VALETI 19
19
Llevi na Nka wa Shia
1Naasa kyeeri ekyi Vaisraeli valatiri mangyi, kweefo Llevi umwi eeke efo urukeny lwa mafumbu lwa Efraimu nawe keepoo nka kishinga kulya Betlehemu ya Yuda. 2Nka yeto kalanga iwuya kwa ndeye elyi aleswa na mmi, kandekaa-fo ando a miiri iina. 3Nalyo mmi kandensora-fo, na ndellelemba naambo nawuye, keenda we na ishinga lyakwe na mishungu ivii, nawe nkeeto kammbwarya efo mmba kwa ndeye. Nawe ndeye kafura nnu illollya. 4Nalyo ndeye wa nkaakwe kamwiisima, nawe kakaa kwakwe mikonu iraru, veelyaa neena. 5Kufike nkonu wa kaana vakakwiipoo ngama nraasi naambo veende. Lyo ndeye-a-nka kammbia, “Fweera nrimate kulye mbele shoonga shinnyo, kweendeny.” 6Naasa vakakaa rembo vakalya shoonga ilya. Naasa ndeye wa nka eto kavia Llevi yeto, “Kukaye kweru nkonu piti, kwiimuye-te.” 7Naasa kwiikikya kakuboo neende, lyo ndeya-a-nka kamwiisima, kalala lyingyi-da. 8Naasa elyi kwamfika nkonu wa karaanu kakuboo naambo neende, lyo ndeye kammbia-se, “Fweera nrima shakutereva, kaa kweru fika nsanyiny, kakaau vakalya shoonga.”
9Naasa eekikuboo we na nka na ishinga lyakwe, ndeye-a-nka kavemmbia-se, “Ulaalu mmbo kwamfika nkwaany, lala lyingyi, naambo kwiimuye, ndesi llyo mweende nraasi.” 10Lyo Llevi yeto nnyalekunda ilala lyingyifo, kakuboo keenda kandefika muri wa Yebus (nto Yerusalemu) ando amwi na mishungu yaawo, 11Vafika kufii na muri wa Yebusi nkwekifo nsanyiny-fo, ishinga llya lyikavia nndumi wakwe, “Nndeny lwaange neefo muriny, lulale-fo.” 12Nawe kammbia, “Llushaangaa muriny wa vandu lulaveeshi-fo, valakee Veesireeli, lweende lundekooya Gibea.” 13Kawuya kavia ishinga llya lyakwe, “Nndeny lusore miri yeyo ikee mbee yeeru, lundelala Gibea ao Rama.” 14Vakeenda na mbee, kukeela vekee kufii na Gibea, nato mmuri wa Benyaminy. 15Nalyo vakeenda neefo muriny vandelala-fo. Vakashesalala yoo shieny ya yaanga neefo muriny, lyo kulakae-fo nndu akunda ivawarya nafo.
16Elyi vaiyoo indo kukandesha nndu umwi nkuu, akuukya nreminy nkwaany, Nawe nndu yeu ekee wa efo Efraimu, kava muny efo Gibea. Lyo vandu va vayo vakava Vabenyamin. 17Naasa mmiku yeu kalollya Llevi yeu, kammbesa, “Nkwi kooka, neewe nkwi kukeenda?” 18Mmbo looka Betlehemu ya Yuda, lwiire yaa lweende uruka lwa mafumbu lwa Efraimu, shindefika ando a yiinndya Iruva. Lyo llwandewona nndu mwiiluwarya kwakwe-fo. 19Neese lyo lurye mare a nshungu, na nkate na mfinyo-da, fyalumaa shaasa lukai, lluturye kindo-fo. 20Mmiku yeto kammbia, “Wuiyo mmu, neefyo fya kwaanguya kusheonisaa kwakwa, oshony kwakwa.” 21Naasa kavarwaa kwakwe, kavasangya marende, vakalya na shoonga, na nshungu ukaniingwa mare. 22Veefo valyaa na yiimuya, vakasha vandu varavi va efo muriny, vakaringitya mmba, vakakaba mwaango, vakavia muni mmba, “Ende nndu yeto aanga kwafo lulale nawe.” 23Muni mmba kasomuka kavavia, “Oode nyiraa-kwa nkivaa indo-fo, mmbo shamutereva mulasheetana uravi lwa ngata yeyo-fo, mulasheetannya munyi wakwa kindo kya urung'ani sheekyo-fo.” 24Yeny mmbo shitiri mwana wa kyika, na muny yeu atiri nka wakwe-da, reny shimusomutye muvatannye shaasa mwalollya muveni. Lyo muny yeu mmuntannyaa urung'ani yelo-fo. 25Lyo vandu yewo mmbaleirikya-fo. Naasa nndu yeto kavasomutya nka yeto wakwe, nawo vakantefura kio kyoose. Kwiikyaa vakamweekeya neende. 26Nawe nka yeto kasha nraasi kashewa yoo mwaangony wa mmba alya mmi eelele, maako akwe akabaana kisingiti. 27Kyeeri kulekya mmi wakwe kakupoo naambo neende, paripari ekau nkaakwe nnyoo mwaangony alele. 28Nawe kammbia, “Naasa, kwiipoo lweende, lyo nnyalenrerya-fo.” Nalyo kamwiipoo kankikisa yoo uwe ya nshungu. Keenda kandefika ando kulaiyoo nndu. 29Eekianga mmba, keepoo kyaandu, karumbwa-rumbwa nka yeto wakwe, malungo lungo, akava ikumi na avii, kanderarata efo urukeny lwa Israeli koose. 30Nalyo wo nndu alelollya kindo ekyo kaammba, “Eki nkilellollyo nta nkiletanyike-se uka elyo Israeli vauka Misri fika inu-fo! Nkyekusareny-dwa, mwaandwe, neerummbwa mwaandu!”
Currently Selected:
VALETI 19: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
