VALETI 20

Vaisraeli Vakudeesya kya Fira

1Naasa Vaisraeli vakakusanyirya swany, pookya Dani fika Beer-sheba, na uruka lwa Gileadi loose, vashearannya Nndumi Iruva alya Mispa. 2Nalyo vasongoru woose va ngyufyari ta Israeli vakashekuummbya mbee ya Iruva, vandu fiku mayana aana womi va fira. 3Naasa llyo ufyari lwa Benyaminy luleita sheelyi Vaisraeli vanrwa na Mispa. Vana va Israeli vakaammba, “Nkyeluvieny shaasa kileva uravi yelo lukatanyika.” 4Llevi yeto muni nka ulya alewaawa karouwa, kaammba, Yeny mmbo shefika Gibea ya Benyaminy, yeny na nka wakwa lundelala-fo. 5Nawo womi vave va Gibea vakakwiipoo kio vakasheringitya mmba yeyo lweekai, naambo valuwae. Llyo valetannya nkaakwa uravielo kutani afwa. 6Naasa llyo shilemwiipoo neenrumbwa mafyenga-fyenga, shandevika nnyanuny kwa Israeli koose, mashika mmbo valetana uravi uniini nnu na urung'ani kunu Israeli 7Kyasiany, yeni vana va Israeli loleny ekyi, rereny murummbwe yeni muveni. 8Naasa llyo vandu yewo valerera na unyanga lumwi, vakaammba, Llusheendaa kyeny ntalusheendaa meemeny erufo. 9Vandu va Gibea mmbo lushevatannyaa indi, Mmbo lurwaa lundekaba Gibea. 10Wo ufyari lwa Israeli mmbo lushuutaa-fo vandu ikumi, na vandu iyana va kyiku, na vandu kyiku va fiku ikumi, vanderuuya vandu shoonga yeenda fireny naambo elyi vashefikaa Gibea veedimi ivataiya ekyo valetana kya uravi kunu Israeli. 11Womi woose va Israeli vakakusang'irya naambo vandekaba Gibea, vakava na nrima umwi-nsi.

12Ngyufyari ta Israeli tikaruma vandu veende kwa ufyari lwa Benyaminy ivavesa, “A ni uravi lwa ngata-kyi yelu muletana?” 13Kyasia ulaalu somuteny vandu yewo, maraami yoo a Gibea, naambo luvawaa neerumata uravi kunu Israeli, Lyo vandu va Benyaminy mmbaleirikya ekyo vanavamaye wo Israeli valevavia-fo. 14Llyo va-Benyaminy valekusanyirya efo Gibea vauka efo miriny yaawo, vandu va fira, na vengyi-se vekee vasauwe vandu. 15Na va-Benyaminy vakasangyirya uka mirny yaawo myoose nkonu ulya womi fiku makumi avii na firindaru vatiri ngyusu, ra valya va Gibea, vatiri womi fiku mfungare. 16Yewo vekee vasauwe, vekee vandu varundaa na woko umuso, nawo mmbo veeshiidimaa yeerya uruu usiise iwe lyire lyileera mmbai!

17Nawo vandu va Israeli, kuuta-fo yewo va Benyaminy, yeekana lyawo ni vandu va fira woose.

Fira na Ufyari lwa Benyaminy

18Naasa vana va Israeli vakarwa na Betheli, vandevesa mbele Iruva, vakammbia, “A ni ufyari lungalu lusonngwaa mbee indekabana na Benyaminy?” Nndumi Iruva kavavia, “Ni Yuda vashiiraa mbee.” 19Naasa llyo vana va Israeli valekupoo vakandemannya ulale uroo-u ya Gibea. 20Israeli vakeendany naambo vandekabana na Benyaminy, nawo vakadeerya fira nisha. 21Llyo vana va Benyaminy valesomuka efo Gibea na finya vakarumata itorito nkonu yeto. 22Llyo vandu va Israeli valekaarya vakakusara lyingyi shaasa vasheendaa na mbee, veepookya alya vekaa llya lya mbee. 23Vana va Israeli vakandevesa Nndumi Iruva, vakamfuuya fika nkwaany, vakammbia, Nndumi Iruva lukandekapa vana vama veru va Benyaminy, a lukara? Nndumi Iruva kavavia, “Yee, endeny mukandevakapa.”

