VALETI 18
18
Mika na Ufyari lwa Dani
1Fyeeri efi nkwenkaa-fo mangyi kulya Israeli-fo, na vana va Dani nta mmbembonisa ando ekaa sha ngyufyari yeto tingyi ta Israeli-fo. 2Naasa vana va Dani vakasauwa vandu varango varaanu, vatiri finya naambo wooke Sora alya Eshtaoli, naambo vandesaiya uruka, vakavavia, “Endeny mundesaiya uruka elo.” Naasa veekeenda vakandefika nrukeny lwa mafumbu a Efraimu mmba kwa Mika, vakalallya-fo. 3Elyi vakee kufii na kyeny kwa Mika, vakamanya unyanga lwa nndu ulya nkoo, we Llevi ulya, vakeenda nafo, vakambesa, “A mmbo kulesha indi kunu?” A nkyoki kukeetana-fo? 4Nawe kavavia shaasa Mika alentannya, kammbika kwakwe shive nkohani wakwe. 5Llyo wo valembia, Mmbo lwakutereva lweekye ivesa Iruva, lumanyi kwakooya luvesyoo kyaarony eki kyeru. 6Nkohani yeto kavavia, “Kweenngyeny na urilalyi, Nndumi Iruva mmbo akee neeni, kyaaro kyany kikee na Nndumi Iruva.”
7Naasa vandu yewo varaanu vakeenda vakandefika muriny wa Laisha. Vakakooya-fo vandu va vayo shaasa veekukaye ando esha afoo sau, shaasa kulya Sidon kweekai, vandu mmbo veetiri ufoo vakavekukaya neefura nta kuleefo nndu aruuya ungi mwaandu. Nawo mmbo vekee kwaasha na Vasidoni nta valatiri nawo mbony. 8Naasa llyo valewuya na Sora na Eshtaoli, vakaveswa, “Nkyeluvieny mbony.” 9Wo vakaammba, “Oshony sere, nndeny lundekabana nawo, mashika elo-mmbo lukee uruka usha nnu, Mulatirwa nnyinyira-fo, ndifony lundetira uruka elo.” 10Elyi mushendaa mmbo mukendekooya vandu vafoo sau, na uruka lwawo ni uniini Iruva mmbo ammuniinga uruka elo, efo nta nkwiifo kindo kimwaanguyaa-fo,
11Naasa vakakuboo vandu mayana arindaru veerie fisha fya fira va ufyari lwa Dani va Sora ya Eshtaoli. 12Vakarwa indemannya ulale kulya Kiriat-yearimu, ya Yuda. Na ando yoo akavaangwa Mahane-dani fika inu nang'u nkafii na Kiriat-yearimu. 13Vakeera efo urukeny lwa mafumbu lwa Efraimu, vakandekooya kwa Mika, 14Nawo vandu valya varaanu vendesaiya Laishi vakaammba, “Mwiishi lyo sheelyi kunu mmba yei ya Mika mmbo kwiifoo maruva a mafwanu naambo mukusare kyeetana?” 15Llyo valeenda vakandekooya mmba ya nndu yeto Llevi we Mika, nawo vakammbesa mbony takwe. 16Vandu yewo mayana arindaru vafira va Dani vakasalala alya usumanu na ngiri ya muri. 17Nawo vandu valya valendesaiya uruka vakasonngwa yaanga neefo mmba, vakaiboo findo filya fya maruva eebasha, na nkohani yeto, vakasanga na vandu yewo va fira. 18Kyeeri valeanga mmba kwa Mika na yeende mafwanu yoo, nkohani yeto kavavesa, “A nkyoki mukeetana?” 19Nawo vakammba, “Sya-do uviny, yewe mmbo kunndee neese, kulusongoye elyi kukee ndeyeru nkohani,” A mmbo kivaa inda kwakooya nndu ava nkohani mmba kwa nndu ando a iva nkohani wa ufyari awo wa mmba ya Israeli?
20Nkohani yeto kafura, kawarya soori yakwe na ifwanu yelyo, keenda nawo. 21Vakeeta findo fyawo fyeevikya mbee ando amwi na vana vadu, llyo vakeendany. 22Vekyeenda deny uka alya kwa Mika, vandu valya va nnyanuny kwa Mika vakaummburana, vakarishya vana va Daani. 23Vakavavaanga na unyanga waasha. Nawo vakeenduka vakavesa Mika, “A mmbo kyava inda kulusore na nkuka wa vandu?” 24Nawe kavavia mmbo muleipoo maruva akwa na nkohani wakwa-da, mukashira indo, neeni ulaalu mukashivesa mmbo kyava inda, 25Vana va Dani vakammbia, “Lola, kularere lyingyi, kulashewaawa na va mmba yafo woose kyeendo ni unyafi.” 26Naasa Mika eekilollya vandu yewo mmbo vatiri finya ngota vandu vakwe, kakuwuiya na kyeny. 27Nawo vakeenda varye findo filya Mika eesongosye ando amwi na nkohani wakwe, vakandefika Laishi. Vakandekooya vandu yewo vafoo, nawo vakavakaba neevawaa, numa vakakora muri wawo. 28Nta nkulekaafo mwivaauwa-fo, mashika muri yeto mmbo ukee kwaasha deny na Sidoni. Muri yeto mmbo weekee imungony lya Bethrehobu. Vakatana muri yeto wo vandu va Dani vakakaafo, 29Vakauvaanga Dani shawo veni. Lyo muri yeto elyo mbee mmbo weevoangwaa Laisha. 30Nawo vana va Dani vakasaleesa ifwanu lyilya lyeebasha. Nawe Yonathan wa Geshomu wa Mose ando amwi na vana vakwe vakava makohani va ufyari lwa Dani kukafika llya veshekamarwa mifungwa. 31Kyeeri kyoose kya mmba ya Iruva kulya Shilo vandu va Dani mmbo valeindya ifwanu lyilya Mika alesongosya.
Currently Selected:
VALETI 18: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
