen'y kwany-te, na Nndumi Iruva ashemutannyaa mesha, shaasa muletanya womi yewo vany valefwa na shaasa muleshitannya yeny. 9Na Nndumi Iruva namuniinge ifura wo umwi waany kyeny kwan elyi mushealyikwaase.” Naasa Naimi kavamiminda kyeevasama naambo vakweengyeeny, kyeendi wo vakafua neeiya nnu, 10vakammbia, “Nkivaa-fo-te, mmbo lusheendaa neewe kwa vandu vafo,” 11lyo Naomi kavavia, Vana vakwa, shamuvia kweengyeny-te, a-mmbo kivaa inda kwakooya mweenda neeny? A ndesa mmbo shishiidimaa yiira vana vengi vamwaalyike yeni. 12Vana vakwaro, kuwuiyeny kyeny kwany-te, kimmba na yeny shammikwa shilakiwonisaa mmi. Kukooye kyevaa ivika nsia vai iwonisa mmi naakwa ni inu shiwone vana vengi veemwaalyika yeni, 13a ndesa mweevaveraa kutani vang'ana? Muraafo yaalyikwa ulaalu? Oode, nkyeevaa-fo vanavakwa, mashika kwakwa yeny nkiroo ngota kwany yeni, mashika woko lwa Nndumi Iruva mbo luleshikapa. 14Vekiita indo vakafwa lyingi, na Orpa kamiminda mammi wakwe kaenda, lyo Ruti we keenda aryani nawe. 15Naasa Naimi kavia Ruti, kulollye mwali ulya ungyi nkaammi wafo ammbuya kyeny kwa vandeye na kwa iruva lyakwe, naasany neewe kyensoreny. 16Naasa Ruti kaamba,
Kulashiitikye shikure,
Shiwuye, shilakane neewe-fo;
Kimmba kundo kweenda neeny mfo nsheendaa,
Na ando kwakaa neeny nng'u nshekaa.
Vandu vafo vave mmbo vakwa
Na Iruva wafo naveva mmbwe Iruva wakwa;
17Na ando kwafiiya nng'u neeny nshefiiyaa
Na nng'u kweni nsherikwaa;
Nndumi Iruva nasheekye kive indo na kilanya.
Ni ufu weni lushelutarakanisaa yese Luvavii.
18Naasa Naimi eekilollya Ruti ankaarya indo, kamanda irera nawe. 19Vakeenda veeryani tana vafika Betlehemu. Veekifika Betlehemu muri moose ukalanga imanya mbony tawo. Vaka veefo muriny vakaamba, A dede yeu mmbwe Naimi? 20Naimi kavavia, “Mulakishivaange Naimi-fo shivaangeny” Mara#1:20 Mara: Kiebrania ni findo fivavaa. Kimmba Iruva Nndumi Iruva aleshitannya findo fivavaa nnu. 21Mmbo shilooka kunu shiikutiri, lyo ulaalu mmbo shawuya shilatiri kindo, mulakishivaange Naimi-fo, mashika Nndumi Iruva mmbo aora paa kya Iruva Nndumi Iruva ishirikya ukiva. 22Niindo Naimi na mwalyi wakwe we Ruti valewuya vauka kulya Moabu vakafika Betlehemu kwiikee mapookyony a fimu fya nganu.
Currently Selected:
RUTI 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.