24Naasa elyi lya ndesi Vaisraeli vakaserikya kufii na vana va Benyaminy. 25Vana va Benyaminy vakasomuka-se vanka Gibea, vakawaa-se itorito va Israeli fiku ikumi na nyanya. 26Llyo Israeli woose vakarwa na Beteli vakandefuuya Nndumi Iruva nkonu piti valakommba kindo, vakautyan Nndumi Iruva firaso fyeekora na muro na firaso fya ufoo. 27Naasa vana va Israeli vakavesa Nndumi Iruva (mashika na isanduku llya lya mavavaso mmbo lyekee Betheli kyeeri ekyi. 28Nawe Finehasi mwana wa Elieseri wa Aron kava mmbwe mwiilyilola), vakaammba, A shandekabana na vana vama va Benyaminy a shara? Nndumi Iruva kavavia, Yee, endeny, Ndesi llyo nshevavikaa maakony any. 29Israeli vakarwa maata vakandeovya numa ya Gibea na vengyi vakauringitya taari toose.

30Yeu ni nkonu wa kararu vana va Israeli vakarwa indekabana na vana va Benyaminy efo Gibea shaasa valepooka. 31Llyo vana va Benyaminy valesomuka lyingyi, vakakunda yuuka efo muriny deny, vakabooka ikabana, vakawaa vandu fiku makumi araru indi, shaasa valetana llya lya mbee, lyo ni yewo vekee efo shia ya yeenda miriny ya Gibea na Betheli. 32Benyaminy valollya kive indo vakakusara mmbo vakeevakaba sha llya mbee. Kyeendi vana va Israeli vakaammba, “Sye nndeny luve sheelyi lwamuweereya lurishe, naambo vasomuke efo muriny woose, vashe kunu shia.” 33Nalyo vandu va Israeli woose vakooka yoo veekai vakashesalala Baal-tamari, na valya veeoovye vakasha fika Maare-geba. 34Llyo vandu fiku ikumi vakee vasauwe efo Israeli vakasha Gibea. Fira ikanyaasya nnu deny. Lyo valamanye sheelyi uruumato lwawo lwansha. 35Nawe Nndumi Iruva kakaba Benyaminy mbee ya Israeli. Vana va Israeli vakawaa vandu fiku makumi avii na varaanu na iyana lyimwi va Benyaminy, vakee itorito va fira.

36Naasa vana va Benyaminy vakamanya vammbingwa.

Shaasa Vaisraeli Vevinga

Nawo Vaisraeli vakawuya numa sheelye mbeereya yewa veoovye, kulya numa ya Gibea. 37Valya veoovya vakaasya vakaanga Gibea vakandenkaba nnu. 38Nawo mmbo vekee vavavasye vatane indi, efo muriny vandekora-fo lyisaame ituuru lya nsu sha ifishi iroo, 39Naasa llya vana va Israeli valeenda indesanga na valya veeoovye, kunu numa vandu va Benyaminy vakawaa Vaisraeli fiku makumi araru vakakusara mmbo vammbinga sha llya mapookyony, 40lyo kyeeri ifishi llya lya nsu lyilerwa kulya muriny, Vabenyaminy mmbo valeinduka vakalyilollya, llyo valemanya ate muri wawo moose mmbo vammaaka muro. 41Vandu va Benyaminy vakaawukwa nnu, vakamanyan urumato mmbo lwammbakooya. Vaisraeli nawo vakaindukya-fo. 42Lyo valerisha Vaisraeli veesoraa shia ya kasa. Nayo fira ikavarovya nnu. Valya valenka kulya miriny vakawaawa woose. 43Vakashingillya va-Benyaminy taari toose vakavarishisa deny, vakavavavara neevakakasha yoo veemuyi vakamaa woose efo Gibea. 44Vandu va Benyaminy valewaawa ni fiku ikumi na nyanya womi veni. 45Vengyi vakarisha vakandekooya iwe lya Rimon, neefo shia vakakooya-fo sha vandu fiku firaanu nawo vakavarishisa fika Gidomu, nawo vakawaa vandu fiku fivii. 46Nawo vandu va Benyaminy valewaawa vakava fiku makumi avii va firaanu, itorito vakaari. 47Lyo womi mayana arindaru mmbo valeturushuka vakarisha fika iwe lya Rimoni vakakaa-fo ando a miiri iina. 48Nalyo vana va Israeli vakeengera isora vana va Benyaminy vakavakapa neewaa vandu va muri woose, na wo kindo valekooya-fo. Na miri yaawo myoose mmbo valeyaatya muro.

Currently Selected:

VALETI 20: MAS2

Highlight

Compare

Copy