VALETI 16

Samson Kulya Gaza

1Nalyo Samson keenda Gaza, nafo kakooya-fo nka wa shia kaanga kwakwe. 2Naasa vandu va Gaza vakafityo mbony sheelyi Samson mfo akai. Vakaringitya muri, vakalaaya kio tararaa yoo ngiriny ya muri veemalallye sau, veeshaammbaa, “Lwiirishe yaa fika ngama, lummbwae.” 3Samson kalala fika kio nnang'ani, kakupoo, katira mwaango wa ngiri na fisingiti fya vayo, kafiillwa ando amwi na firingisyo fya vayo, kavika meeveu, keenda kandefika uroron lwa ifumbu lyilya lyiiduvani na Hebron

Samson na Delila

4Numa ya vayo kakunda nka umwi wa kulya imungony lya Soreki avaangwaa Delila. 5Vasongoru va Vafilisti vakasora nka yeu vakammbia, “Nkyelelemmba Samson-te nakuvie kundo ootye finya yeto takwe, nakuvie na kindo kishiidimaa immbinga, naambo lundemfinga neelyisa ukiva, neese lukuniinge wo umwi weeru fesa kyiku na iyana.” 6Naasa Delila kandevia samson, “Mmbo shakutereva kushivye kundo kuutye finya yeto, kushivie na kindo kishiidimaa ikuvinga, kwiidimi ifingwa kulyiswa ukiva.” 7Samson kammbia, “Kwakooya shafingwa na fiwoye fivisi mfungare filandefinge kindo, uyo shisyaa finya, shivake vandu vengyi.” 8Llyo vasongoru va Vafilisti valemweengye fiwoye fivisi mfungare, nawe kamfinga nafyo. Nawe Delila mmbo emmaata vandu efo mmba, vaovye-fo. 9Naasa Delila kavia Samson, “Ekakawo Vafilisti.” Nawe na lyimwi nsi karummbwa fiwoye filya sheelyi muro urumbwaa uruu lwa soori. Nkyo mmbalemanya nta kundo ootye finya-fo. 10Naasa Delila kavia samson, “Mmbo kwashilemmba a mmbo kufingwa neekyi?” 11Kammbia, “Vakanshifinga na fiwoye filandefinge kindo, mmbo shisyaa finya shive sha vandu vengyi.” 12Nalyo Delila keeboo fiwoye fiiya kamfinga nafyo, kammbia, “Ekakawo Vafilisti vakeesha.” Nawo valya vekeellaya vaka ovya efo mmba. Nawe kuruttwa fiwoye filya sheelyi nndu aruttwaa uruu. 13Delila kavia Samson, Lola-da kwanshilemmba lyingyi, nkyeshiviany kindo kishiidimaa ikufinga? Nawe kammbia, kwakooya kwafingu fii eti takwa na soori, 14Naasa kakibya misumari, kammbia, Ekakawo Vafilisti vakeesha. Nawe kooka rony, keelwa misumari neerummbwa soori ilya.

15Naasa nkeeto kammbia, “A mmbo kushaammbaa inda” Shikukunndye nato nrima wafo ulakee neeny? Mmbo kwanshilemmba kararu sele nta kulashivye kundo finya yafo yuukye. 16Naasa kimmba emmwiima kiimuya kimaruma kya marero meengyi wo nkonu, nrima wakwe nkarovyo nnu, neelollya usutu. 17Nalyo kammbia fyoose efyo eishi, eshaammbaa, “Weembe llulebaani nrwe wakwa-fo, mashika elyi shikee wa Kyaasa kwa Iruva uka elyo shilandewonike. Nkyo kwakooya shootwa nrwe na finya takwa mmbo tisyaa shive sha vandu vengyi.”

18Naasa Delila eekilollya ammuvia fyoose efyo fyekee nriminy wakwe, karuma nndu nandevaanga vasongoru va Vafilisti, kavavia, Nkyeoshony lyimwi nsi ulaalu mashika nndu ulya anshivia findo fyakwe fyoose. Llyo vasongoru va Vafilisti valeenda veerye fesa tilya. 19Nawe Delila kalelembya Samson yoo ng'undeny yakwe karekya rony, nawe kavaanga nndu kashemuutya-u nrwe, kansisika na finya takwe tikamuuka, 20Llyo alemmbia, “Samson-ro, ekakawo Vafilisti veefo vakusheyaa.” Naasa kookya ron kakusara mmbo ashiiraa na poo sha mikonu ingyi, nakoorwe, Llyo nalamanyi sheelyi Nndumi Iruva ammaa imwiiyama. 21Vafilisti vakantira vakamwiillwa miso, vakandensota na kulya Gaza vakamfinga na minya idodorye, vakambika kundo avaseyaa nganu. 22Lyo fii takwe tikapooka imya lyingyi.

Ufu lwa Samson

23Vafilisti vakakusang'irya naambo vasheutya iruva lyawo Dagoni kiraso, vakafura nnu, vakaammba iruva weeru mmbo ambika nkiduva weeru maakony eru. 24Veekillollyo vakarumisha iruva lyawo vakaammba, “Iruva weeru allurambikya nkiduva yeu weeru, na mmbwe alerumata uruka lweru neewaa vandu veengyi.” 25Veekapaa ukoru indo, vakaammba, “Luvaangyeny Samson nashelufinnya mmbasa-te.” Vakoota Samson kulya kifingyony, naambo nashefina, kavikwa nnangani ya ngo ivii. 26Samson kavia nsoro yeto eenrye woko, “Nkyesheekya-te naambo shipaane ngo ta mmba yei, shikwanamire nato.” 27Mmmba yeyo mmbo yeeishwe vandu, womi na vaka, na vasongoru woose va Vafilisti, neefo kai naafyo, mmbo kweefo vandu fiku firaru womi na vaka, veelolaa elyi Samson eefo afinaa. 28Naasa llyo Samson kavaanga Nndumi Iruva, kammbia, “Woi Nndumi Iruva, kulashire, shakutereva, shaambika finya, shakutereva, tura yei sheni nsi, Woi Iruva wakwa naambo shikooye itaiya Vafilisti yeva kiduva kimaruma kya miso akwa yaa.” 29Nalyo Samson katira ngo yeto teesiiki mmba yeyo, kakwaamira nato na finya eetiri imwi na woko elu neengyi na woko elu lungyi. 30Samson kaammba, “Ra shifwe na Vafilisti yeva deny,” Kakwiinyika na finya toose, kakuna mmba ilya ikawoya vasongoru valya na vandu valya woose veefo. Na vandu yewo alevawaa kyeeri ekyi vakailannya valya alewaa kyeeri kya muu wakwe kyoose. 31Nalyo vandu va kwakwe na va kwa ndeye vakasoka indemoonndwa, vakandenndika ando a ndeye Manoa eerika kulya Sora ya Eshtaoli. Samson mmbo aleva mwiileta Israeli ando a myaaka makumi avii.

Currently Selected:

VALETI 16: MAS2

Highlight

Compare

Copy